.jpg)
សមត្ថកិច្ចកំពុងឆែកឃ្លាំងផលិតបារីក្លែងក្លាយ។ រូបថត នគរបាល
ភ្នំពេញ: គណៈកម្មាធិការប្រយុទ្ធប្រឆាំងផលិតផលក្លែងក្លាយរបស់ក្រសួងមហាផ្ទៃ និងសមត្ថកិច្ចមូលដ្ឋានបានបង្ក្រាបសិប្បកម្មផលិតបារី និងសិប្បកម្មផលិតនំប៉័ងចំនួន ២ កន្លែងផ្សេងគ្នារបស់ជនជាតិចិនក្នុងខណ្ឌសែនសុខ និងខណ្ឌពោធិ៍សែនជ័យ រាជធានីភ្នំពេញដោយដកហូតវត្ថុតាងសរុបជិត ៥០ តោន ដែលជាផលិតផលក្លែងក្លាយខុសច្បាប់។
លោក ញាណ នន នាយប៉ុស្ដិ៍នគរបាលរដ្ឋបាលឃ្មួញបានថ្លែងពីម្សិលមិញថា សមត្ថកិច្ចចម្រុះបានចុះទៅឆែកឆេរត្រួតពិនិត្យជាក់ស្តែងសិប្បកម្មផលិត និងចែកចាយបារីមួយកន្លែងកាលពីថ្ងៃទី ៧ ខែតុលា ដោយសង្ស័យផលិតបារីក្លែងក្លាយខុសច្បាប់នៅភូមិឃ្មួញ សង្កាត់ឃ្មួញ ខណ្ឌសែនសុខ។
លោកបន្តថា ប្រតិបត្តិការនេះសមត្ថកិច្ចបានរកឃើញវត្ថុតាងផលិតផលវត្ថុធាតុដើមសម្រាប់ផលិតបារីចំនួន ១១ ប្រភេទសរុបចំនួន ១ ០៤៨ កេស មានទម្ងន់ប្រហែល ២៥ តោន។ ក្នុងនោះរួមទាំងរកឃើញវត្ថុតាងម៉ាស៊ីន និងឧបករណ៍សម្រាប់ផលិតបារីមួយចំនួនទៀត។
លោកបញ្ជាក់ថា៖ «ករណីនេះ មន្ត្រីជំនាញគាត់បានប្រមូលវត្ថុតាងមួយចំនួនទៅទុកនៅស្នាក់ការគណៈកម្មាធិការប្រយុទ្ធប្រឆាំងផលិតផលក្លែងក្លាយ ដើម្បីពិនិត្យ និងពិសោធន៍។ រីឯនៅកន្លែងកើតហេតុហ្នឹង សមត្ថកិច្ចឃាត់ខ្លួនកម្មករជនជាតិចិនម្នាក់ទៅសាកសួរ ប៉ុន្ដែខ្ញុំមិនទាន់ដឹងពីនីតិវិធីបន្តទៀតបែបណាទេ ព្រោះខ្ញុំមិនបានកាន់សំណុំរឿងនេះ»។
លោក ហួរ ម៉េងវ៉ាង អធិការនគរបាលខណ្ឌសែនសុខពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកមិនអាចទាក់ទងបាន។
ដោយឡែកគណៈកម្មាធិការប្រយុទ្ធប្រឆាំងផលិតផលក្លែងក្លាយរបស់ក្រសួងមហាផ្ទៃ និងកម្លាំងសមត្ថកិច្ចចម្រុះកាលពីថ្ងៃទី ៦ ខែតុលា ក៏បានត្រួតពិនិត្យសិប្បកម្មផលិតនំបុ័ងមួយកន្លែងនៅភូមិព្រៃសាលា សង្កាត់កាកាបទី ២ ខណ្ឌពោធិ៍សែនជ័យដោយសមត្ថកិច្ចបានរកឃើញវត្ថុតាងឧបករណ៍សម្ភារ និងវត្ថុធាតុដើមបម្រើឱ្យការងារផលិតនំបុ័ងសរុបចំនួន ១៦ ប្រភេទស្មើនឹងទម្ងន់ជាង ២២ តោន។
