The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ចុះ​ចាប់​វៀតណាម ៣៤ ​នាក់​រស់នៅ​ខុសច្បាប់

សមត្ថកិច្ច​ចុះ​ចាប់​វៀតណាម ៣៤ ​នាក់​រស់នៅ​ខុសច្បាប់

រូបថត​ឯកសារ ជនជាតិ​វៀតណាម​ដែល​រស់នៅ​កម្ពុជា​ខុសច្បាប់​ត្រូវ​បញ្ជូន​ត្រឡប់​ទៅវិញ។
រូបថត​ឯកសារ ជនជាតិ​វៀតណាម​ដែល​រស់នៅ​កម្ពុជា​ខុសច្បាប់​ត្រូវ​បញ្ជូន​ត្រឡប់​ទៅវិញ។ ប៉ូលីស

សមត្ថកិច្ច​ចុះ​ចាប់​វៀតណាម ៣៤ ​នាក់​រស់នៅ​ខុសច្បាប់

ភ្នំពេញៈ ជនអន្តោប្រវេសន៍​វៀតណាម​រស់នៅ​ខុស​ច្បាប់​ ៣៤ ​នាក់ ដែល​ក្នុង​នោះ​មាន​ស្រី ៣ នាក់ ត្រូវ​បាន​​សមត្ថកិច្ច​ចម្រុះ​នៃ​ប្រតិបត្តិការ​ធ្វើ​ជំរឿន​ជនបរទេស ចុះចាប់​ខ្លួន​បាន​នៅ​ទីតាំង​​សិប្បកម្ម​ឈើ​មួយ​កន្លែង​ក្នុង​ភូមិ​​ត្រពាំងថ្លឹង សង្កាត់​ចោមចៅ ខណ្ឌ​ពោធិ៍សែនជ័យ។ ពួកគេ​នឹង​ត្រូវ​រង​ការចោទប្រកាន់​ពី​បទ​ស្នាក់នៅ​ប្រទេស​កម្ពុជា​ខុសច្បាប់ ដែល​​ត្រៀម​​បញ្ជូន​​​ត្រឡប់​ទៅ​វៀតណាម​វិញ។

អគ្គនាយករង​នៃ​អគ្គនាយកដ្ឋាន​អន្តោប្រវេសន៍​ក្រសួង​មហាផ្ទៃ លោក ម៉ម ស្រ៊ីមវណ្ណា បាន​ឲ្យ​ដឹង​ថា ប្រតិបត្តិការ​ចាប់ខ្លួន​ជនជាតិ​វៀតណាម​រស់នៅ និង​ប្រកប​ការងារ​ខុសច្បាប់​ក្នុង​ទីតាំង​សិប្បកម្ម​គ្មាន​យីហោ​ដែល​បាន​ធ្វើ​ឡើង​កាលពី​ល្ងាច​ថ្ងៃ​ទី ២៩ ខែ​មេសា​នោះ​គឺ​ធ្វើឡើង​ក្រោម​​កិច្ចសហការ​ពី​ព្រះរាជអាជ្ញា​អម​សាលា​ដំបូង​រាជធានី​ភ្នំពេញ មន្ត្រី​ក្រសួង​ការងារ​ទទួល​បន្ទុក​ត្រួតពិនិត្យ​ការងារ​ពលករ និង​នគរបាលជាតិ។

លោក​បាន​បន្ត​ថា ដំបូង​ឡើយ សមត្ថកិច្ច​បាន​រកឃើញ និង​​ឃាត់​ខ្លួន​ជនជាតិ​វៀតណាម ៣៧ នាក់ តែ​បន្ទាប់ពី​មន្ត្រី​ជំនាញ​ពិនិត្យ​ទៅ​​ឃើញ​ថា ៣ នាក់ មាន​ច្បាប់​រស់នៅ និង​បំពេញ​ការងារ​ត្រឹមត្រូវ​។

