ព្រះសីហនុៈ ដោយផ្អែកលើលទ្ធផលធ្វើកោសល្យវិច័យសាកសព និង ពិនិត្យនៅកន្លែងកើតហេតុសមត្ថកិច្ចបានអះអាងថា បុរសម្នាក់ដែលស្លាប់ នៅភូមិ ៥ សង្កាត់លេខ ៤ ក្រុង-ខេត្ត ព្រះសីហនុ កាលពីថ្ងៃទី ២១ មេសា នោះ ពុំមែនករណីឃាតកម្មទេ ប៉ុន្តែ ជាការធ្វើអត្តឃាតខ្លួនឯង ។
លោក កុល ផាលី ស្នងការរងនគរបាលខេត្តព្រះសីហនុ បានប្រាប់ភ្នំពេញ ប៉ុស្តិ៍ កាលពីម្សិលមិញថា ជនរងគ្រោះឈ្មោះ ស៊ន់ ជា អាយុ ៣០ឆ្នាំ ស្នាក់បន្ទប់ជួលក្នុង ភូមិ-សង្កាត់ កើតហេតុខាងលើ បានធ្វើអត្តឃាតខ្លួនឯងព្រោះក្នុងបន្ទប់របស់គាត់មានចាក់សោពីខាងក្នុង។
លោកថា៖ «មុនដំបូងសមត្ថកិច្ចខ្ញុំ ស្មានតែមានគេសម្លាប់គាត់ ប៉ុន្តែក្រោយពីពិនិត្យមើលនៅកន្លែងកើតហេតុបញ្ជាក់ថាគ្មានតម្រុយណាដែលគួរឲ្យសង្ស័យថាជាអំពើឃាតកម្មទេ។ ករណីនេះ ខ្ញុំបញ្ចប់ការស្រាវជ្រាវហើយ»។
បើតាម លោក កុល ផាលី នៅជុំវិញបន្ទប់កើតហេតុមិនឃើញមានអ្វីគួរឲ្យសង្ស័យថា អាចមាននរណាសម្លាប់ជនរងគ្រោះទេ។ រីឯ ខាងក្នុងបន្ទប់ក៏គ្មានប្រឡោះចូលដែលនេះបញ្ជាក់ថាជនរងគ្រោះធ្វើអត្តឃាតខ្លួនឯង។
លោក សំ ប្រាក់ នាយនគរបាលប៉ុស្តិ៍សង្កាត់លេខ ៤ ក្រុងព្រះសីហនុ ប្រាប់ដោយផ្អែកតាមសម្តីសាក្សីថា ជនរងគ្រោះមានគ្នា ៣ នាក់ដែលមានស្រុកកំណើតនៅ ខេត្តសៀមរាប ។ ប៉ុន្តែ ពួកគាត់បាននាំគ្នាមកខេត្តព្រះសីហនុ និង បានជួលបន្ទប់ស្នាក់នៅក្នុង ភូមិ-សង្កាត់ កើតហេតុ ដើម្បីប្រកបមុខរបរលក់ដូរ និង ធ្វើការតាមក្រុមហ៊ុនