The Phnom Penh Post Search

Search form




Logo of Phnom Penh Post newspaper Phnom Penh Post - សមត្ថកិច្ច​ត្រៀម​កងកម្លាំង​ការពារ​គណបក្ស​ប្រឆាំង

សមត្ថកិច្ច​ត្រៀម​កងកម្លាំង​ការពារ​គណបក្ស​ប្រឆាំង

អ្នក​គាំទ្រ​បក្ស​ប្រជាជន​ធ្វើ​បាតុកម្ម​ប្រឆាំង​សង្គ្រោះ​ជាតិ​កាលពី​ចុង ឆ្នាំ​មុន​។
អ្នក​គាំទ្រ​បក្ស​ប្រជាជន​ធ្វើ​បាតុកម្ម​ប្រឆាំង​សង្គ្រោះ​ជាតិ​កាលពី​ចុង ឆ្នាំ​មុន​។ ហេង ជីវ័ន

សមត្ថកិច្ច​ត្រៀម​កងកម្លាំង​ការពារ​គណបក្ស​ប្រឆាំង

ភ្នំពេញៈ ក្រសួង​មហា​ផ្ទៃ និង​សាលា​រាជធានី​ភ្នំពេញ​បាន​ត្រៀម​កម្លាំង​រួច​រាល់​ហើយ​ក្នុង​ការ​ការពារ​សន្តិសុខ សុវត្ថិភាព​ដល់​មេដឹកនាំ និង​តំណាង​រាស្ត្រ​គណបក្ស​ប្រឆាំង​ទៅ​តាម​សំណើ​ដែល​ជា​ក្តី​ព្រួយបារម្ភ​របស់​គណបក្ស​នេះ​បន្ទាប់ពី​មាន​ការ​គំរាម​ធ្វើ​បាតុកម្ម​ពី​ក្រុម​យុវជន​គាំទ្រ​គណបក្ស​ប្រជាជន​ខណៈ​ដែល​បាតុកម្ម​ស្រដៀង​គ្នា​នេះ​កាលពី​លើក​មុន​មាន​ការ​វ៉ៃដំ​ទៅលើ​អ្នក​តំណាង​រាស្ត្រ​គណបក្ស​ប្រឆាំង​ពីរ​រូប​ឲ្យ​រងរបួស​ធ្ងន់​។

អ្នក​នាំ​ពាក្យ​ក្រសួង​មហាផ្ទៃ​លោក ខៀវ សុភ័គ ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​លោក​បាន​ផ្ញើ​លិខិត​ទៅ​រដ្ឋមន្ត្រី​ក្រសួង​មហាផ្ទៃ​លោក ស ខេង រួចរាល់​ហើយ និង​បាន​ចារ​លិខិត​ទៅ​ស្ថាប័ន​ពាក់ព័ន្ធ​ឱ្យ​ត្រៀម​កម្លាំង​សមត្ថកិច្ច​ការពារ​សន្តិសុខ​សុវត្ថិភាព​នៅ​ស្នាក់​គណបក្ស​សង្គ្រោះ​ជាតិ និង​នៅ​កន្លែង​មួយ​ចំនួន​ទៀត​តាម​ការ​ស្នើសុំ។ តែ​លោក​មិន​អាច​បញ្ជាក់​ពី​ចំនួន​សមត្ថកិច្ច​ដែល​នឹង​ត្រូវ​ចេញ​ប្រតិបត្តិការ​នោះ​ទេ។

លោក​បញ្ជាក់​ថា៖ «សម្តេច (ស ខេង) បាន​ចាត់ចែង​អស់​​ហើយ​កម្លាំង​ទូទាំង​ប្រទេស​តែ​ខ្ញុំ​គិត​ថា​នឹង​មិន​មាន​អំពើ​ហិង្សា​ណា​មួយ​កើត​ឡើង​ឡើយ»។

ចំណែក​អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ បាន​ឲ្យ​ដឹង​​ថា​លោក​បាន​ទទួល​លិខិត​ស្នើសុំ​ហើយ និង​បាន​ធ្វើការ​ណែនាំ​ដល់​សមត្ថកិច្ច និង​អាជ្ញាធរ​មូលដ្ឋាន​ឱ្យ​រៀបចំ​ការពារ​ផង​ដែរ។