លោក​បាន​ឲ្យ​ដឹង​ទៀត​ថា៖ «ពួកនេះ (ជនជាតិ​វៀតណាម​) នៅពេល​ដែល​សមត្ថកិច្ច​ចុះ​ទៅ បាន​នាំគ្នា​រត់​​ពួន​​ក្នុង​​បន្ទប់​ទឹក ក្នុង​គំនរ​ឈើ និង​សម្បក​កង់ឡាន​​ទៀត ដើម្បី​កុំ​ឲ្យ​សមត្ថកិច្ច​រកឃើញ តែ​សមត្ថកិច្ច​នៅតែ​រកឃើញ ដោយ​​ចំណាយ​ពេល​​យូរ​ដែរ។ យើង​មិន​អាច​ឲ្យ​ពួកគេ​មក​ធ្វើ​ការងារ​ដោយ​ខុសច្បាប់ ដណ្តើម​ការងារ​របស់​ខ្មែរ​យើង​អស់​នោះ​ទេ បើ​ចេះ​ត្រូវតែ​ធ្វើ​ដោយ​ស្របច្បាប់​»​។

ប្រធាន​នាយកដ្ឋាន​ស៊ើបអង្កេត និង​​អនុវត្ត​នីតិវិធី​នៃ​អគ្គនាយកដ្ឋាន​អន្តោប្រវេសន៍​ក្រសួង​​មហាផ្ទៃ លោក អ៊ុក ហៃសីលា បាន​​ឲ្យ​ដឹង​ថា ជនអន្តោប្រវេសន៍​វៀតណាម​ទាំង ៣៤ ​នាក់​នេះ ត្រូវ​បាន​បញ្ជូន​មក​កាន់​សមត្ថកិច្ច បន្ត​ការសាកសួរ​កាលពី​ម្សិលមិញ​នេះ ដើម្បី​រៀបចំ​បែបបទ​បញ្ជូន​ត្រឡប់​ទៅវិញ និង​ផាក​ពិន័យ​តាមផ្លូវ​ច្បាប់។ លោក​ថា​៖ «តាម​​ការសាកសួរ និង​​ត្រួតពិនិត្យ​គឺ​មាន​អ្នក​ខ្លះ​ទើប​ចូល​មក​ធ្វើការ អត់​មាន​ Passport ខ្លះ​មាន​ Passport តែ​ជា​ប្រភេទ​ទេសចរណ៍ ហើយ​មាន​ខ្លះ​រស់នៅ​ខុសច្បាប់​​ក្នុង​កម្ពុជា​យូរ​មក​ហើយ​»​។

បើ​តាម​លោក អ៊ុកហៃសីលា ក្នុង​ពេល ៤ ខែ​ដើម​ឆ្នាំ ២០១៥ នេះ ជនជាតិ​វៀតណាម​ដែល​ត្រូវ​ឃាត់​ខ្លួន​បាន​ក្នុង​ជំរឿន​​អន្តោប្រវេសន៍​ទូទាំង​រាជធានី ខេត្ត​ក្នុង​កម្ពុជា​មាន​ជាង ៥០០ នាក់ និង​តែងតែ​ត្រូវ​បាន​បញ្ជូន​ត្រឡប់​ទៅវិញ អំឡុង​ពេល​ ១ សប្តាហ៍​ក្រោយ​មន្ត្រី​កុងស៊ុល​នៃ​ប្រទេស​នេះ​បាន​រៀបចំ​ឯកសារ​រួចរាល់។

យោងតាម​របាយការណ៍​ក្រសួង​មហាផ្ទៃ​ ចេញ​ផ្សាយ​កាលពី​ដើម​ឆ្នាំ ២០១៥ កន្លង​ទៅ​នេះ អគ្គនាយកដ្ឋាន​អន្តោប្រវេសន៍ បាន​​ឲ្យ​ដឹង​តាមរយៈ​លទ្ធផល​នៃ​ជំរឿន​ចុងក្រោយ រកឃើញ​ជនបរទេស​ជិត ៨ ម៉ឺន​នាក់​នៅ​កម្ពុជា ខណៈ​ដែល​ជនអន្តោប្រវេសន៍​ខុសច្បាប់​ចំនួន ១២៩៩ ​នាក់ មាន​​​ ៣១ ​សញ្ជាតិ ហើយ​ក្នុង​នោះ ៩០ ​ភាគរយ​ជា​ជនជាតិ​វៀតណាម​ និង​ត្រូវ​បាន​​បណ្តេញចេញ​ក្នុង​ឆ្នាំ ២០១៤ ៕

អត្ថបទគួរចាប់អារម្មណ៍