.jpg)
លោក សម រង្ស៊ី កាលពីមិនទាន់និរទេសខ្លួនឯង។ ហេង ជីវ័ន
ភ្នំពេញៈ រាជរដ្ឋាភិបាលកម្ពុជាក៏ដូចសមត្ថកិច្ចកម្ពុជានឹងចាត់វិធានការតាមច្បាប់ប្រឆាំងវត្តមានលោក សម រង្ស៊ី នៅកម្ពុជាប្រសិនបើមានសំណើពីតុលាការចំពោះសកម្មភាពបំពានសាលក្រមតុលាការរបស់អតីតប្រធានគណបក្សសង្គ្រោះជាតិរូបនេះ។ នេះបើតាមសេចក្តីថ្លែងការណ៍របស់អ្នកនាំពាក្យ រាជរដ្ឋាភិបាល។
ការត្រៀមចាត់វិធានការតាមច្បាប់នេះបានកើតឡើងបន្ទាប់ពីមន្ត្រីជាន់ខ្ពស់អតីតគណបក្សសង្គ្រោះជាតិមួយចំនួនដែលមាននិន្នាការទៅខាងលោក សម រង្ស៊ី បានរៀបចំផែនការសម្រាប់ដំណើរវិលត្រឡប់របស់លោក សម រង្ស៊ី មកកម្ពុជាវិញ។
តាមសេចក្តីថ្លែងការណ៍របស់អ្នកនាំពាក្យរាជរដ្ឋាភិបាលកាលពីថ្ងៃទី ២២ មករាឆ្នាំនេះបានឲ្យដឹងថា ប្រសិនបើមានសំណើពីតុលាការចំពោះការធ្វើមាតុភូមិនិវត្តន៍របស់ សម រង្ស៊ី ថា ជាការបង្កើតរូបភាពនយោបាយពាក់ព័ន្ធនឹងសកម្មភាពអតីតគណបក្សសង្គ្រោះជាតិដែលត្រូវបានចាត់ទុកជាអំពើប្រឆាំងនឹងអំណាចតុលាការនោះ រាជរដ្ឋាភិបាលកម្ពុជាក៏ដូចជាសមត្ថកិច្ចពាក់ព័ន្ធនឹងចាត់វិធានការតាមច្បាប់។
សេចក្តីថ្លែងការណ៍បញ្ជាក់ថា៖ «រាជរដ្ឋាភិបាលសូមបញ្ជាក់ថាគឺនៅតែរក្សានិងគោរពអនុវត្តនូវគោលការណ៍ប្រជាធិបតេយ្យនៃការបែងចែកអំណាចដាច់ដោយឡែកពីគ្នារវាងអំណាចនីតិប្រតិបត្តិនិងអំណាចតុលាការ ក៏ដូចជា អំណាចនីតិប្បញ្ញត្តិផងដែរ។ នៅក្នុងបរិការណ៍នេះ បើមានការស្នើសុំណាមួយពីតុលាការ រាជរដ្ឋាភិបាលក៏ដូចជាសមត្ថកិច្ចពាក់ព័ន្ធនឹងចាត់វិធានការអនុវត្តតាមអំណាចផ្លូវច្បាប់»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងថា ការធ្វើមាតុភូមិនិវត្តន៍របស់ សម រង្ស៊ី គឺជាឆន្ទៈបុគ្គលសុទ្ធសាធពីព្រោះការចាកចេញពីមាតុភូមិរបស់សម រង្ស៊ីក៏ជាជម្រើសផ្ទាល់ខ្លួន និងមានចរិតជាឯកជន។ លោកថា រដ្ឋាភិបាលស្វាគមន៍ ការធ្វើមាតុភូមិនិវត្តន៍របស់លោក សម រង្ស៊ី។
លោកបញ្ជាក់ថា៖ «យើងផ្តល់ព័ត៌មានតាមផ្លូវច្បាប់និងវិធានការរបស់រាជរដ្ឋាភិបាលជូនដល់ប្រជាពលរដ្ឋរបស់យើង។ យើងរាជរដ្ឋាភិបាល យើងមានវិធានផ្លូវច្បាប់គ្រប់គ្រាន់ក្នុងការចាត់វិធានការចំពោះជនណាដែល
ប្រមាថសាលដីកាតុលាការប្រសិនបើតុលាការស្នើសុំការអន្តរាគមន៍ពីរាជរដ្ឋាភិបាល»។