លោក​បន្ដ​ថា៖ «នេះ​ជា​កាតព្វកិច្ច​របស់​យើង​ខ្ញុំ​ក្នុង​ការ​ការពារ​សុវត្ថិភាព​សព្វ​ថ្ងៃ​មិនមែន​ប្រកាន់​គណបក្ស​ណា​ទេ​គណបក្ស​នយោបាយ​ណា​ក៏ដោយ​ប្រជាពលរដ្ឋ​ណា​ក៏ដោយ​យើង​ការពារ​ទាំង​អស់​ហើយ​យើង​នឹង​ពង្រឹង​ការងារ​នេះ​បន្ថែម​ទៀត»។

ទោះ​បី​ជា​យ៉ាង​ណា​លោក​មិន​​បាន​ប្រាប់​ពី​ចំនួន​សមត្ថកិច្ច​ដែល​នឹង​ត្រូវ​ដាក់​ការពារ​ទេ​ដោយ​ថា​សមត្ថកិច្ច​របស់​អាជ្ញាធរ​ដែល​កំពុង​ធ្វើការ​។

លោក នេត សាវឿន អគ្គស្នងការ​នគរបាល​ជាតិ​បាន​បដិសេធ​​ធ្វើ​អធិប្បាយ​ដោយ​ថ្លែង​យ៉ាង​ខ្លី​ថា៖ «ខ្ញុំ​កំពុង​ជាប់​ប្រជុំ​ទូរស័ព្ទ​ទៅ​អ្នក​នាំ​ពាក្យ​ខ្ញុំ​ទៅ»។ ប៉ុន្តែ​លោក គៀត ច័ន្ទថារិទ្ធ អ្នក​នាំពាក្យ​ទូរស័ព្ទ​ចូល​តែ​ពុំ​មាន​អ្នក​ទទួល។

ក្រោយ​ពី​មាន​អ្នក​គាំទ្រ​គណបក្ស​ប្រជាជន​ប្រកាស​ធ្វើ​បាតុកម្ម​ប្រឆាំង​គណបក្ស​សង្គ្រោះ​ជាតិ​រួច​មក​គណបក្ស​សង្គ្រោះ​ជាតិ​បាន​ដាក់​លិខិត​សុំ​អន្តរាគមន៍​ពី​ក្រសួង​មហាផ្ទៃ និង​ពី​សាលា​រាជធានី​ដើម្បី​ឱ្យ​មាន​វិធានការ​ដាក់​កម្លាំង​ការពារ​សន្តិសុខ សុវត្ថិភាព​ជូន​ថ្នាក់​ដឹកនាំ​បក្ស​របស់​ខ្លួន។

ក្នុង​លិខិត​បាន​លើក​ឡើង​ថា៖ «សូម​ឯកឧត្តម​មេត្តា​ចាត់​កម្លាំង​ការពារ​សន្តិសុខ​សុវត្ថិភាព​ទីស្នាក់ការ​កណ្តាល​គណបក្ស​រួម​ទាំង​គេហដ្ឋាន​លោក សម រង្ស៊ី គេហដ្ឋាន​លោក កឹម សុខា ព្រម​ទាំង​អ្នក​តំណាងរាស្ត្រ​ថ្នាក់ដឹកនាំ និង​សមាជិក​បក្ស​ដោយ​ក្តី​អនុគ្រោះ»។

ប្រធាន​គណៈកម្មាធិការ​ប្រតិបត្តិ​នៃ​គណបក្ស​សង្គ្រោះ​ជាតិ​លោក ម៉ន ផល្លា បាន​ថ្លែង​ថា​រហូត​មក​ដល់​ម៉ោង ៥ លា្ងច​ម្សិលមិញ​លោក​ពុំ​ទាន់​ទទួល​បាន​ការ​ឆ្លើយតប​ពី​ស្ថាប័ន​មាន​សមត្ថកិច្ច​ទៅ​តាម​​ពាក្យ​ស្នើសុំ​អន្តរាគមន៍​នោះ​នៅ​ឡើយ​ទេ។ តែ​លោក​ថា​ជា​ស្មារតី​លោក​សង្ឈឹម​ថា​ក្រសួង​ពាក់ព័ន្ធ​នឹង​មាន​វិធានការ​ទប់ស្កាត់​រាល់​អំពើ​ហិង្សា​ដែល​នឹង​កើត​មាន​លើ​ប្រជាពលរដ្ឋ និង​អ្នក​តំណាងរាស្ត្រ​គ្រប់​គ្នា។

