.jpg)
ស្រ្ដីធ្វើការតវ៉ាជាមួយសមត្ថកិច្ចកាលពីពេលថ្មីៗនេះ ក្នុងជម្លោះដីធ្លីនៅខេត្តត្បូងឃ្មុំ។ រូបថត ហ្វេសប៊ុក
ត្បូងឃ្មុំៈ នាយករដ្ឋបាលខេត្តត្បួងឃ្មុំបានឲ្យដឹងថា ពលរដ្ឋមានជម្លោះដីធ្លីជាមួយក្រុមហ៊ុនចិន ហាម៉ឹនី វីន អ៊ិនវេសមេន ក្នុងឃុំត្រពាំងព្រីង ស្រុកតំបែរ ចំនួន ២០ នាក់ ត្រូវបានដោះលែងវិញហើយ បន្ទាប់ត្រូវបាននាំខ្លួនមកសួរនៅស្នងការដ្ឋាននគរបាលខេត្តជិត ២ ថ្ងៃ ក៏ប៉ុន្តែមានពលរដ្ឋម្នាក់នឹងត្រូវបញ្ជូនទៅតុលាការតាមពាក្យបណ្តឹងរបស់ក្រុមហ៊ុន។
កាលពីថ្ងៃទី ៣ សីហា សមត្ថកិច្ចប្រមាណ ១០០ នាក់ បានចុះទៅហ៊ុមព័ទ្ធនៅទីតាំងដីមានជម្លោះហើយបានឃាត់ខ្លួនពលរដ្ឋចំនួន ២១ នាក់ និងបានរុះរើរោង និងតង់ជាច្រើនដែលជាការចុះអនុវត្តសាលដីការក្សាការពាររបស់តុលាការ។
លោក ម៉ៅ ឌុន នាយករដ្ឋបាលសាលាខេត្តត្បូងឃ្មុំបានប្រាប់ភ្នំពេញប៉ុស្តិ៍នៅថ្ងៃទី ៤ សីហា នេះថា បន្ទាប់ពីបានឃាត់ខ្លួន យកមកសួរនាំក្នុងថ្ងៃទី៤ឬថ្ងៃ៥នេះ សមត្ថកិច្ចនឹងបន្តដោះលែងពលរដ្ឋទាំងនោះឲ្យមានសេរីភាពវិញ ព្រោះពួកគេ មិនមានជាប់ពាក់ព័ន្ធនឹងការប្តឹងរបស់ក្រុមហ៊ុនតាមដីការបស់តុលាការទេ។ ប៉ុន្តែលោកថា មានពលរដ្ឋម្នាក់ ឈ្មោះ ហឿន ស៊ីនាថ ភេទប្រុស នឹងត្រូវបញ្ចូនទៅតុលាការ ប៉ុន្តែលោកមិនបានបញ្ជាក់ថា នឹងត្រូវចោទប្រកាន់ពីបទអ្វីនៅឡើយទេ។
លោកបញ្ជាក់ថា៖ «ក្នុងពេលចុះអនុវត្តនោះ សមត្ថកិច្ចបានឃាត់ខ្លួនពលរដ្ឋជាង ២០ នាក់ ដែលនៅរឹងទទឹងមិនព្រមចាកចេញពីលើដីរបស់ក្រុមហ៊ុន។ ជំនាញគេបន្តសួរនាំពួកគាត់គេនឹងដោះលែងពួកគាត់ឲ្យមានសេរីភាពឡើងវិញ យ៉ាងយូរនៅថ្ងៃពុធ។ ចំណែកម្នាក់ទៀត មានដីកា ដូច្នេះយើងនឹងបញ្ជូនទៅតុលាការ តាមពាក្យបណ្តឹង»។
បើតាមលោក ម៉ៅ ឌុន ការឃាត់ខ្លួនពលរដ្ឋទាំងនោះក៏ព្រោះតែពួកគេបានមករស់នៅកាន់កាប់លើដីក្រុមហ៊ុន ហើយបើទោះជាមានការណែនាំក៏ពួកគាត់មិនព្រមចេញ ទើបក្រុមហ៊ុនប្តឹងទៅតុលាការរហូតមានចំណាត់ការតែម្តង។
