.jpg)
កំណាត់ឈើក្នុងរោងសិប្បកម្មដែលសមត្ថកិច្ចខេត្តរតនគិរីចុះបង្ក្រាប និងរឹបអូស។ រូបថត កងរាជអាវុធហត្ថ
រតនគិរី/ស្ទឹងត្រែង: សមត្ថកិច្ចខេត្តរតនគិរីបានចុះបង្ក្រាបរោងសិប្បកម្មអារឈើ និងកែច្នៃឈើមួយកន្លែងស្ថិតនៅភូមិអូរកន្តិល សង្កាត់បឹងកន្សែង ក្រុងបានលុងដោយដកហូតឈើសុក្រំ និងកកោះជាង ១៣០ ដុំ និងឈើធ្នង់ ៥៤០ គីឡូក្រាម ប៉ុន្ដែម្ចាស់បានរត់គេចខ្លួន ខណៈសមត្ថកិច្ចខេត្តស្ទឹងត្រែងក៏បានចុះត្រួតពិនិត្យរោងសិប្បកម្មកែច្នៃឈើចំនួន ២ កន្លែងផងដែរ ហើយម្ចាស់រត់គេចខ្លួនដូចគ្នា។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរីបានថ្លែងថា នៅថ្ងៃទី ១ ខែកុម្ភៈ ឆ្នាំ ២០២០ កម្លាំងមូលដ្ឋានកងរាជអាវុធហត្ថក្រុងបានលុង និងមន្ត្រីជំនាញរដ្ឋបាលព្រៃឈើដែលដឹកនាំដោយលោក លាង អ៊ូ ព្រះរាជអាជ្ញារងនៃអយ្យការអមសាលាដំបូងខេត្តរតនគិរីបានចុះបង្ក្រាបបទល្មើសព្រៃឈើនៅចំណុចភូមិអូរកន្តិល។
លោកបន្តថា ជាលទ្ធផលសមត្ថកិច្ចបានធ្វើការដកហូតឈើប្រភេទសុក្រំ ៩៣ ដុំ កកោះ ៤៣ ដុំ ធ្នង់ ៥៤០ គីឡូក្រាមពីរោងម៉ាស៊ីនអារឈើ និងកែច្នៃឈើធ្វើគ្រឿងសង្ហារិម ១ កន្លែង ប៉ុន្ដែម្ចាស់រោងសិប្បកម្ម និងកម្មករបានរត់គេចខ្លួនបាត់អស់។ បច្ចុប្បន្នវត្ថុតាងឈើ និងគ្រឿងម៉ាស៊ីនអារឈើមួយចំនួន ត្រូវបានប្រគល់ជូនទៅរដ្ឋបាលព្រៃឈើ ដើម្បីរក្សាទុក។
លោកបញ្ជាក់ថា៖ «កម្លាំងពួកខ្ញុំ គ្រាន់តែទៅសហការអនុវត្តច្បាប់ហើយវត្ថុតាងនានាដែលបានរឹបអូសពីបទល្មើសនេះ ខ្ញុំបានប្រគល់ជូនទៅមន្ត្រីជំនាញរដ្ឋបាលព្រៃឈើអស់ហើយដោយមន្ត្រីជំនាញគេចាត់ចែងយ៉ាងណាទៀត ខ្ញុំអត់ដឹងទេ»។
លោក កែប កត់ នាយករដ្ឋបាលព្រៃឈើខេត្តរតនគិរីបានថ្លែងពីថ្ងៃចន្ទថា លោកមិនទាន់បានទទួលរបាយការណ៍ជុំវិញសំណុំរឿងនេះទេ។ «ប្រហែលជាពួកគាត់កំពុងធ្វើការងារនេះហើយ តែមិនទាន់រាយការណ៍មកខ្ញុំ»។