លោក​ថា៖ ​«ប្រទេស​យើង​មាន​ច្បាប់​ហើយ​យើង​បាន​ស្នើ​ទៅ​ស្ថាប័ន​មាន​សមត្ថកិច្ច​ទាក់ទង​កាតព្វកិច្ច​ដែល​ការពារ​ដល់​ប្រជាពលរដ្ឋ​ទាំង​អស់​គណបក្ស​នយោបាយ​ដើម្បី​ធានា​សន្តិសុខ​សុវត្ថិភាព​ស្រប​តាម​រដ្ឋធម្មនុញ្ញ​ដូច្នេះ​ខ្ញុំ​គិត​ថា​ក្រសួង​នឹង​មាន​វិធានការ​ការពារ​ទប់ស្កាត់​អំពើ​ហិង្សា​ណា​មួយ​ដែល​អាច​នឹង​កើតឡើង​ជាយថា​ហេតុ​ដូចជា​ហេតុការណ៍​កន្លង​មក»។

តំណាង​ក្រុម​សម្ព័ន្ធ​យុវជន​គាំទ្រ​គណបក្ស​ប្រជាជន​លោក សាំង សុង បាន​ប្រាប់​ភ្នំពេញ​ប៉ុស្តិ៍​ថា​បណ្តាញ​របស់​លោក​នៅ​សហរដ្ឋ​អាមេរិក​កំពុង​តាមដាន​ស្ថានការណ៍​ពលរដ្ឋ​ខ្មែរ​ធ្វើ​បាតុកម្ម​ប្រឆាំង​នឹង​លោក​នាយក​រដ្ឋមន្ត្រី ហ៊ុន សែន។

លោក​បញ្ជាក់​ថា​ បើ​ស្ថានភាព​នៅ​ទី​នោះ​មាន​សភាព​ធ្ងន់ធ្ងរ​ដែល​ធ្វើ​ឱ្យ​ប៉ះពាល់​ដល់​កិត្តិយស​ប្រមុខ​រដ្ឋាភិបាល​ខាង​លោក​នឹង​ធ្វើ​បាតុកម្ម​ភ្លាម​តែ​ម្តង​​នៅ​មុខ​ទីស្តីការ​គណបក្ស​សង្គ្រោះ​ជាតិ។ តែ​លោក​ថា​អ្វី​ដែល​លោក​ទទួល​ដំណឹង​មក​ការ​ធ្វើ​បាតុកម្ម​នៅ​សហរដ្ឋ​អាមេរិក​មាន​ការ​ប្រែប្រួល​ច្រើន។

លោក​ថា៖ «​អ្នក​ដែល​ចុះ​ឈ្មោះ​​ធ្វើ​បាតុកម្ម​ប្រហែល​ជា​អាច​ដកថយ​ចំនួន​ច្រើន​ដែរ​បើ​តាម​លោក​ដឹង​អ្នក​មក​ចុះ​ឈ្មោះ​ធ្វើ​បាតុកម្ម​មកពី​បី​រដ្ឋ​ហើយ​នៅ​សល់​តែ ១០០ នាក់​ប៉ុណ្ណោះ​»។

យ៉ាង​ណា​ក៏ដោយ​បើ​តាម​លោក​ សុង ក្រុម​របស់​លោក​នៅ​តែ​រក្សា​ជំហរ​ធ្វើ​បាតុកម្ម​ដដែល​គឺ​អាស្រ័យ​ទៅ​លើ​កាលៈទេសៈ​។

នៅ​ក្នុង​ហ្វេសប៊ុក​របស់​នាយក​រដ្ឋមន្ត្រី ហ៊ុន សែន ក៏​បាន​អំពាវនាវ​ឱ្យ​ពលរដ្ឋ​ខ្មែរ​ទាំង​ក្នុង និង​ក្រៅ​ស្រុក​ត្រូវ​រួបរួម​គ្នា​។

លោក​សរសេរ​ថា៖ ​«ទោះ​បី​នរណា​កាន់​បក្ស​ណា ឬ​កាន់​សាសនា​អ្វី​គឺ​យើង​រួម​គ្នា​ដើម្បី​ផលប្រយោជន៍​ជាតិ​សូមមេត្តា​កុំ​ទាស់​គ្នា​ក្នុង​ស្រុក​ហើយ​មក​ទាស់​គ្នា​នៅ​ក្រៅ​ស្រុក​ហែកហួរ​បំផ្លាញ​សេចក្តីសុខ​របស់​ខ្មែរ​ឲ្យ​បរទេស​ជាន់​ឈ្លី​មើល​​ងាយ​ជាតិ​សាសន៍​យើង»​៕

អត្ថបទគួរចាប់អារម្មណ៍