កណ្ដាលៈ មន្ត្រីនគរបាលបានអះអាងពីម្សិលមិញថា ជនត្រូវចោទម្នាក់ក្នុងចំណោមគ្នា ៥ នាក់ ត្រូវបានចាប់ខ្លួនភ្លាមៗ បន្ទាប់ពីបុរសរូបនេះព្យាយាមរត់ចេញពីក្នុងពន្ធនាគារខេត្តកណ្ដាលកាលពីយប់ថ្ងៃទី ៩ ខែមករា រីឯអ្នកផ្សេងទៀតសមត្ថកិច្ចកំពុងបន្តតាមចាប់ខ្លួន។
លោក ឈុន ស៊ីណាត ស្នងការរងនគរបាលខេត្តកណ្ដាលបានប្រាប់ ភ្នំពេញ ប៉ុស្តិ៍ ថា ពេលនេះនគរបាលជំនាញកំពុងតាមរកចាប់ខ្លួនជនត្រូវចោទ ៤ នាក់ទៀតដើម្បីបន្តនីតិវិធីច្បាប់។
លោកថា៖ «តាមសេចក្ដីរាយការណ៍ពីមន្ត្រីអនុរក្សពន្ធនាគារខេត្តកណ្ដាល ក្រុមជនត្រូវចោទទាំង ៤ នាក់នោះ ត្រូវបានតុលាការខេត្តកណ្ដាលចោទប្រកាន់ពីបទជួញដូរគ្រឿងញៀន និងលួចមានស្ថានទម្ងន់ទោស»។
បើតាមលោក ស៊ីណាត ជនត្រូវចោទឈ្មោះ ឆុំ ស៊ីមី ដែលចាប់ខ្លួនបានក្រោយពីព្យាយាមរត់គេចពីពន្ធនាគារទាំងយប់នោះត្រូវបានសមត្ថកិច្ចចាប់ខ្លួននៅថ្ងៃទី ៤ ខែមករា ឆ្នាំ ២០២១ ករណីរក្សាទុកគ្រឿងញៀនខុសច្បាប់។ រីឯជនត្រូវចោទ ៤ នាក់ដែលសមត្ថកិច្ចកំពុងបន្តតាមចាប់មកវិញរួមមាន ឈ្មោះ នោ មេសា, ណាង ឈៀកលៀង (អ្នកទាំង ២ ចាប់ខ្លួនថ្ងៃទី ១ ខែមករា) រុន ពៅ និង ឈ្មោះ សេង សួនហួង (អ្នកទាំង ២ ចាប់ខ្លួនថ្ងៃទី ៤ ខែមករា )។
កាលពីថ្ងៃម្សិលមិញលោក ចាត ស៊ីនាង ប្រធានពន្ធនាគារខេត្តកណ្ដាលពុំអាចទាក់ទងសុំការអត្ថាធិប្បាយពីករណីនេះបានទេ។ ប៉ុន្តែលោក នុត សវនា អ្នកនាំពាក្យអគ្គនាយកដ្ឋានពន្ធនាគារក្រសួងមហាផ្ទៃបានថ្លែងថា កម្លាំងនគរបាលជំនាញនៃអគ្គនាយកដ្ឋានពន្ធនាគារ និងកម្លាំងនគរបាលខេត្តកណ្ដាលកំពុងស្រាវជ្រាវករណីនេះ។
លោកថា៖ «ពេលនេះមន្ត្រីជំនាញយើងសាកសួរអ្នកដែលត្រូវបានចាប់ខ្លួនអំឡុងពេលលួចរត់ ដើម្បីស្វែងរកការពិត។ ចំណែកមន្ត្រីអនុរក្សពន្ធនាគារមួយចំនួនក៏ត្រូវបានហៅមកសួរនាំជុំវិញករណីនេះផងដែរ»។
ក៏ប៉ុន្តែលទ្ធផលនៃការស៊ើបសួរនោះលោក សវនា នៅមិនទាន់ប្រាប់ឱ្យដឹងទេ ដោយថា ករណីនេះកំពុងស្ថិតក្រោមនីតិវិធីស៊ើបសួរនៅឡើយ៕