កាលពីថ្ងៃទី ១៧ ខែតុលា ឆ្នាំមុន សមត្ថកិច្ច ក៏បានចាប់ខ្លួន តំណាងសហគមន៍ភូមិស្រែប្រាំង ឃុំត្រពាំងព្រីង ស្រុកតំបែរ លោក សែម សាង ផងដែរ ពាក់ព័ន្ធនឹងរឿងជម្លោះដីធ្លីជាមួយក្រុមហ៊ុនខាងលើ ដែលបានកើតតាំងពីឆ្នាំ ២០១៤ មក ដោយមានពលរដ្ឋចំនួន១២៩គ្រួសារលើផ្ទៃដីប្រមាណ ១ ០០០ ហិកតា។ប៉ុន្តែមកទល់ពេលនេះលោក សែម សាង មិនទាន់ត្រូវបានដោះលែងវិញទេ។
លោក សែម ចំណាន ជាពលរដ្ឋម្នាក់នៃសហគមន៍ស្រែប្រាំងបានប្រាប់ភ្នំពេញប៉ុស្តិ៍នៅថ្ងៃទី ៤ សីហា នេះថា ការចាប់ខ្លួនពលរដ្ឋនេះគឺជារឿងអយុត្តិធម៌បំផុត ខណៈពាក្យបណ្តឹងរបស់ពលរដ្ឋមិនមានការអើពើនោះ។
លោកបន្តថា ពលរដ្ឋបានអាស្រ័យផលលើដីទាំងនេះជាយូរឆ្នាំមកហើយ ស្រាប់តែខាងក្រុមហ៊ុនបានឃុបឃិតជាមួយអាជ្ញាធរ មកបណ្តេញពលរដ្ឋពីលើដីនិងបានចោទប្រកាន់ពលរដ្ឋថាមករស់នៅលើដីក្រុមហ៊ុនទៅវិញ។
លោកបញ្ជាក់ថា៖ «ការចាប់ខ្លួននេះ គឺតាមតែបញ្ជារបស់ក្រុមហ៊ុន ប៉ុន្តែហេតុអ្វីបានពលរដ្ឋជួបរឿងអយុត្តិធម៌ ប្តឹងពីក្រុមហ៊ុនវិញ បែរជាអាជ្ញាធរមិនអើពើ។ ពេលដែលក្រុមហ៊ុនបាញ់កាំភ្លើងគំរាមមកលើពលរដ្ឋ យើងប្តឹងទៅសមត្ថកិច្ច មិនអើពើទេ ពេលផ្តាច់ផ្លូវពួកយើងប្តឹងទៅសមត្ថកិច្ចក៏មិនអើពើទៀត។ តើសមកិច្ចហ្នឹងធ្វើការតាមតែក្រុមហ៊ុននេះឬយ៉ាងណា?
លោកស្រី ធីម ណារិន មន្ត្រីសម្របសម្រួលសមាគមអាដហុកប្រចាំខេត្តត្បូងឃ្មុំបានលើកឡើងថា ការចាប់ខ្លួនពលរដ្ឋនេះជាការរំលោភសិទ្ធិមនុស្សធ្ងន់ធ្ងរ។ ករណីនេះអាជ្ញាគួរតែមានដំណោះស្រាយដែលល្អជាងនេះជាជាងការចាប់ចង់ និងប្រើប្រាស់ហិង្សាមកលើពលរដ្ឋរបស់ខ្លួន។
លោកស្រីបន្តថា៖ «ចំណុចនេះបើទោះជាគ្រាន់តែការឃាត់ខ្លួនដើម្បីសាកសួរ និងកុំឲ្យមានចលនាចូលទៅលើដីមានជម្លោះ ក៏ហាក់ដូចជា មានការបិទសិទ្ធិសេរីភាពរបស់ពួកគាត់ ព្រោះពលរដ្ឋមានសិទ្ធិតវ៉ានិងទៅលើដីមានជម្លោះ ដែលពួកគាត់ធ្លាប់អាស្រ័យផលហ្នឹង»។
លោកស្រី ធីម ណារិន ស្នើឲ្យតុលាការគួរតែដោះលែងតំណាងសហគមន៍របស់ពលរដ្ឋម្នាក់និងដោះលែងពលរដ្ឋទាំងអស់នេះឲ្យមានសេរីភាពឡើងវិញព្រោះការតវ៉ារបស់ពលរដ្ឋនេះគឺ ដើម្បីការពារផលប្រយោជន៍រួមតែប៉ុណ្ណោះ៕
