ព្រះសីហនុ៖ កុងតឺន័រចំនួន ៨៣ ទូ ដែលផ្ទុកពេញទៅដោយកាកសំណល់សំរាម ត្រូវបានសមត្ថកិច្ចចម្រុះចុះបង្រ្កាប បន្ទាប់ពីមានជនខិលខូច លួចនាំចូលមកពីបរទេស យកមកប្លុងចោល នៅកំពង់ផែអន្តរជាតិខេត្តព្រះសីហនុ ប៉ុន្ដែមន្រ្តីមិនទាន់ស្វែងរកឃើញប្រភពសំរាមទាំងនោះនៅឡើយទេ។ នេះបើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន។
លោក នេត្រ ភក្ត្រា បានប្រាប់ភ្នំពេញប៉ុស្ដិ៍នៅល្ងាចថ្ងៃទី ១៦ ខែកក្កដានេះ ថា កុងតឺន័រចំនួន ៨៣ ទូ ដែលមានផ្ទុកកាកសំណល់សំរាម នាំចូលពីបរទេសនេះ ត្រូវកម្លាំងសមត្ថកិច្ច នៃអគ្គនាយកដ្ឋានគយ និងរដ្ឋាករ សហការជាមួយសមត្ថកិច្ចពាក់ព័ន្ធ បើកប្រតិបត្តិការបង្ក្រាបបាន នៅខេត្តព្រះសីហនុ។ នៅរសៀលថ្ងៃទី ១៦ ខែកក្កដា ឆ្នាំ ២០១៩ នេះ ក្រសួងបរិស្ថាន និងអគ្គនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធបានសម្រេចគាស់ទូកុងតឺន័រទាំងអស់នោះ ដើម្បីពិនិត្យជាក់ស្ដែងនៅក្នុងកំពង់ផែខេត្តព្រះសីហនុ។
បើតាមលោកនេត្រ ភក្រ្តា ការគាស់ទូកុងតឺន័រនៅរសៀលថ្ងៃនេះ ដឹកនាំដោយលោក គុណ ញឹម ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានគយ និងរដ្ឋាករ លោក សាយ សំអាល់ រដ្ឋមន្ដ្រីក្រសួងបរិស្ថាន លោក គួច ចំរើន អភិបាលខេត្តព្រះសីហនុ និង លោក លូ គឹមឈុន ប្រតិភូរាជរដ្ឋាភិបាល ទទួលបន្ទុកជាអគ្គនាយកកំពង់ផែស្វយ័តព្រះសីហនុ៕