.jpg)
ពិធីបុណ្យសពមន្ត្រីអាវុធហត្ថនៅភ្នំពេញកាលពីម្សិលមិញ។ ស្រេង ម៉េងស្រ៊ុន
មណ្ឌលគិរីៈ មន្ត្រីនគរបាលម្នាក់ និងមន្ត្រីយោធា ២ នាក់កំពុងត្រូវបានសមត្ថកិច្ចតាមរកដើម្បីសាកសួរដោយជាប់សង្ស័យពាក់ព័ន្ធនឹងករណីផ្ទុះអាវុធបណ្ដាលឲ្យមន្ត្រី ៣ នាក់ស្លាប់នៅដែនជម្រកសត្វព្រៃកែវសីមាស្រុកអូររាំង ខេត្តមណ្ឌលគិរីកាលពីល្ងាចថ្ងៃ ៣០ មករា ខណៈគ្រួសារសពស្នើឲ្យជួយរកយុត្តិធម៌ដល់ជនរងគ្រោះ។ នេះបើតាមលោក ប៊ូ ប៊ុនឈាត អធិការស្រុកអូររាំងកាលពីម្សិលមិញ។
លោក ប៊ុនឈាត បានប្រាប់ថាសមត្ថកិច្ចកំពុងស្វះស្វែងរកលោក ផេង ពេញ នាយនគរបាលប៉ុស្តិ៍ព្រំដែនអូរលែរ លោក កើត វេហា ជានាយប៉ុស្តិ៍យោធាការពារព្រំដែននៅវរៈ ១០៣ និងឈ្មោះ ងួន ជា ដែលជាមន្ត្រីការពារព្រំដែន ខណៈពួកគេកំពុងគេចខ្លួន។
លោក ប៊ុនឈាត បានបញ្ជាក់ថា៖ «អ្នកដែលសង្ស័យបានគេចខ្លួនបាត់ហើយ។ មានឈ្មោះ ផេង ពេញ និង លោក កើត វេហា ជាយោធានាយប៉ុស្តិ៍ការពារព្រំដែននៅវរៈ ១០៣។ យើងមិនដឹងថា ២ នាក់នោះមួយណាដែលបានប្រព្រឹត្តទេ»។
ប៉ុន្តែលោកបានអះអាងថាចំពោះ ឈ្មោះ ងួន ជា ប្រហែលជាមិនជាប់ពាក់ព័ន្ធទេដោយសារគាត់ជាកម្លាំងនៅការពារថែរក្សាត្រាក់ទ័រ និងរថយន្តវិស្វកម្មដែលកំពុងធ្វើផ្លូវ។
យ៉ាងណាក៏ដោយលោកយល់ថា៖ «យើងមិនអាចទាន់សន្និដ្ឋានបានទេ វាអាស្រ័យទៅលើក្រុមការងារ»។
ភ្លាមៗបន្ទាប់ពីមានការផ្ទុះអាវុធមានមន្ត្រីកងរាជអាវុធហត្ថការពារជម្រកសត្វព្រៃឈ្មោះ សេក វឌ្ឍនា និង លោក តើន សុខណៃ ជាមន្ត្រីអនុរក្សនៃមន្ទីរបរិស្ថានខេត្តបានស្លាប់នៅនឹងកន្លែងកើតហេតុ ខណៈម្នាក់ទៀតជាបុគ្គលិកអង្គការ WCS ឈ្មោះ ថុល ខ្នា បានស្លាប់ពេលដឹកទៅមន្ទីរពេទ្យបង្អែកស្រុកអូររាំង។
ទាក់ទងនឹងការស្រាវជ្រាវករណីនេះលោក ប៊ុតឈាត បានថ្លែងថាសមត្ថកិច្ចបានរកឃើញគ្រាប់កាទូសកាំភ្លើង ៧ គ្រាប់សុទ្ធតែប្រភេទ AK និងថាជនរងគ្រោះត្រូវគេពួនស្ទាក់បាញ់ពេលកំពុងល្បាត។
