កំពង់ធំ: សមត្ថកិច្ច មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំបានឃាត់រថយន្តធុនធំ ១ គ្រឿង នៅស្រុកប្រាសាទបល្ល័ង្កកាលពីថ្ងៃទី ២៣ ខែកុម្ភៈ ខណៈព្យាយាមដឹកដំឡូងមីពីខេត្តព្រះវិហារទៅកាន់រាជធានីភ្នំពេញ ហើយត្រូវបានឆែកឆេររកឃើញឈើប្រណីតរាប់រយកំណាត់បង្កប់នៅក្នុងរថយន្តដោយគ្មានច្បាប់អនុញ្ញាត។
លោក ប៉ែន វណ្ណរិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានថ្លែងពីម្សិលមិញថា រថយន្តធុនធំ ១ គ្រឿងនេះ ពាក់ស្លាកលេខ 3A-1359 ត្រូវបានសមត្ថកិច្ចជំនាញចុះបង្ក្រាបបានក្រោយពីសង្ស័យថា មានភាពមិនប្រក្រតីរបស់រថយន្តនោះ ប៉ុន្ដែភ្លាមៗនោះអ្នកបើកបរបានឈប់រថយន្ត ហើយរត់គេចខ្លួនបាត់ដែលសមត្ថកិច្ចកំពុងតែស្វែងរក។
លោកបន្តថា ក្នុងអំឡុងពេលឃាត់រថយន្តនោះសមត្ថកិច្ចរកឃើញឈើរាប់រយកំណាត់ដាក់បង្កប់នៅខាងក្រោមការុងដំឡូងមី។ ពោលគឺ ជនល្មើសបានដឹកដោយដាក់បង្កប់ឈើប្រភេទឈើទាលនៅខាងក្រោមការុងដំឡូងរួចដឹកជញ្ជូនចេញពីខេត្តព្រះវិហារសំដៅទៅភ្នំពេញ។
លោកបញ្ជាក់ថា៖ «រថយន្តដឹកដំឡូងមី និងឈើនេះ យើងបានយកមករក្សាទុកនៅទីស្នាក់ការមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំរួចហើយ ដោយមន្ត្រីជំនាញយើងកំពុងធ្វើការវាស់វែង និងធ្វើកំណត់ហេតុ ដើម្បីកសាងសំណុំរឿងបញ្ជូនទៅតុលាការ ប៉ុន្ដែខ្ញុំមិនទាន់ដឹងពីចំនួនឈើនៅឡើយ។ ប្រសិនម្ចាស់ចូលខ្លួនមកដោះស្រាយតាមច្បាប់ គឺយើងនឹងទទួលដោះស្រាយតាមច្បាប់ស្ដីពីព្រៃឈើតែម្ដង»។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំបានថ្លែងថា សមត្ថកិច្ចបាននិងកំពុងស្រាវជ្រាវរកម្ចាស់ និងអ្នកបើកបររថយន្តនេះ ដើម្បីយកផ្ដន្ទាទោសតាមច្បាប់ដោយពួកគេបានលួចដឹកឈើខុសច្បាប់តាមរយៈការបិទបាំងភ្នែកសមត្ថកិច្ច។ សមត្ថកិច្ចចម្រុះជាច្រើននាក់ដាក់ប៉ុស្ដិ៍ប្រចាំការដែលរង់ចាំការត្រួតពិនិត្យទំនិញខុសច្បាប់ បើកបរលើសល្បឿន និងដឹកជញ្ជូនទំនិញលើសការកំណត់ជាដើម។
លោកបន្តថា សមត្ថកិច្ចបានដាក់ការសង្ស័យទៅលើរថយន្តល្មើសច្បាប់ខាងលើនេះ ដោយសុំធ្វើការឆែកឆេរ ប៉ុន្ដែមុនពេលមកដល់ប៉ុស្ដិ៍សមត្ថកិច្ច អ្នកបើកបររថយន្តបានឈប់រថយន្ត ហើយរត់ចូលព្រៃគេចខ្លួនបាត់ស្រមោល។ ភ្លាមៗនោះសមត្ថកិច្ចបានរកឃើញឈើដែលដាក់បង្កប់ក្រោមដំឡូងមី ប៉ុន្ដែមិនទាន់ដឹងពីចំនួនឈើនៅឡើយទេ។
លោកបញ្ជាក់ថា៖ «យើងអត់ទាន់ដឹងពីចំនួនឈើហ្នឹងនៅឡើយទេ តែឈើនេះប្រភេទឈើទាល គឺឈើត្រូវបានគេអារច្រៀកជាដុំៗដែលមានប្រវែងចន្លោះពី ៣ ទៅ ៥ ម៉ែត្រ។ កន្លងមកយើងធ្លាប់បានជួបប្រទះជាច្រើនករណីហ្នឹងហើយ អ៊ីចឹងរថយន្តដែលមើលទៅមានការសង្ស័យ គឺយើងសុំគាត់ឆែកឆេរតែម្ដង បើឃើញល្មើសច្បាប់យើងឃាត់ តែបើគ្មានបញ្ហាអ្វីទេ គឺអនុញ្ញាតឲ្យគាត់បន្តដំណើរទៀត»។ លោក ផល ធឿន អធិការនគរបាលស្រុកប្រាសាទបល្ល័ង្ក ខេត្តកំពង់ធំបានថ្លែងពីម្សិលមិញថា លោកមិនទាន់បានទទួលរបាយការណ៍ពីមន្ត្រីជំនាញរបស់លោកនៅឡើយទេ៕