.jpg)
កាតអ្នកសារព័ត៌មានក្លែងក្លាយ ដែលប្រើសម្រាប់ផ្ញើសារសុំប្រាក់ពីលោក រ័ត្ន ស្រ៊ាង នាពេលកន្លងមក។ រូបថត GRK
ភ្នំពេញៈ សមត្ថកិច្ចកំពុងស្រាវជ្រាវរកអ្នកពាក់ព័ន្ធផ្សេងទៀត បន្ទាប់ពីបានឃាត់ខ្លួនបុរសម្នាក់ពាក់ព័ន្ធករណីតាំងខ្លួនជាអ្នកសារព័ត៌មាន ហើយបានផ្ញើសារទៅសុំប្រាក់ ៤០ ម៉ឺនរៀល ពីមេបញ្ជាការកងរាជអាវុធហត្ថរាជធានីភ្នំពេញ លោក រ័ត្ន ស្រ៊ាង។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានថ្លែងពីម្សិលមិញថា លោកមិនទាន់ប្រមូលបានព័ត៌មានពាក់ព័ន្ធករណីនេះទេ។ ករណីនេះលោកបានឃើញព័ត៌មានតែ ១ ផ្នែកគឺតែពីភាគីម្ខាង។ «យើងមិនទាន់ដឹងថា ចម្លើយពីខាងគាត់ (ប៉េអឹម) យើងមិនទាន់ដឹងថា ជនម្នាក់នោះពិត ឬមិនពិត ឬជាការបន្លំតគ្នាគឺយើងមិនដឹងដែរ។ តែចាំមើលរបាយការណ៍ជាក់លាក់បន្តិចសិនទើបយើងចាត់ការ»។
លោកបញ្ជាក់ថា បើតាមគេផ្សព្វផ្សាយ អ្នកដែលបានយកឈ្មោះអ្នកសារព័ត៌មានទៅប្រើសុំប្រាក់នោះមានឈ្មោះ ជុំ សុភាព ជាចាងហ្វាងកាសែតរស្មីខ្មែរ។ លោកកំពុងស្រាវជ្រាវមើលថាតើពិតជាមានឈ្មោះនៅក្នុងអង្គភាពសារព័ត៌មានដែលបានសុំអាជ្ញាប័ណ្ណពីក្រសួងព័ត៌មានដែរឬអត់។
បើតាមលោក សុវណ្ណ ប្រសិន បើមានជនជាអ្នកសារព័ត៌មានណាម្នាក់ ជំរិតទារប្រាក់ជាថ្នូរនឹងការចុះផ្សាយនោះក្រសួងព័ត៌មាននឹងដកហូតអាជ្ញាប័ណ្ណជននោះ។
ភ្នំពេញប៉ុស្តិ៍ពីម្សិលមិញបានទូរស័ព្ទទៅលោក ផាន់ តារាវុធ អនុប្រធានមន្ទីរស្រាវជ្រាវបទល្មើសនៃបញ្ជាការដ្ឋានកងរាជអាវុធហត្ថរាជធានីភ្នំពេញដើម្បីសុំការបញ្ជាក់ពីបញ្ហានេះតែលោកឆ្លើយថា ព័ត៌មានទាក់ទងនឹងបទល្មើសផ្សេងៗ គឺកងរាជអាវុធហត្ថមានអ្នកនាំពាក្យជាអ្នកឆ្លើយបំភ្លឺ។
ប៉ុន្តែលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសថ្លែងថា ការងារបង្ក្រាប បទល្មើសនេះគឺជាសមត្ថកិច្ចអាវុធហត្ថដែលបានសហការជាមួយអយ្យការអមសាលាដំបូងរាជធានី ភ្នំពេញ។ «ខ្ញុំសុំឱ្យសួរទៅអយ្យការវិញព្រោះយើងធ្វើការងារនេះមានការសម្របសម្រួល និងដឹកនាំដោយអយ្យការ អ៊ីចឹងសុំទៅសួរខាងអយ្យការវិញ»។