ករណីស្រដៀងគ្នានេះដែរ កម្លាំងសមត្ថកិច្ចចម្រុះខេត្តស្ទឹងត្រែងបានចុះត្រួតពិនិត្យតាមរោងសិប្បកម្មកែច្នៃឈើចំនួន ២ កន្លែងនៅក្នុងក្រុងស្ទឹងត្រែង ដោយសមត្ថកិច្ចសង្ស័យថា រោងសិប្បកម្មទាំងនោះមិនទាន់មានច្បាប់ត្រឹមត្រូវក្នុងការធ្វើអាជីវកម្ម។
លោក លៀង សេង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងថ្លែងពីម្សិលមិញថា រយៈពេល ២ ថ្ងៃគឺពីថ្ងៃទី ២៨-២៩ ខែមករា ឆ្នាំ ២០២០ កម្លាំងអធិការនគរបាល-ក្រុង កម្លាំងបរិស្ថាន និងជំនាញរដ្ឋបាលព្រៃឈើបានចុះត្រួតពិនិត្យតាមរោងសិប្បកម្មបានចំនួន ២ កន្លែង និងផ្ទះមួយកន្លែងរបស់ឈ្មោះ «ចែពៅ» ដែលជាកន្លែងស្តុកឈើសម្រាប់នាំចេញយកមកលក់ឲ្យរោងសិប្បកម្មផ្សេងៗនៅក្នុងខេត្តស្ទឹងត្រែង ប៉ុន្ដែម្ចាស់បានរត់គេចខ្លួនទាំងអស់។
លោកបានបញ្ជាក់ថា៖ «ឥឡូវនេះ ខ្ញុំមិនទាន់ដឹងពីចំនួនឈើ និងសម្ភារនៅក្នុងរោងសិប្បកម្មកែច្នៃឈើទាំង ២ កន្លែងហ្នឹងទេ ព្រោះមន្ត្រីជំនាញយើងនៅបន្តធ្វើការវាស់វែងនៅឡើយ។ នៅពេលយើងវាស់វែងហើយ គឺយើងសួររកលិខិត ឬអាជ្ញាប័ណ្ណធ្វើអាជីវកម្មហើយប្រសិនបើគាត់អត់មានទេ គឺនឹងបិទអាជីវកម្មហ្នឹងតែម្ដងតែមានហើយ គឺយើងអនុញ្ញាត ហើយនឹងដាក់លក្ខខណ្ឌមួយចំនួនថែមទៀត»។
លោក អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងកាលពីថ្ងៃចន្ទបានបដិសេធធ្វើអត្ថាធិប្បាយជុំវិញករណីនេះ។ ប៉ុន្ដែលោក វ៉ាន់ឌី បានប្រាប់សារព័ត៌មានក្នុងស្រុកមួយថា ក្នុងនាមប្រធានគណៈកម្មាធិការបង្ក្រាបបទល្មើសធនធានធម្មជាតិព្រៃឈើថ្នាក់ខេត្ត លោកនឹងបន្តដឹកនាំកម្លាំងចម្រុះ ចុះត្រួតពិនិត្យជាបន្តបន្ទាប់ទៀតតាមរោងសិប្បកម្មនានាដែលសង្ស័យថា មិនមានច្បាប់អនុញ្ញាត។ ករណីបង្ក្រាបនេះលោកនឹងរកឲ្យឃើញចំពោះមូលហេតុដែលម្ចាស់សិប្បកម្មកែច្នៃឈើទាំងនោះ មិនព្រមទៅធ្វើច្បាប់ឲ្យបានត្រឹមត្រូវ។
លោកបានជំរុញឲ្យជំនាញរដ្ឋបាលព្រៃឈើធ្វើកំណត់ហេតុឲ្យបានច្បាស់លាស់ ដើម្បីបន្តនីតិវិធីទៅកាន់តុលាការ។ លោកបញ្ជាក់ថា ករណីចុះត្រួតពិនិត្យតាមរោងសិប្បកម្មកែច្នៃឈើនេះគឺជាលើកទី ២ ហើយបន្ទាប់ពីយុទ្ធនាការក្តៅលើកទី ១ កាលពីឆ្នាំ ២០១៩ កន្លងទៅ៕