លោកបន្ដថា៖ «នៅពេលពួកគេល្បាតមានគេពួនស្ទាក់ចាំបាញ់តែម្តង។ ពួកគាត់មិនអាចបាញ់តដៃបានទេដោយសារក្រុមគាត់មានកាំភ្លើងតែម្នាក់គឺមន្ត្រីកងរាជអាវុធហត្ថហើយដោយសារគាត់ជិះម៉ូតូមុខគេ គាត់ត្រូវបានគេបាញ់សម្លាប់មុនដោយត្រូវ ៣ គ្រាប់ត្រង់ដើមទ្រូង ក្បាល និងថ្ងាស»។
លោក យឺត កាន អាយុ ២៤ ឆ្នាំត្រូវជាប្អូនបង្កើតរបស់លោក តើន សុខណៃ ជនជាតិភាគតិច និងជាមន្ត្រីឧទ្យានុរក្សតំបន់ការពារដែនជម្រកសត្វព្រៃកែវសីមាបានថ្លែងនៅពេលកំពុងធ្វើបុណ្យនៅខេត្តមណ្ឌលគិរីកាលពីម្សិលមិញថាបងគាត់មានកូន ២ នាក់ដោយម្នាក់អាយុ ៥ ឆ្នាំ និងម្នាក់ទៀតអាយុ ១ ខួប ២ ខែ។
លោកបានប្រាប់ភ្នំពេញប៉ុស្តិ៍ថា៖ «យើងទាមទារឲ្យអាជ្ញាធរស្វះសែ្វងរកជនដៃដល់ទាំង ៣ នាក់ដែលបានពាក់ព័ន្ធនឹងការបាញ់បងប្រុសខ្ញុំ»។ លោកថា៖ «ទោះបីជាគាត់ឈឺក៏ទៅដើរល្បាតដែរ។ គាត់លះបង់ទាំងពេលវេលា និងកម្លាំងកាយដើម្បីការពារព្រៃឈើដែរ»។
«គាត់ធ្លាប់និយាយជាមួយខ្ញុំថា បើមានថ្ងៃណាមួយអ្នកអាក្រក់មានបំណងមិនល្អចំពោះគាត់ដោយសារការពារព្រៃឈើ គាត់សុខចិត្តស្លាប់ ពួកយើងធ្លាប់ដាស់តឿនគាត់ឲ្យប្រុងប្រយ័ត្ន...ហើយគាត់ថាមិនបាច់ភ័យទេ...បងធ្វើការតាមតួនាទីរបស់បង...យើងមិននឹកស្មាន និងហួសចិត្តដែលរឿងនេះបានកើតឡើងចំពោះរូបគាត់»។ លោក កាន ក៏បានសំណូមពរឲ្យអាជ្ញាធរពាក់ព័ន្ធជួយគិតគូរដល់គ្រួសារគាត់ផង ដោយប្រពន្ធគាត់នឹងមានការលំបាកក្នុងជីវភាពគ្រួសារ។
ដោយឡែកអ្នកស្រី ភាន លីនដា អាយុ ៣០ ជាភរិយាសពលោក សេក វឌ្ឍនា ដែលមានកូនស្រី ២ នាក់ម្នាក់អាយុ ៦ ឆ្នាំ និងម្នាក់អាយុ ៤ ឆ្នាំបានថ្លែងថាគាត់បានរៀបការជាមួយគ្នាប្រហែល ៨ ឆ្នាំហើយដោយគ្រួសារមានជីវភាពសមរម្យដែលបានមកដោយសារការបឹងប្រែងពីប្ដីប្រពន្ធគាត់។
