.jpg)
សមត្ថកិច្ចពេលចុះបង្ក្រាបទីតាំងគ្រឿងសម្អាងក្លែងក្លាយ និងសម្ភារបរិក្ខារពេទ្យគ្មានច្បាប់អនុញ្ញាតនៅខណ្ឌច្បារអំពៅ។ រូបនគរបាលប្រឆាំងបទល្មើសសេដ្ឋកិច្ច
ភ្នំពេញៈ ផលិតផលគ្រឿងសម្អាង និងសម្ភារបរិក្ខារពេទ្យគ្មានច្បាប់អនុញ្ញាត សរុបជាង ៥ តោន ត្រូវបានកម្លាំងនគរបាលជំនាញ ដកហូតជាបណ្ដោះអាសន្ននៅទីតាំងឃ្លាំងស្តុកទំនិញមួយកន្លែងស្ថិតនៅក្នុងសង្កាត់និរោធ ខណ្ឌច្បារអំពៅ ខណៈដែលថៅកែលក់ឡេល្បីឈ្មោះម្នាក់បានរត់គេចខ្លួនពីការតាមចាប់របស់សមត្ថកិច្ច។
លោក ម៉ាត់ យូសុះ ប្រធានការិយាល័យប្រឆាំងបទល្មើសកម្មសិទ្ធិបញ្ញានៃនាយកដ្ឋានប្រឆាំងបទល្មើសសេដ្ឋកិច្ចបានប្រាប់ ភ្នំពេញ ប៉ុស្តិ៍ ពីម្សិលមិញថា ការស្រាវជ្រាវ និងបង្ក្រាបទីតាំងស្តុកផលិតផលគ្រឿងសម្អាង និងសម្ភារបរិក្ខារពេទ្យគ្មានច្បាប់អនុញ្ញាតខាងលើនេះបានធ្វើឡើងតាំងពីរសៀលថ្ងៃទី ២៥ ខែ មករា ឆ្នាំ ២០២១ ក្រោមកិច្ចសហការចូលរួមពីតំណាងអយ្យការអមសាលាដំបូងរាជធានីភ្នំពេញ ក្រសួងសុខាភិបាល អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ ព្រមទាំងអាជ្ញាធរមូលដ្ឋានផងដែរ។
លោក យូសុះ ថ្លែងថា ក្នុងប្រតិបត្តិការនោះកម្លាំងសមត្ថកិច្ចបានរកឃើញ និងរឹបអូសនូវផលិតផលគ្រឿងសម្អាង និងសម្ភារបរិក្ខារពេទ្យគ្មានច្បាប់អនុញ្ញាត សរុបជាង ៥ តោន ក្នុងនោះរួមមាន សាប៊ូចម្រុះម៉ាកចំនួន ១២៤ កេសស្មើនឹង ២ ៧៨៩ គីឡូក្រាម ទឹកលាងក្រចកចំនួន ៥៥ កេស ស្មើនឹង ១ ៥៧៥ គីឡូក្រាម ម៉ាស់ Medical Face Mask ចំនួន ១ ៨០០ ប្រអប់ស្មើ ៩៥០ គីឡូក្រាម និងម្ជុលជ័រចាក់សេរ៉ូម (IV Cannula) ចំនួន ១០០០។
លោកបញ្ជាក់ថា៖ «មកទល់ពេលនេះ យើងនៅមិនទាន់ប្រាកដ ១០០ ភាគរយថា ទំនិញទាំងនេះជាទំនិញក្លែងក្លាយឬយ៉ាងណានោះទេ ប៉ុន្តែអ្វីដែលយើងរកឃើញពិតប្រាកដនោះ គឺគ្រប់ប្រភេទនៃទំនិញទាំងនេះ គ្មានចុះបញ្ជិកាទទួលស្គាល់ពីក្រសួងសុខាភិបាលនោះទេ។ ចំណែកម្ចាស់ទំនិញ ឬម្ចាស់ឃ្លាំងក៏នៅមិនទាន់ចូលខ្លួនដោះស្រាយដែរ»។
វត្ថុតាងដែលត្រូវបានរឹបអូសទាំងនោះត្រូវបានចាក់ឃ្លុំបេរក្សាទុកជាបណ្ដោះអាសន្ននៅក្នុងឃ្លាំងស្តុកទំនិញខាងលើនោះ ហើយឃ្លាំងនោះក៏ត្រូវបានចាក់សោរបិទទ្វារជាបណ្ដោះអាសន្នផងដែរ ដើម្បីឱ្យម្ចាស់ទំនិញ ចូលខ្លួនមកដោះស្រាយតាមផ្លូវច្បាប់។ ទោះជាបែបណាលោក យូសុះ មិនបានប្រាប់ឱ្យដឹងអំពីអត្តសញ្ញាណរបស់ម្ចាស់ទំនិញទាំងនោះទេ។
សមត្ថកិច្ចកំពុងត្រួតពិនិត្យគ្រឿងសម្អាង និងបរិក្ខារពេទ្យដែលគេស្តុកទុកក្នុងឃ្លាំង។ រូបថត នគរបាលសេដ្ឋកិច្ច
១ ថ្ងៃក្រោយពីមានការបង្ក្រាបទីតាំងខាងលើនេះកម្លាំងសមត្ថកិច្ចបានចុះទៅឡោមព័ទ្ធទីតាំងផ្ទះរបស់ឧកញ៉ាល្បីខាងលក់ ឡេ អ៊ាន សៀវម៉ី ដែលស្ថិតនៅក្នុងបុរីមូនថោនក្នុងភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យបង្កឱ្យមានការភ្ញាក់ផ្អើល។
