.jpg)
បុរស ២ នាក់ ត្រូវបានសមត្ថកិច្ចនគរបាលស្រុកស្អាងដោះលែងពីថ្ងៃទី ២១ មេសា បន្ទាប់ពីឃាត់ខ្លួនបានប៉ុន្មានម៉ោងករណីលួចដាំកញ្ជាជាង ១០០ ដើម។ រូបថត នគរបាល
កណ្ដាល/តាកែវៈ បុរស ២ នាក់ត្រូវបានសមត្ថកិច្ចនគរបាលស្រុកស្អាងដោះលែងពីថ្ងៃទី ២១ មេសា បន្ទាប់ពីឃាត់ខ្លួនបានប៉ុន្មានម៉ោងករណីលួចដាំកញ្ជាជាង ១០០ ដើមនៅភូមិពោធិ៍ ឃុំត្រើយស្លា ស្រុកស្អាង ខេត្តកណ្តាល ស្របពេលកញ្ជាជាង ៤ ពាន់ដើមនៅខេត្តតាកែវទើបត្រូវបានកាប់ដុតចោលពីថ្ងៃ ១៨ មេសា។
លោក រស់ ចន្ថា អធិការនគរបាលស្រុកស្អាងឲ្យដឹងពីម្សិលមិញថា បុរសឈ្មោះ ហេង ហុកសេង អាយុ ៦០ ឆ្នាំ និងឈ្មោះ ឌឿ ឡេង អាយុ ៥៤ ឆ្នាំ រស់នៅក្នុងភូមិពោធិ៍ក្រោម ឃុំត្រើយស្លា ស្រុកស្អាង ដែលសមត្ថកិច្ចឃាត់ខ្លួនរឿងដាំកញ្ឆានោះត្រូវបានដោះលែងវិញហើយដោយសារពួកគាត់ទើបដាំលើកដំបូង។
លោកថា៖ «បញ្ហានេះខាងថ្នាក់លើរបស់ខ្ញុំបញ្ជាមកខ្ញុំឲ្យដោះលែងពួកគាត់វិញ ព្រោះពួកគាត់ប្រព្រឹត្តលើកទី ១ ប៉ុន្តែយើងអប់រំពួកគាត់ឲ្យឈប់ប្រព្រឹត្ត»។
លោក នៅ ប៊ុនណា អធិការរងស្រុកទទួលផែនប្រឆាំងគ្រឿងញៀនបានប្រាប់កាលពីម្សិលមិញថា ដំណាំកញ្ជាដែលសមត្ថកិច្ចរបស់លោកចុះទៅកាប់បំផ្លាញចោលនោះមាន ១១៥ ដើមដែលបុរសទាំង ២ នាក់លួចបន្លំដាំនៅចន្លោះដើមត្រាវ។
លោកបានបន្តថា មុនឃាត់ខ្លួនបុរសទាំង ២ នាក់នោះគឺកាលពីវេលាថ្ងៃត្រង់ថ្ងៃទី ២១ មេសាមានពលរដ្ឋបានមករាយការណ៍ពីករណីនេះឲ្យនគរបាលប៉ុស្ដិ៍ឃុំត្រើយសា្លបានដឹង។ ភ្លាមៗនោះនគរបាលប៉ុស្តិ៍បានរាយការណ៍បន្តមកលោកទើបមានការចុះទៅពិនិត្យក៏ឃើញដូចអ្វីពលរដ្ឋបានរាយការណ៍មែន។
លោក ប៊ុនណា បន្តថាពេលឃើញដាំដើមកញ្ជាជាក់ស្តែង សមត្ថកិច្ចលោកបានចាត់កម្លាំង ៥ ទៅ ៦ នាក់ឲ្យទៅកាប់ដើមកញ្ឆានោះ ដែលមានសរុប ១១៥ ដើម និងបានឃាត់ខ្លួនបុរស ២ នាក់ខាងលើ ខណៈពួកគាត់កំពុងនៅក្នុងចម្ការដំណាំត្រាវ ហើយបាននាំយកមកអធិការដ្ឋាននគរបាលស្រុកដើម្បីសាកសួរ។
លោកថានៅចំពោះមុខសមត្ថកិច្ចបុរសទាំង ២ នាក់បានសារភាពថា ពិតជាបានលួចដាំកញ្ជានេះមែន ប៉ុន្តែពួកគាត់បានសន្យាថា ឈប់ប្រព្រឹត្តទៀតហើយ។ បើតាមលោក ប៊ុនណា ក្នុងមូលដ្ឋានស្រុកស្អាងកន្លងមកមិនធ្លាប់មានករណីលួចដាំកញ្ឆាបែបនេះទេ ហើយនេះគឺជាលើកទី ១ ហើយដែលមានអ្នកលួចបន្លំដាំ។
ករណីដោយឡែកមួយទៀតកាលពីថ្ងៃ ១៧-១៨ មេសាសមត្ថកិច្ចនគរបាលខេត្តតាកែវក៏បានកាប់ និងដុតបំផ្លាញដើមកញ្ឆាជាង ៤ ០០០ ដើមផងដែរ នៅក្នុងមូលដ្ឋានឃុំព្រៃអំពក និងឃុំព្រះបាទជាន់ជុំ ស្រុកគិរីវង់។ នេះបើតាមលោក វង់ សុខជា នាយការិយាល័យស្ដីទីប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តនេះ។
លោក វង់ សុខជា បានប្រាប់ភ្នំពេញ-ប៉ុស្តិ៍ពីថ្ងៃ ១៩ មេសាថា ប្រតិបត្តិការ ២ ថ្ងៃនោះមានការសហការពីនគរបាលមូលដ្ឋានឃុំព្រៃអំពក និងឃុំព្រះបាទជាន់ជុំ ស្រុកគិរីវង់ ដោយបានរកឃើញ និងកាប់ដុតចោលដើមកញ្ឆា ៤ ២៨៥ ដើមនៅនឹងកន្លែង។ ជាមួយនេះបានបំផ្លាញអាងស្ដុកទឹកធ្វើពីកៅស៊ូតង់ចំនួន ៨ នៅក្នុងភូមិសាស្ត្រនៃឃុំទាំង ២ ខាងលើ។
តាមរបាយការណ៍របស់ការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តតាកែវដែលភ្នំពេញប៉ុស្តិ៍ទទួលបានឲ្យដឹងថា ចាប់ពីដើមខែមករា ឆ្នាំ ២០២០ មកទល់ថ្ងៃទី ១៨ ខែមេសាមានជនសង្ស័យ ២០ នាក់ពាក់ព័ន្ធករណីជួញដូរ រក្សាទុក និងដាំកញ្ឆាត្រូវបានបញ្ជូនទៅតុលាការ។ ក៏ប៉ុន្តែបើតាមលោក វង់ សុខជា ករណីលួចដាំដំណាំកញ្ឆានេះនៅតែមានក្នុងឃុំព្រះបាទជាន់ជុំ និងឃុំព្រៃអំពកនៃស្រុកគិរីវង់ ពិសេសនៅជាប់មាត់បឹង និងតាមភ្នំតូចៗជិតព្រំដែនវៀតណាម៕