លោក គុជ គឹមឡុង អ្នកនាំពាក្យសាលាដំបូងរាជធានីមិនបានឆ្លើយតបតាមសារអេឡិចត្រូនិកចំពោះការសុំបញ្ជាក់ពីបញ្ហានេះទេ។ ទោះយ៉ាងណាបើយោងតាមផេចហ្វេសប៊ុករបស់កងរាជអាវុធហត្ថរាជធានីភ្នំពេញបានសរសេរថា នៅល្ងាចថ្ងៃទី ១៩ ខែ ធ្នូ ឆ្នាំ ២០២០ មានលេខទូរស័ព្ទ ១ តាំងខ្លួនជាបុគ្គលិកទូរទស្សន៍អប្សរាប៉ុស្តិ៍លេខ ១១ បានផ្ញើសារតាមប្រព័ន្ធ WhatsApp ទៅកាន់លោក រ័ត្ន ស្រ៊ាង មេបញ្ជាការ កងរាជអាវុធហត្ថរាជធានីភ្នំពេញ។
សារនោះមានខ្លឹមសារថា «ខ្ញុំបាទ ប៉ែន នួន ខ្វះខាតផ្ទាល់ខ្លួន ប្រពន្ធរបស់ខ្ញុំ (ឆ្លងទន្លេ) ខ្វះខាតសុំឯកឧត្តមចំនួន ៤០ ម៉ឺនរៀលសូមឯកឧត្តមមេត្តាជួយខ្ញុំបាទផងសូមអរគុណ»។ ជននេះបានផ្ញើភ្ជាប់មកជាមួយនូវបណ្ណសារព័ត៌មានដែលមានឈ្មោះ និងរូបថត ប៉ែន នួន។ ដោយមានការសង្ស័យ លោក រ័ត្ន ស្រ៊ាងក៏បានឆែកសួរទៅប្រធានព័ត៌មានទូរទស្សន៍អប្សរាប៉ុស្តិ៍លេខ ១១ ហើយប្រធានព័ត៌មានរូបនេះបញ្ជាក់ថា សាមីខ្លួន ឈ្មោះ ប៉ែន នួន គឺជាអតីតសហការីឆ្លើយឆ្លងព័ត៌មានទូរទស្សន៍អប្សរាហើយសាមីខ្លួន ពុំដឹងរឿងអ្វីទេ។ ឯអ្នកដែលយកបណ្ណព័ត៌មានដែលមានឈ្មោះ និងរូបថតរបស់ ប៉ែន នួន ទៅដើរសុំលុយនោះគឺជាជនក្លែងបន្លំ។
បន្ទាប់ពីបានទទួលព័ត៌មានរួចហើយលោកមេបញ្ជាការ អាវុធហត្ថរាជធានីបានប្រើវិធានការជំនាញអូសទាញជនក្លែងបន្លំរូបនោះឱ្យមកជួបទើបកម្លាំងជំនាញរបស់អាវុធហត្ថឃាត់ខ្លួនបុរសរូបនោះ ដើម្បីសួរនាំ។ បើតាមផេចអាវុធហត្ថបុរសរូបនោះឆ្លើយថា រូបគាត់ គ្រាន់តែមកជំនួសគេរីឯអ្នកដែលប្រើគាត់មកឈ្មោះ ជុំ សុភាព ជាចាងហ្វាង កាសែតរស្មីខ្មែរបានឱ្យខ្លួនកាន់ទូរស័ព្ទមកជំនួសដែលទូរស័ព្ទនោះ គឺជាលេខទូរស័ព្ទដែលតាំងខ្លួនថា ឈ្មោះ ប៉ែន នួន។
សមត្ថកិច្ចបានឆែកក្នុងទូរស័ព្ទនោះមានសារទំនាក់ទំនង ប្រើបណ្ណព័ត៌មានផ្សេងៗផ្ញើទៅស្ថាប័នក្រសួង មន្ទីរ អង្គភាព និងអាជីវករជាច្រើនដើម្បីសុំប្រាក់ និងមានរូបភាព បណ្ណព័ត៌មានរបស់អ្នកព័ត៌មានជាច្រើនទៀត។ ឈ្មោះ ជុំ សុភាព ក៏បានយកបណ្ណនេះទៅប្រើប្រាស់ដើម្បីសុំលុយគេដូចគ្នាផងដែរ។
បច្ចុប្បន្នឈ្មោះ ជុំ សុភាព បានរត់គេចខ្លួនបាត់ ហើយសមត្ថកិច្ចកំពុងស្រាវជ្រាវស្វែងរកជននេះ៕
