.jpg)
មន្ត្រីជំនាញ CMAC បន្សាបគ្រាប់ដែលទម្លាក់ពីលើយន្តហោះនៅខេត្តកណ្ដាល។ រូបថត CMAC
ព្រះវិហារ/កណ្ដាល: គ្រាប់យុទ្ធភណ្ឌមិនទាន់ផ្ទុះចំនួន ១៧ គ្រាប់ ដែលនៅមានគុណភាពត្រូវបានសមត្ថកិច្ចនគរបាលស្រុកត្បែងមានជ័យ និងមន្ត្រីអង្គការដោះមីនកម្ពុជាចុះទៅដោះចេញពីដីចម្ការពលរដ្ឋនៅភូមិមហាផលធំ ឃុំឈានមុខ ស្រុកត្បែងមានជ័យ ខេត្តព្រះវិហារ ខណៈនៅខេត្តកណ្ដាលមន្ត្រី CMAC ក៏បានបន្សាបគ្រាប់បែក ១ គ្រាប់ ដែលបានទម្លាក់ពីយន្តហោះទម្ងន់ ២៣០ គីឡូផងដែរ។
លោក ប៉ៃ ជិន អធិការរងនគរបាលស្រុកត្បែងមានជ័យបានឲ្យដឹងពីម្សិលមិញថា កាលពីថ្ងៃទី ៥ ខែមេសា ថ្មីៗនេះ កម្លាំងជំនាញនៃអធិការដ្ឋាននគរបាលស្រុកត្បែងមានជ័យ និងមន្ត្រីប៉ុស្តិ៍រដ្ឋបាលឃុំឈានមុខសហការជាមួយក្រុមជំនាញនៃអង្គការដោះមីនកម្ពុជាបានចុះទៅដោះគ្រាប់យុទ្ធភណ្ឌមិនទាន់ផ្ទុះចេញពីដីចម្ការរបស់ពលរដ្ឋនៅទីតាំងខាងលើនេះបានចំនួន ១៧ គ្រាប់។
លោកបន្តថាក្នុងពេលបំពេញការងារនោះ ក្រុមមន្ត្រីបានពិនិត្យ និងប្រមូលយកគ្រាប់បាន ១៧ គ្រាប់ដែលក្នុងនោះមានគ្រាប់ផ្លោងប្រភេទ ៣៧ មិល្លីម៉ែត្រ ចំនួន ១៥ គ្រាប់ ក្បាលគ្រាប់ប្រភេទ ៦០ មិល្លីម៉ែត្រ ចំនួន ១ គ្រាប់ និងប្រភេទគ្រាប់បេ ៤០ ចំនួន ១ គ្រាប់ ដែលគ្រាប់ទាំងនោះសុទ្ធតែនៅមានគុណភាព។
លោក ប៉ៃ ជិន បានបញ្ជាក់ថា៖ «ក្រោយពីទទួលដំណឹងពីពលរដ្ឋជាម្ចាស់ចម្ការ ពួកខ្ញុំបានចុះទៅពិនិត្យផ្ទាល់ ហើយបានផ្សព្វផ្សាយប្រាប់ពលរដ្ឋនៅតំបន់នោះកុំឲ្យនាំគ្នាមកជិតទីតាំងមានគ្រាប់មិនទាន់ផ្ទុះនេះ ព្រោះខ្លាចគ្រោះថ្នាក់ដល់គាត់។
បន្ទាប់មកយើងបានរាយការណ៍ទៅអង្គការជំនាញខាងដោះមីនមកជួយដោះគ្រាប់នោះចេញ ប៉ុន្ដែមិនបង្កឲ្យខូចខាតសម្ភារ ឬគ្រោះថ្នាក់ដល់មនុស្សទេ»។
លោកបន្ថែមថា កន្លងមកនៅមូលដ្ឋានស្រុកត្បែងមានជ័យនេះមិនទាន់មានជនរងគ្រោះដោយសារគ្រាប់យុទ្ធភណ្ឌមិនទាន់ផ្ទុះទេ ប៉ុន្ដែអាជ្ញាធរធ្លាប់រកឃើញគ្រាប់ដែលបន្សល់ទុកពីសម័យសង្គ្រាមជាច្រើនគ្រាប់រួចមកហើយ។ ដូច្នេះអាជ្ញាធរនៅតែបន្ដផ្សព្វផ្សាយពីផលប៉ះពាល់របស់វាដោយតម្រូវឲ្យពលរដ្ឋប្រញាប់រាយការណ៍ទៅមន្ត្រីអាជ្ញាធរភ្លាម ប្រសិនបើបានជួបប្រទះគ្រាប់មិនទាន់ផ្ទុះទាំងនោះ។
លោក ស៊ិន កុសល ប្រធានក្រុមកម្ទេចគ្រឿងយុទ្ធភណ្ឌមិនទាន់ផ្ទុះនៃអង្គការដោះមីនកម្ពុជាប្រចាំការនៅខេត្តព្រះវិហារខេត្តស្ទឹងត្រែង ខេត្តក្រចេះ និងខេត្តបាត់ដំបងបានថ្លែងពីម្សិលមិញថា ក្រោយពីទទួលព័ត៌មានពីសមត្ថកិច្ចភ្លាមលោក និងក្រុមការងារ ៣ នាក់ផ្សេងទៀតចុះទៅដល់ទីតាំងនោះ និងបានបោះស្លាកសញ្ញាសម្គាល់មុនពេលដោះគ្រាប់ចេញពីក្នុងដី។
