.jpg)
សមត្ថកិច្ចត្រួតពិនិត្យអណ្តូងទឹក ដែលស្ត្រីម្នាក់ត្រូវបានសង្ស័យថា ត្រូវបានសម្លាប់រួចទម្លាក់ចូលក្នុងនេះ។ រូបថត ហ្វេ្រសញូវ
កំពង់ស្ពឺៈ សមត្ថកិច្ចខេត្តកំពង់ស្ពឺកំពុងស្វែងរកចាប់ខ្លួនបុរសម្នាក់ពីបទសង្ស័យថាសម្លាប់ប្រពន្ធ រួចទម្លាក់ចូលក្នុងអណ្តូងទឹក បន្ទាប់ពីសាកសពត្រូវបានម្ដាយប្រទះឃើញកាលពីថ្ងៃទី ៣០ ខែមេសាក្នុងភូមិអូរគគីរ ឃុំតាំងក្រូច ស្រុកសំរោងទង ខេត្តកំពង់ស្ពឺ។
លោក សម សាក់ នាយការិយាល័យនគរបាលព្រហ្មទណ្ឌកម្រិតធ្ងន់ខេត្តកំពង់ស្ពឺបានឲ្យដឹងថា រហូតមកទល់ពេលនេះសមត្ថកិច្ចកំពុងតាមចាប់ខ្លួនជនសង្ស័យដោយបានតាមដល់ស្រុកកំណើត ប៉ុន្តែជននោះរត់បាត់ដោយមិនចូលភូមិកំណើតទេ។
លោកប្រាប់ថាបើតាមស្ត្រីឈ្មោះ ម៉ន ឡង អាយុ ៥៦ ឆ្នាំជាម្តាយស្ត្រីរងគ្រោះថាក្នុងហេតុការណ៍នេះគាត់ជាម្តាយមិនបានដឹងរឿងទេ ប៉ុន្តែគាត់បានសង្កេតឃើញថាកូនប្រសាគាត់បានចេញបាត់ពីផ្ទះហើយក៏មិនបានប្រាប់គាត់ថា ទៅទីណាដែរ។
លោក សម សាក់ ប្រាប់ថាមូលហេតុដែលសមត្ថកិច្ចសង្ស័យលើបុរសជាប្តីថាជាអ្នកសម្លាប់ស្ត្រីរងគ្រោះ ព្រោះជននោះបានគេចបាត់ពីផ្ទះតាំងពីថ្ងៃកើតហេតុនោះមក។ រីឯឯកសារពាក់ព័ន្ធនឹងស្ត្រីរងគ្រោះដូចជាអត្តសញ្ញាណប័ណ្ណគាត់ និងឯកសារផ្សេងទៀតត្រូវជនសង្ស័យប្រមូលយកអស់។
ទោះបីយ៉ាងណាលោក សម សាក់ ប្រាប់បន្ថែមថា៖ «តាមការសន្និដ្ឋានរបស់គ្រូពេទ្យ និងព្រះរាជអាជ្ញារួមទាំងមន្ត្រីជំនាញក្រោយធ្វើកោសល្យវិច័យនៅកន្លែងកើតហេតុឃើញថា ស្ត្រីរងគ្រោះមានស្នាមរបួសជង្គង់ម្ខាង ហើយនៅរន្ធភេទក៏មានរបួសធ្ងន់ដែរ។ ប៉ុន្តែលើខ្លួនប្រាណមិនមានស្លាកស្នាមអ្វីទេ»។
លោក ហង់ តូច នាយនគរបាលប៉ុស្តិ៍ឃុំតាំងក្រូច ប្រាប់ឲ្យដឹងដែរថាស្ត្រីរងគ្រោះឈ្មោះ ផៃ សុខគៀង អាយុ ២០ ឆ្នាំ ឯប្តីឈ្មោះ ម៉ាត់ វុទ្ធី ហៅ ម៉ាប់ អាយុ ២៥ ឆ្នាំបានរៀបការជាមួយគ្នាប្រហែល ១ ឆ្នាំហើយ ប៉ុន្តែពួកគេមិនទាន់មានកូនទេ។ ក្រុមគ្រួសារស្ត្រីរងគ្រោះជាអ្នកចំណាកស្រុក និងបានមកស្នាក់នៅចាំចម្ការឲ្យគេក្នុងភូមិ-ឃុំកើតហេតុ ដូច្នេះករណីប្រវត្តិជនសង្ស័យលោកមិនបានដឹងច្បាស់ទេ។
លោក ហង់ តូច បានបញ្ជាក់ថា៖ «ខ្ញុំជាអាជ្ញាធរគ្រប់គ្រងនៅទីនោះមែន ប៉ុន្តែខ្ញុំមិនបានដឹងពីប្រវត្តិជនសង្ស័យទេ ប៉ុន្តែម្តាយក្មេកគេប្រាប់ថាប្តីប្រពន្ធទាំង ២ នាក់នេះឈ្លោះប្រកែកគ្នា និងប្រើហិង្សាញឹកញាប់ណាស់»។
លោករំឭកប្រាប់តាមសម្តីម្តាយស្ត្រីរងគ្រោះថាមុនថ្ងៃកើតហេតុ កូនស្រីគាត់បានឈ្លោះគ្នាជាមួយប្ដី ហើយបន្ទាប់មកនៅក្នុងថ្ងៃទី ២៩ ខែមេសា ឆ្នាំ ២០១៨ ប្ដីប្រពន្ធនេះបានបាត់ពីផ្ទះ ប៉ុន្តែគាត់មិនបានចាប់អារម្មណ៍ ព្រោះសព្វដងបើពួកគេឈ្លោះគ្នាហើយតែងនាំគ្នាទៅលេងផ្ទះបងប្អូនបាត់ ១ ថ្ងៃ ២ ទើបមកវិញ ដូច្នេះទើបគាត់មិនអើពើរកពួកគេ។
លោកបន្តថាលុះដល់ថ្ងៃទី ៣០ មេសាម្តាយស្ត្រីរងគ្រោះបានយកខោអាវទៅបោកនៅអណ្តូងទឹកដែលមានជម្រៅពីដីដល់ផ្ទៃទឹក ៤ ម៉ែត្រនោះក៏ប្រទះឃើញកូនស្រីស្លាប់អណ្តែតទឹកទើបរត់ទៅប្តឹងនគរបាលប៉ុស្តិ៍ទៅ។
លោកនាយនគរបាលប៉ុស្តិ៍បញ្ជាក់ប្រាប់ថា មូលហេតុដែលជនសង្ស័យសម្លាប់ស្ត្រីរងគ្រោះនេះអាចមកពីការប្រចណ្ឌច្រើនជាងរឿងទំនាស់ក្នុងគ្រួសារ ព្រោះចាប់តាំងពីស្ត្រីរងគ្រោះរៀបការមកជនសង្ស័យមិនឲ្យស្ត្រីរងគ្រោះទៅធ្វើការក្រៅផ្ទះទេ ហើយក៏តែងតែរករឿងនាងផងដែរ៕
