.jpg)
វត្ថុតាងកាំភ្លើងខ្លីដែលសមត្ថកិច្ចឆែកឃើញនៅលើជនជាតិចិនម្នាក់។ រូបថត នគរបាល
ព្រះសីហនុៈ មន្ត្រីនគរបាលខេត្តព្រះសីហនុបានសម្រេចដោះលែងជនជាតិចិនប្រុស-ស្រី ៥ នាក់ ក្នុងចំណោម ៦ នាក់ កាលពីម្សិលមិញ ក្រោយពីឃាត់ខ្លួនកាលពីថ្ងៃទី ៦ ខែតុលា ពេលកំពុងដាក់កម្លាំងត្រួតពិនិត្យអាវុធជាតិផ្ទះនៅលើដងផ្លូវ ក្នុងសង្កាត់ ២ ខេត្តព្រះសីហនុ។
លោក តី វិសាល អធិការនគរបាលក្រុងព្រះសីហនុប្រាប់ពីម្សិលមិញថា ការដោះលែងមនុស្សទាំង ៥ នាក់នោះ គឺធ្វើឡើងក្រោយពីការសាកសួររបស់សមត្ថកិច្ច ដោយបញ្ជាក់ថា ពួកគេមិនបានជាប់ពាក់ព័ន្ធនឹងបទល្មើសច្បាប់នោះទេ។ មានតែបុរសអាយុ ៣១ ឆ្នាំម្នាក់ប៉ុណ្ណោះ ដែលឃាត់ខ្លួនព្រោះមានបទល្មើស ដោយគេមានកាំភ្លើងជាប់ខ្លួនសម្រាប់ប្រើប្រាស់ដោយគ្មានច្បាប់អនុញាត្តិ។
លោក វិសាល ថ្លែងថា៖ «ចំពោះបុរសសង្ស័យម្នាក់នោះសមត្ថកិច្ចរបស់ខ្ញុំកំពុងបន្តសាកសួរ ដើម្បីធ្វើរបាយការណ៍បញ្ជូនបន្តទៅស្នងការដ្ឋានខេត្តទៀត។ គាត់ជាប់ពាក់ព័ន្ធនឹងការប្រើអាវុធខុសច្បាប់»។
លោកបានឲ្យដឹងថា កាលពីយប់ថ្ងៃទី ៦ តុលា មន្ត្រីជំនាញបានដាក់កម្លាំងនៅតាមគោលដៅក្នុងការត្រួតពិនិត្យអាវុធជាតិផ្ទុះនៅក្បែរផ្សារពាណិជ្ជកម្មក្នុងសង្កាត់ ២ ក្រុងព្រះសីហនុ។ នៅពេលនោះសមត្ថកិច្ចបានហៅរថយន្ត ១ គ្រឿង ម៉ាកអាល់ផាត ពណ៌ខ្មៅ ពាក់ស្លាកលេខ ភ្នំពេញ 2BE-0032 ឲ្យឈប់ដើម្បីធ្វើការត្រួតពិនិត្យឃើញមានមនុស្សប្រុស-ស្រី ជាជនជាតិចិនចំនួន ៦ នាក់ជិះក្នុងរថយន្ត។
ក្នុងរថយន្តសមត្ថកិច្ចឆែកឃើញមានកាំភ្លើងខ្លី ១ ដើម ម៉ាក G-Lock 19 Gen5 មាន បង់កាំភ្លើងចំនួន ២ និងគ្រាប់ចំនួន ៣០ គ្រាប់។ បុរសជាប់សង្ស័យម្នាក់ដែលជាម្ចាស់កាំភ្លើងបាននិយាយប្រាប់សមត្ថកិច្ចថា ពួកគេជាភ្ញៀវទេសចរហើយទើបមកលេងខេត្តព្រះសីហនុមិនដល់ ១ ខែផងទេ រីឯកាំភ្លើងដែលនៅក្នុងរថយន្តនោះ គឺរូបគេបានទិញពីមនុស្សម្នាក់ ដើម្បីទុកការពារខ្លួនតែប៉ុណ្ណោះ។ ប៉ុន្តែគ្មានបំណងឬរៀបចំគម្រោងដើម្បីប្រព្រឹត្តបទល្មើសណាមួយទេ។
ពាក់ព័ន្ធបញ្ហាសន្តិសុខសណ្តាប់ធ្នាប់នៅខេត្តព្រះសីហនុនេះ ត្រូវបានលោកស្រី ជៀប សុធាវី មន្រ្តីសម្របសម្រួលនៃសមាគមន៍ការពារសិទ្ធិមនុស្សអាដហុកប្រចាំខេត្តព្រះសីហនុថ្លែងថា ខេត្តមួយនេះមានមនុស្សធ្វើបន្លាស់ទីច្រើន ទាំងអ្នកមកធ្វើការនិងជនទេសចរបរទេស។ ដូច្នេះបទល្មើសតែងតែកើតមានឡើងដូចជាបទល្មើសគ្រឿងញៀន បទល្មើសវាយតប់គ្នា៕