លោក មាស នី អ្នកវិភាគនយោបាយយល់ថា លោក សម រង្ស៊ី មិនហ៊ានត្រឡប់មកកម្ពុជាមុនពេលទោសទណ្ឌរបស់គាត់ត្រូវបានលើកលែងទេ ហើយរដ្ឋាភិបាលហ៊ានចាត់វិធានការផ្លូវច្បាប់ចំពោះលោក សម រង្ស៊ី បើទោះបីមានអ្នកទៅគាំទ្ររូបលោកច្រើនយ៉ាងណាក៏ដោយ។
លោកបានបញ្ជាក់ថា៖ «វាគ្រាន់តែជាសារឌឺដងដាក់គ្នា ហើយខ្ញុំគិតថា ដំណើរវិលត្រឡប់របស់លោក សម រង្ស៊ី លុះត្រាណាមានការសម្របសម្រួលពីអន្តរជាតិ តែបើគ្មានការសម្របសម្រួលណាមួយនោះគាត់នឹងប្រឈមមុខនឹងគ្រោះថ្នាក់ច្រើន។ វាជារឿងធម្មតាទេដោយសារកន្លងមក រាជរដ្ឋាភិបាលបានចាត់វិធានផ្លូវ ច្បាប់លើសកម្មជននយោបាយ ផ្សេង។ អ្វីៗអាចកើតឡើងបានហើយគេអាចចាប់គាត់បាន»។
លោក សម រង្ស៊ី ធ្លាប់បានប្រកាសថា លោកមានបំណងត្រឡប់មកកម្ពុជាម្តងហើយម្តងទៀតចាប់ពីលោកបាននិរទេសខ្លួនឯងទៅបរទេសកាលពីឆ្នាំ ២០១៦ ប៉ុន្តែជាក់ស្តែងលោកមិនបានវិលត្រឡប់មកកម្ពុជាដូចធ្លាប់សន្យានោះឡើយ។
ទាក់ទងនឹងការប្រកាសវិលត្រឡប់មកកម្ពុជាវិញនេះ លោក គង់ គាំ ទីប្រឹក្សាគណបក្សឆន្ទៈខែ្មរដែលទើបទទួលបានសិទ្ធិធ្វើនយោបាយឡើងវិញបានថ្លែងកាលពីថ្ងៃចន្ទថាលោកមិនរំពឹងថា លោកសម រង្ស៊ី នឹងចូលមកស្រុកខ្មែរទេមុនពេលទទួលបាន ការលើកលែងទោស។
លោកថ្លែងថា៖ «ដូច្នេះសុទ្ធតែជាការសាបខ្យល់ ខ្លាចតែអ្នកដែលកំពុងធ្វើតាមខ្យល់នោះបែរជាទទួលព្យុះទៅវិញបានន័យថា នយោបាយសាបព្រោះខ្យល់របស់អ្នកក្រៅប្រទេស ធ្វើឲ្យអ្នកក្នុងប្រទេសរងគ្រោះ។ ឧទាហរណ៍ជាក់ស្ដែងដូចជាលោក គង់ ម៉ាស់ នៅស្វាយរៀង ក្រសួងមហាផ្ទៃហៅសួរហើយបញ្ជូនទៅព្រៃស ដោយសារតែយុទ្ធនាការម្រាមដៃស្អាត និងផែនការនានាក្រៅប្រទេសហ្នឹងហើយ»។
លោក សម រង្ស៊ី បច្ចុប្បន្នកំពុងហ៊ុមព័ទ្ធដោយក្តីក្តាំជាច្រើននៅតុលាការ ហើយករណីខ្លះត្រូវបានតុលាការកាត់ទោសជាបន្តបន្ទាប់រួចទៅហើយ ក្នុងនោះមានសំណុំរឿងព្រហ្មទណ្ឌដូចជា ត្រូវតុលាការផ្ដន្ទាទោសឱ្យជាប់ពន្ធនាគារ ៥ ឆ្នាំពាក់ព័ន្ធនឹងករណីក្លែងឯកសារព្រំដែន កម្ពុជា-វៀតណាម និងផ្តន្ទាទោសឱ្យជាប់ពន្ធនាគារ ១ ឆ្នាំ ៨ ខែចំពោះករណីបរិហារកេរ្តិ៍និងញុះញង់ចោទប្រកាន់លោក ហ៊ុន សែន ថាជាអ្នកនៅពីក្រោយខ្នងឃាតកម្មលើលោក បណ្ឌិត កែម ឡី និងមានសំណុំរឿងផ្សេងទៀតដែលមិនទាន់ជម្រះក្ដីនៅឡើយ៕
