.jpg)
ស្វាយរៀង៖ នគរបាលស្រុករមាសហែកកំពុងស្រាវជ្រាវតាមចាប់ខ្លួនជនសង្ស័យម្នាក់ បន្ទាប់ពីចាក់ប្អូនថ្លៃរបស់ខ្លួនស្លាប់កាលពីយប់ថ្ងៃទី ១ វិច្ឆិកា ពាក់ព័ន្ធទំនាស់ពាក្យសម្តីគ្នាដែលកើតហេតុ នៅភូមិស្វាយពក ឃុំដូង ស្រុករមាសហែក ខេត្តស្វាយរៀង។
លោក សំ សំអុល អធិការរងទទួលផែនព្រហ្មទណ្ឌ នៃអធិការដ្ឋាននគរបាលស្រុករមាសហែកប្រាប់នៅថ្ងៃទី ២ វិច្ឆិកា ថា ជនរងគ្រោះក្នុងហេតុការណ៍នេះមានឈ្មោះ ទូច វៀន អាយុ ៤៥ ឆ្នាំ រីឯជនសង្ស័យឈ្មោះ ឆោម ប៉ាក អាយុ២៦ ឆ្នាំ ពួកគេរស់នៅក្នុងភូមិ-ឃុំកើតហេតុខាងលើ។ ករណីនេះសមត្ថកិច្ចរបស់លោកកំពុងតាមចាប់ខ្លួនជនសង្ស័យហើយ។
លោកប្រាប់ថា៖ «ជនសង្ស័យបន្ទាប់ពីបង្កហេតុបានគេចខ្លួនបាត់ ប៉ុន្តែយើងក៏បានស្គាល់អត្តសញ្ញាណរបស់គាត់ដែរ។ តែទោះជាគាត់គេចខ្លួនយ៉ាងណាក៏ដោយក៏គាត់មិនអាចគេចផុតពីសំណាញ់ច្បាប់ដែរ»។
លោក សំ សំអុល បានរំឭកតាមសម្តីសាច់ញាត់ជនរងគ្រោះថា សង្ស័យឈ្មោះ ឆោម ប៉ាក បានយកប្រពន្ធអាយុ ៥៥ ឆ្នាំ ដែលស្រ្តីជាប្រពន្ធត្រូវជាបងបង្កើតរបស់ជនរងគ្រោះ។ នៅយប់មុនពេលកើត ហេតុជនសង្ស័យបានឈ្លោះគ្នាជាមួយប្រពន្ធរបស់គាត់ហើយបានស្រែកខ្លាំងៗ។ នៅពេលនោះជនរងគ្រោះបានប្រាប់ទៅជនសង្ស័យកុំឲ្យស្រែកឮ ព្រោះរំខានដល់អ្នកជិតខាង។
លោកបន្តថា ពេលនោះជនសង្ស័យបានស្រែកគំរាមទៅជនរងគ្រោះ និងស្ទុះទៅចាក់ជនរងគ្រោះបណ្តាលឲ្យស្លាប់នៅកន្លែងកើតហេតុ។ ក្នុងហេតុការណ៍នោះពលរដ្ឋក៏ដូចជាសាច់ញាតិប្រហែលជារវល់តែភ័យនឹងជនរងគ្រោះទើបមិនបានរាយការណ៍ទៅប៉ុស្តិ៍នគរបាលឃុំដូង។ លុះប្រហែល ១ ម៉ោងក្រោយកើតហេតុ ទើបសមត្ថកិច្ចនគរបាលប៉ុស្តិ៍ទទួលបានដំណឹងរួចក៏ចាត់កម្លាំងចុះដល់កន្លែងកើតហេតុភ្លាមៗតែជនសង្ស័យបានរត់គេចខ្លួនបាត់ទៅហើយ។ ឈ្មោះ ឆោម ប៉ាក ម្នាក់នេះជាមនុស្សចំណាកស្រុកទៅធ្វើការនៅថៃមិនដែលរស់នៅក្នុងភូមិជាប់លាប់ទេ។
លោកបញ្ជាក់ថា៖ «ព័ត៌មានយឺតបន្តិចហើយ ឆ្លៀតពេលនោះជនសង្ស័យអាចរត់គេចខ្លួនបាន។ ប៉ុន្តែសមត្ថកិច្ចយើងបានដាក់កម្លាំងតាមរកជនសង្ស័យហើយ»។
លោកបន្តថា ក្រោយពេលសមត្ថកិច្ចចុះដល់កន្លែងកើតហេតុ និងបានធ្វើកោសល្យវិច័យលើសាកសពឃើញថា សាកសពត្រូវបានជនសង្ស័យចាក់នឹងវត្ថុរឹងចំនួន ៣ កន្លែង គឺត្រូវចំពោះ ១ កន្លែងចំក្រោមឆ្អឹងដងកាំបិត ១ កន្លែង និងត្រចៀក ១ កន្លែង។ ក្រោយសមត្ថកិច្ចពិនិត្យរួចមកបានប្រគល់សាកសពទៅក្រុមគ្រួសារ ដើម្បីធ្វើបុណ្យតាមប្រពៃណី៕