ប៉ុន្តែ សៀវម៉ី បានគេចខ្លួនបាត់ទៅហើយ។ នេះបើតាមមន្ត្រីនគរបាលម្នាក់ដែលចូលរួមនៅក្នុងប្រតិបត្តិការនេះដែលបានប្រាប់ភ្នំពេញប៉ុស្តិ៍ក្នុងលក្ខខណ្ឌមិនបញ្ចេញឈ្មោះ។
មន្ត្រីរូបនោះនិយាយថា៖ «ខ្ញុំមិនដឹងថា គាត់មានពាក់ព័ន្ធករណីនាំចូលផលិតផលគ្រឿងសម្អាង និងសម្ភារបរិក្ខារពេទ្យគ្មានការអនុញ្ញាតនៅក្នុងខណ្ឌច្បារអំពៅ ឬអត់ទេ។ ប៉ុន្តែ សៀវម៉ី មានរឿងជាច្រើនពាក់ព័ន្ធករណីបរិហារកេរ្តិ៍ ទៅលើជំទាវដ៏មានឥទ្ធិពល ២ រូបហើយគាត់ត្រូវបានជំទាវទាំង ២ រូបនោះ ដាក់ពាក្យប្ដឹងទៅកាន់នគរបាលក្រសួងមហាផ្ទៃ»។
យ៉ាងណាក៏ដោយ មន្ត្រីរូបនោះមិនបានប្រាប់ឱ្យដឹងអំពីអត្តសញ្ញាណរបស់ជំទាវទាំង ២ រូបនោះទេ។
ចំណែកលោក ផាន អូន អគ្គនាយកនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំថ្លែងថា សំណុំរឿងបង្ក្រាបទីតាំងស្តុកផលិតផលគ្រឿងសម្អាង និងសម្ភារបរិក្ខារពេទ្យគ្មានច្បាប់អនុញ្ញាត ដែលមានទីតាំងស្ថិតនៅសង្កាត់និរោធ ខណ្ឌច្បារអំពៅនោះកំពុងស្ថិតក្រោមនីតិវិធីស៊ើបអង្កេតបន្តរបស់សមត្ថកិច្ចដែលលោកមិនអាចអធិប្បាយឱ្យបានពិស្ដារនោះទេ។
លោកបញ្ជាក់ថា៖ «បើជាផលិតផលដែលនាំចូលត្រឹមត្រូវតាមផ្លូវច្បាប់ និងមានការទទួលស្គាល់ពីក្រសួងសុខាភិបាលនោះ សមត្ថកិច្ចមិនចុះបង្ក្រាបចាប់នោះទេ»។
ជាមួយគ្នានេះលោកបានអំពាវនាវដល់ពាណិជ្ជករអាជីវករលក់ដុំ និងលក់រាយនូវផលិតផលគ្រឿងសម្អាង និង សម្ភារបរិក្ខារពេទ្យទាំងអស់ ពិសេសអ្នកប្រកាសលក់តាមប្រព័ន្ធអនឡាញសូមកុំក្លែងបន្លំប្រភពនៃទំនិញ ហើយបោកប្រាស់ប្រជាពលរដ្ឋ ដើម្បីចំណេញមានបានផ្ទាល់ខ្លួន ធ្វើឱ្យប៉ះពាល់ដល់សុខភាពអ្នកដទៃ។
លោកបានថ្លែងថា៖ «ដើម្បីក្លាយជាពាណិជ្ជករ អាជីវករ និងពលរដ្ឋល្អត្រូវហានទទួលស្គាល់នូវប្រភពទំនិញរបស់ខ្លួន និងមិនត្រូវក្លែងបន្លំចំពោះប្រភពទំនិញដែលមានកម្មសិទ្ធិបញ្ញារបស់គេដែលនាំឱ្យមានបញ្ហាប្រឈមចំពោះផ្លូវច្បាប់នោះឡើយ»។
បើតាមលោក ផាន អូន ការនាំចូលនូវផលិតផលគ្រឿងសម្អាងអាហារបំប៉ន និងសម្ភារបរិក្ខារពេទ្យចាំបាច់ត្រូវមានការត្រួតពិនិត្យ និងចុះបញ្ជិកាទទួលស្គាល់ពីក្រសួងសុខាភិបាលជាមុន។
លោកលើកឡើងទៀតថាចំណែកអ្នកប្រើប្រាស់ មិនត្រូវជឿទៅលើការឃោសនាកុហកបោកប្រាស់របស់អាជីវករទុច្ចរឹតតាមប្រព័ន្ធអនឡាញនោះឡើយ ព្រោះការជាវផលិតផលគ្រឿងសម្អាង អាហារបំប៉ន និងសម្ភារបរិក្ខារពេទ្យ ដែលគ្មានប្រភពច្បាស់លាស់ ឬ គ្មានការទទួលស្គាល់ពីក្រសួងសុខាភិបាល វានឹងធ្វើឱ្យប៉ះពាល់ដល់សុខភាព និងខាតបង់ថវិការបស់អ្នកប្រើប្រាស់ឥតប្រយោជន៍៕
វីដេអូ៖
