.jpg)
កំពង់ស្ពឺៈ កម្លាំងសមត្ថកិច្ចចម្រុះក្រុងច្បារមនបានដោះលែងទៅវិញបុរស-ស្ត្រីចំនួន ៤២ នាក់ បន្ទាប់ពីត្រូវបានឃាត់ខ្លួនកាលពីយប់ថ្ងៃទី ២៧ ខែ ធ្នូ ឆ្នាំ ២០២០ នៅក្នុងពេលចុះផ្អាកសកម្មភាពអាជីវកម្មក្លិបកម្សាន្ត ម៉ាស្ទ័រកុងតឺន័រ ដែលបានបើកការប្រមូលផ្ដុំរាំច្រៀង បំពានលើបម្រាមរបស់ក្រសួងសុខាភិបាលស្ដីពីការទប់ស្កាត់ការរីករាលដាលជំងឺកូវីដ ១៩។
លោក អ៊ូច ហ៊ាង អធិការក្រុងច្បារមនបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្នុងប្រតិបត្តិការនាយប់ថ្ងៃទី ២៧ ខែធ្នូ សមត្ថកិច្ចបានឃាត់ខ្លួនបុរស ស្ត្រី ៤២ នាក់ ក្នុងនោះមាន ១១ នាក់ ត្រូវបានរកឃើញមានសារធាតុញៀនក្រោយពីបានធ្វើតេស្តទឹកនោម។
ទោះជាយ៉ាងណាលោកថា ភ្ញៀវដែលមកផឹកស៊ី រាំរែកទាំងនោះត្រូវបានដោះលែងឱ្យវិលត្រឡប់ទៅផ្ទះវិញអស់ហើយ ក្រោយពីបានធ្វើការអប់រំណែនាំ និងធ្វើកិច្ចសន្យាបញ្ឈប់រាល់សកម្មភាពនៃការប្រមូលផ្ដុំ ដែលផ្ទុយទៅនឹងបម្រាមរបស់ក្រសួងសុខាភិបាល។
បើតាមលោក ហ៊ាង ក្លឹបកម្សាន្តម៉ាស្ទ័រកុងតឺន័រនេះមានការបែងចែកជា ២ ផ្នែក គឺផ្នែកខាងមុខជាអាហារដ្ឋានដែលមានផ្ដល់សេវាម្ហូបអាហារ ចំណែកផ្នែកខាងក្នុងជារង្គសាលដែលមានការប្រគំតន្ត្រីច្រៀងរាំ។
លោកបញ្ជាក់ថា ក្រោយពីត្រួតពិនិត្យភាពជាក់ស្ដែងឃើញមានការប្រព្រឹត្តផ្ទុយពីបម្រាមរបស់ក្រសួងសុខាភិបាលស្ដីពីការបង្ការទប់ស្កាត់ការចម្លងមេរោគកូរ៉ូណា សមត្ថកិច្ចបានសម្រេចបិទជាបណ្ដោះអាសន្នចំពោះផ្នែករង្គសាលរហូតដល់មានការណែនាំថ្មី។
លោកបន្តថា៖ «ប៉ុន្តែផ្នែកអាហារដ្ឋានយើងអនុញ្ញាតឱ្យដំណើការដដែល ដោយអនុលោមទៅតាមសេចក្ដីណែនាំរបស់ក្រសួងសុខាភិបាលស្តីពីការរក្សាគម្លាតសុវត្ថិភាពសង្គម»។
ជុំវិញករណីនេះ លោក ហាន លៀងហេង ម្ចាស់អាជីវកម្មក្លិបកម្សាន្ត ម៉ាស្ទ័រកុងតឺន័រ បានប្រាប់ ភ្នំពេញ ប៉ុស្តិ៍ កាលពីម្សិលមិញថា លោកបានយល់ព្រមធ្វើកិច្ចសន្យាបិទផ្នែករង្គសាលជាបណ្ដោះអាសន្នទៅតាមការណែនាំរបស់សមត្ថកិច្ច។
ប៉ុន្តែលោកបានអះអាងថា លោកបានអនុវត្តវិធានបង្ការអនាម័យ និងរក្សាគម្លាតសុវត្ថិភាពសង្គមទាំងផ្នែកអាហារដ្ឋាន និង ផ្នែករង្គសាល ដោយមានដាក់ដបទឹកអាល់កុលសម្រាប់ឱ្យភ្ញៀវលាងដៃ។ លោក លៀងហេង ថ្លែងថា៖ «នៅពេលនេះខ្ញុំបានសម្រេចបិទផ្នែករង្គសាលជាបណ្ដោះអាសន្ន ប៉ុន្តែផ្នែកអាហារដ្ឋាន គឺនៅបន្តការលក់ម្អូបអាហារជាធម្មតា ដើម្បីរកប្រាក់ចំណូលទប់ទល់បំណុលធនាគារ»។
បើតាមលោក លៀងហេង ចាប់តាំងពីមានការផ្ទុះឆ្លងជំងឺកូវីដ ១៩ មកការរកប្រាក់ចំណូលពីអាជីវកម្មក្លិបកម្សាន្តរបស់លោកមានការធ្លាក់ចុះយ៉ាងគំហុកដែលខែខ្លះស្ទើរតែរកប្រាក់បើកឱ្យបុគ្គលិកមិនគ្រប់ផង ព្រោះគ្មានភ្ញៀវ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងកាលពីម្សិលមិញថា ថ្វីដ្បិតតែក្នុងរយៈពេល ២-៣ ថ្ងៃកន្លងមកនេះ កម្ពុជារកពុំឃើញមានករណីឆ្លងជំងឺកូវីដ ១៩ ក្ដី ប៉ុន្តែគ្រប់គ្នាមិនត្រូវធ្វេសប្រហែសចំពោះជំងឺឆ្លងជាសកលនេះឡើយ។
លោកស្រីបានថ្លែងថា៖ «ការមិនគោរពអនុវត្តទៅតាមវិធានណែនាំស្ដីពីការបង្ការ ទប់ស្កាត់ ការឆ្លងជំងឺកូវីដ ១៩ នឹងនាំមកនូវគ្រោះថ្នាក់មិនសម្រាប់តែខ្លួនអ្នកម្នាក់ប៉ុណ្ណោះទេ ថែមទាំងគ្រោះថ្នាក់ដល់គ្រួសារ និងសង្គមជាតិថែមទៀត»៕