អ្នកស្រីថា ស្វាមីអ្នកស្រីបានបម្រើការងារជាមន្ត្រីកងរាជអាវុធហត្ថ ៧ ឆ្នាំហើយ និងថាគាត់បានទៅប្រចាំការនៅខេត្តមណ្ឌលគិរី ២ អាណត្តិមកហើយ ហើយជាលើកទី ២ ហើយដែលគាត់ចុះធ្វើការជាមួយអង្គការ WCS។
អ្នកស្រីបញ្ជាក់ទាំងក្ដុកក្ដួលថា៖ «គាត់ស្រឡាញ់ខ្ញុំណាស់ នៅពេលគាត់មានលុយគាត់តែងតែផ្ញើឲ្យខ្ញុំ ខ្លាចខ្ញុំអត់អីហូប»។
អ្នកស្រីបន្តថានៅពេលអ្នកស្រីកំពុងនៅក្នុងហាងសាឡនរបស់អ្នកស្រីនៅភ្នំពេញ គាត់បានទូរស័ព្ទមកដោយប្រាប់ថាកំពុងដើរធ្វើការ ហើយថាគាត់ហត់ណាស់ ហើយនៅមុនបិទទូរស័ព្ទគាត់ថានឹងទាក់ទងម្តងទៀត ប៉ុន្តែនៅម៉ោងប្រហែល ៦-៧ ល្ងាចស្រាប់តែមេរបស់គាត់ទូរស័ព្ទមកប្រាប់ថាគាត់ស្លាប់ហើយ។
អ្នកស្រីបានបន្តថា៖ «វានឹងមានការលំបាកដោយសារមនុស្សស្រីមា្នក់ហើយមានកូន ២ នាក់ក្នុងបន្ទុក។ តើយើងយល់យ៉ាងណាដែរមិនបាច់ខ្ញុំនិយាយប្រាប់ក៏គិតឃើញដែរ»។
អ្នកស្រីថ្លែងទាំងទឹកភ្នែកថា៖ «ខ្ញុំសង្ឃឹមថាអាជ្ញាធរនឹងរកយុត្តិធម៌ពីព្រោះខ្ញុំបានបាត់បង់គ្រួសារមួយដែលមានភាពកក់ក្តៅ ដូច្នេះខ្ញុំមិនសប្បាយចិត្តទេបើសិនជាគាត់ស្លាប់ទៅដោយមិនអាចរកអ្នកសម្លាប់គាត់មិនបាន។ ត្រូវតែរកអ្នកដែលបាញ់គាត់ឲ្យឃើញឲ្យខ្ញុំ។ រឿងធំបំផុតខ្ញុំចង់រកអ្នកដែលសម្លាប់ប្តីខ្ញុំ»។
លោក ឈុំ សុជាតិ អ្នកនាំពាក្យក្រសួងការពារជាតិនិង លោក គៀត ច័ន្ទថារិទ្ធ អ្នកនាំពាក្យក្រសួងមហាផ្ទៃមិនអាចសុំការអត្ថាធិប្បាយបានទេកាលពីម្សិលមិញ ខណៈអភិបាលខេត្តមណ្ឌលគិរីលោក ស្វាយ សំអ៊ាង ថ្លែងថាករណីនេះសមត្ថកិច្ចកំពុងបន្តស្រាវជ្រាវ។
ដោយឡែកមន្ត្រីអ្នកនាំពាក្យព្រះរាជអាជ្ញាខេត្តមណ្ឌលគិរីលោក ម៉ម វ៉ាន់ដា ក៏បានថ្លែងដែរថា៖ «យើងកំពុងធ្វើការនេះដើម្បីបន្តស្វែងរកមុខសញ្ញាជនដែលប្រព្រឹត្តបទល្មើសហ្នឹង...ឥឡូវយើងមានតម្រុយច្រើនហើយ និងភ័ស្តុតាងក៏ច្រើនដែរ» ប៉ុន្តែលោកបដិសេធប្រាប់ពីចំនួនជនសង្ស័យ និងកំណត់អត្តសញ្ញាណជនសង្ស័យ៕ NS
