.jpg)
សមត្ថកិច្ចចុះដល់កន្លែងកើតហេតុ ដើម្បីធ្វើកោសល្យវិច័យជនរងគ្រោះត្រូវជនសង្ស័យសម្លាប់។ FN
ភ្នំពេញៈ នគរបាលខណ្ឌកំបូលកំពុងស្រាវជ្រាវ និងតាមចាប់បុរសម្នាក់ពាក់ព័ន្ធករណីសម្លាប់ស្រីកំណាន់របស់ខ្លួន បន្ទាប់ពីពលរដ្ឋប្រទះឃើញសាកសពកំពុងហើមស្អុយនៅក្នុងបន្ទប់ជួលមួយកាលពីថ្ងៃទី ១៦មិថុនា នៅភូមិគោកខ្សាច់សង្កាត់ប្រទះឡាង ខណ្ឌកំបូល រាជធានីភ្នំពេញ។
លោក ហង្ស មុន្នី អធិការនគរបាលខណ្ឌកំបូលប្រាប់នៅថ្ងៃទី ១៧ មិថុនានេះថា ស្រ្តីរងគ្រោះដែលស្លាប់ឈ្មោះ ហេង សុខឃឿន អាយុ ៤៥ ឆ្នាំ ជាកម្មការិនីរោងចក្រកាត់ដេរនិងជាស្រ្តីមេម៉ាយមានកូនប្រុស-ស្រី ២ នាក់និងភូមិជ្រួលឃុំកន្សោមអក ស្រុកកំពង់ត្របែក ខេត្តព្រៃវែង។ ចំណែកជនសង្ស័យឈ្មោះ ពេជ្រ ចន្ថា អាយុ ៤៣ ឆ្នាំ ជាកម្មករសំណង់ និងមានស្រុកកំណើតនៅខេត្តស្វាយរៀង តែជនសង្ស័យបានរត់គេចខ្លួនបាត់ហើយ។
លោកបញ្ជាក់ថា៖ «ឥឡូវនេះសមត្ថកិច្ចនគរបាលខ្ញុំកំពុងស្រាវជ្រាវតាមចាប់ខ្លួនជនសង្ស័យហើយ។គាត់ត្រូវបានសមត្ថកិច្ចសង្ស័យថាបានសម្លាប់ស្រ្តីរងគ្រោះ»។
លោកប្រាប់តាមសម្តីកូនស្រីរបស់ស្រ្តីរងគ្រោះថា ម្ដាយនាងបានយកប្តីក្រោយ (ជនល្មើស) និងរស់នៅជាមួយគ្នាបានប្រហែល ៣ ឆ្នាំមកហើយ បន្ទាប់ពីគាត់លែងលះគ្នាជាមួយប្តីមុនជាឪពុករបស់នាង។
ប៉ុន្តែក្រោយពីបានគ្នាជាប្តីប្រពន្ធជាមួយជនសង្ស័យឈ្មោះ ពេជ្រ ចន្ថា មក គឺប្តីក្រោយម្នាក់នេះវាយធ្វើបាបស្រ្តីរងគ្រោះគ្មានលស់ថ្ងៃឡើយ។ដោយសារស្រ្តីរងគ្រោះទ្រាំលែងបានក៏ប្តឹងសមត្ថកិច្ចឲ្យចាប់ខ្លួនម្តងមកហើយកាលពីឆ្នាំ២០១៩ ប៉ុន្តែត្រូវបានសមត្ថកិច្ចដោះលែងវិញក្រោយពីមានការអប់រំ។
លោកថា៖«ជនល្មើសធ្លាប់បង្កហិង្សាវាយដំស្រ្តីរងគ្រោះរហូតមានរបួសស្នាមហើយសមត្ថកិច្ចឃាត់ខ្លួនគាត់រយៈពេលខ្លីម្តងដែរ»។
លោក អធិការ ហង្ស មុន្នី បន្ថែមថា កាលពីថ្ងៃទី ១៦ ខែមិថុនា វេលាម៉ោងជាង ១១ ថ្ងៃត្រង់ ម្ចាស់ផ្ទះដែលស្រ្តីរងគ្រោះជួលស្នាក់នៅបានធុំក្លិនស្អុយចេញពីបន្ទប់ជួល ប៉ុន្តែទ្វារបន្ទប់ត្រូវបានចាក់សោពីខាងក្រៅ។ពេលនោះម្ចាស់ផ្ទះបានកាត់សោទ្វារចូលទៅក្នុងបន្ទប់ ក៏ឃើញសាកសពស្រ្តីរងគ្រោះហើយបានរាយការណ៍ប្រាប់សមត្ថកិច្ចតែម្តង។
លោកប្រាប់ឲ្យដឹងថា ក្រោយពីទទួលបានព័ត៌មាននេះសមត្ថកិច្ចរបស់លោកបានចុះដល់កន្លែងកើតហេតុជាមួយនគរបាលបច្ចេកទេសវិទ្យាសាស្រ្ត និងគ្រូពេទ្យ ដើម្បីធ្វើកោសល្យវិច័យនិងសន្និដ្ឋានថា ជនរងគ្រោះអាចត្រូវជនសង្ស័យសម្លាប់ដោយខ្ទប់ដង្ហើម ដែលអាចកើតឡើង ៣ ថ្ងៃមុន គឺអាចនៅថ្ងៃទី ១៣ មិថុនា។
លោកបានឲ្យដឹងទៀតថា បើតាមការនិយាយប្រាប់របស់ឈ្មោះ ម៉ន សុភា អាយុ ១៨ ឆ្នាំ ដែលត្រូវជាកូនស្រីស្រ្តីរងគ្រោះថា នាងមិនបានរស់នៅជាមួយម្តាយទេ ប៉ុន្តែនៅថ្ងៃទី ១៦ មិថុនា នោះ គេទូរស័ព្ទប្រាប់អំពីការស្លាប់របស់ម្តាយនាង។
លុះពេលមកដល់ឃើញសភាពបែបនេះនាងមានអារម្មណ៍តក់ស្លុតខ្លាំងណាស់៕