លោកបន្តថា គ្រាប់យុទ្ធភណ្ឌទាំងនេះសុទ្ធតែនៅមានគុណភាព ហើយប្រសិនមានគេយកវាទៅដំ ឬដុតនោះ វានឹងផ្ទុះជាក់ជាមិនខាន។ លោករំឭកឲ្យក្រុមការងារធ្វើការដោយប្រុងប្រយ័ត្ន និងវេចខ្ចប់តាមក្បួនខ្នាតដោយដឹកជញ្ជូនមកដាក់បន្សាបនៅទីស្នាក់ការរបស់អង្គការដោះមីនកម្ពុជានៅទីរួមខេត្តព្រះវិហារ។
លោក កុសល បញ្ជាក់ថា៖ «ក្រុមការងារពួកខ្ញុំប្រចាំការតែ ៤ ខេត្តទេ គឺខេត្តព្រះវិហារ ខេត្តស្ទឹងត្រែង ខេត្តក្រចេះ និងខេត្តបាត់ដំបង ហើយធ្វើការតាមតែទទួលព័ត៌មានពីអាជ្ញាធរ និងពលរដ្ឋរាយការណ៍ជូនប៉ុណ្ណោះ ព្រោះកម្លាំងជំនាញយើងតិច។ ក្រុមការងារខ្ញុំធ្លាប់ជួយរំដោះគ្រាប់យុទ្ធភណ្ឌមិនទាន់ផ្ទុះច្រើនករណីហើយនៅឆ្នាំ ២០២០ នេះ ហើយថែមទាំងមានករណីផ្ទុះស្លាប់ និងរបួសទៀតផង តែខ្ញុំមិនចាំចំនួនច្បាស់ទេ»។
លោក ហង់ នាត នាយប៉ុស្ដិ៍នគរបាលរដ្ឋបាលឃុំឈានមុខមិនអាចសុំការបញ្ជាក់បន្ថែមជុំវិញករណីនេះបានទេកាលពីម្សិលមិញ ដោយទូរស័ព្ទលោកមិនអាចទាក់ទងបាន។
ទោះយ៉ាងណាលោក ស៊ិន កុសល បានសាកសួរម្ចាស់ចម្ការ (មិនបញ្ចេញអត្តសញ្ញាណ) បានឆ្លើយថា លោក និងភរិយាបានបើកត្រាក់ទ័រទៅភ្ជួរដីចម្ការខាងក្រោយភូមិប្រមាណជា ២ គីឡូម៉ែត្រ។ លុះភ្ជួរបាន ១ ជុំក៏ប៉ះចំគ្រាប់នោះ តែពីដំបូងស្មានថាជាគល់ឈើ លុះចុះទៅពិនិត្យក៏ឃើញគ្រាប់ផ្លោង ១ គ្រាប់ ហើយបានរាយការណ៍ទៅអាជ្ញាធរជាបន្ទាន់។ បន្ទាប់មកអាជ្ញាធរបានហៅអ្នកជំនាញមកជួយដោះគ្រាប់នោះក៏ស្រាប់តែប្រទះឃើញនៅខាងក្រោមដីថែមទៀតដែលសរុបមានរហូតដល់ ១៧ គ្រាប់។
ករណីដោយឡែកមួយទៀតកាលពីម្សិលមិញមន្ត្រីនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានដោះបន្សាបគ្រាប់បែកទម្លាក់ពីយន្តហោះប្រភេទ MK82 ទម្ងន់ ២៣០ គីឡូក្រាម ១ គ្រាប់ ប្រកបដោយសុវត្ថិភាពនៅក្នុងភូមិស្លែងមានជ័យ ឃុំឈ្វាំង ស្រុកពញាឮ ខេត្តកណ្តាល។ នេះបើតាមទំព័រហ្វេសប៊ុកលោក ហេង រតនា នាយក CMAC កាលពីម្សិលមិញ។
លោក ហេង រតនា បានកោតសរសើរមន្ត្រីជំនាញចំពោះការប្រើប្រាស់អាវក្រោះ និងមួកសុវត្ថិភាពការពារខ្លួនពីគ្រាប់រំសេវជាមួយនឹងការប្រើប្រាស់ម៉ាស់ និងក្រមាខែ្មការពារអាមេរោគចង្រៃកូវីដ ១៩។
លោកថា៖ «ជំងឺកូវីដ ១៩ ពិតជាគំរាមកំហែងយើងមែន ប៉ុន្តែយើងមិនចុះញ៉មឈប់ធ្វើកិច្ចប្រតិបតិ្តការរបស់យើងដោយសារការគំរាមរបស់វាទេ យើងបន្តកិច្ចការយើងជាធម្មតាសម្រាប់សេចក្តីសុខ និងសុវត្ថិភាពសង្គមជាតិ»៕