មន្ត្រីនគរបាលខណ្ឌពោធិ៍សែនជ័យម្នាក់សុំមិនបញ្ចេញឈ្មោះបានឱ្យដឹងពីម្សិលមិញថា ក្រោយពីត្រួតពិនិត្យ សមត្ថកិច្ចរកឃើញថា សិប្បកម្មផលិតនំបុ័ងនេះ ធ្វើអាជីវកម្មមិនត្រឹមត្រូវតាមច្បាប់ គឺគ្មានស្លាកយីហោ គ្មានការប្រកាសបង្កើតរោងសិប្បកម្ម,ផលិតផល មិនទាន់យកទៅចុះបញ្ជី, វិញ្ញាបនបត្រវិភាគគុណភាពហួសសុពលភាព, នៅលើសម្បកវេចខ្ចប់ក្លែងអាសយដ្ឋាន, គ្មានវិញ្ញាបនបត្រចុះបញ្ជីម៉ាកផលិតផល និងគ្មានវិញ្ញាបនបត្រដំណើរការសិប្បកម្មស្របច្បាប់។
លោកបញ្ជាក់ថា៖ «ពេលយើងចុះបង្ក្រាបហ្នឹង អត់ឃើញម្ចាស់នៅកន្លែងហ្នឹងទេ ប៉ុន្ដែយើងបានបិទហាងបណ្ដោះអាសន្នសិន ហើយនឹងប្រមូលវត្ថុតាងមួយចំនួនមកពិនិត្យ។ នីតិវិធីច្បាប់បន្តទៀតគឺនៅលើគណៈកម្មាធិការប្រយុទ្ធប្រឆាំងផលិតផលក្លែងក្លាយ ជាអ្នកចាត់ចែង ខ្ញុំអត់ដឹងដែរ»។
លោក ម៉ន វុធី អធិការនគរបាលខណ្ឌពោធិ៍សែនជ័យបានថ្លែងពីម្សិលមិញថា កម្លាំងជំនាញនៃអធិការដ្ឋាននគរបាលខណ្ឌពោធិ៍សែនជ័យបានចុះសហការជាមួយមន្ត្រីគណៈកម្មាធិការប្រយុទ្ធប្រឆាំងផលិតផលក្លែងក្លាយដែរ ប៉ុន្ដែក្រុមការងារលោកមិនបានចាត់ចែងរបាយការណ៍ ឬកាន់សំណុំរឿងនេះទេ។
លោកបញ្ជាក់ថា៖ «របាយការណ៍ដែលទាក់ទងសំណុំរឿងនេះគឺយើងមិនបានកាន់ទេ អ៊ីចឹងមិនអាចប្រាប់ពីព័ត៌មាននេះបានទេ។ សួរទៅកម្លាំងជំនាញគណៈកម្មាធិការប្រយុទ្ធប្រឆាំងផលិតផលក្លែងក្លាយរបស់ក្រសួងមហាផ្ទៃ ព្រោះគាត់ចាត់ចែងសំណុំរឿងហ្នឹង»។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយពីម្សិលមិញមិនទាន់អាចទាក់ទងសុំការបញ្ជាក់បន្ថែមជុំវិញករណីនេះបានទេ។
លោក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃបានថ្លែងពីម្សិលមិញថា លោកមិនទាន់បានទទួលព័ត៌មាននេះទេ។ ដូច្នេះលោកមិនអាចបញ្ជាក់ពីនីតិវិធីច្បាប់បែបណាដែរ។
ចំណែកលោក ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃបានថ្លែងពីម្សិលមិញថា លោកក៏មិនបានដឹងពីប្រតិបត្តិការនេះដែរ។
លោក ឡី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមអ្នកលក់ឱសថកម្ពុជាបានថ្លែងពីម្សិលមិញថា៖ «ខ្ញុំក៏សូមជំរុញឱ្យផលិតករ ឬសិប្បករទាំងអស់ត្រូវតែបែរមកមើលច្បាប់ ហើយគោរពអនុវត្តតាមទាំងអស់គ្នា បើយើងទាំងអស់គ្នាមិនអនុវត្តទេ គឺវាប៉ះពាល់ដល់សង្គមជាតិយើងធ្ងន់ធ្ងរណាស់។ យើងត្រូវគោរពច្បាប់ ដើម្បីប្រយុទ្ធប្រឆាំងផលិតផលក្លែងក្លាយទាំងអស់គ្នា»៕
វីដេអូ៖
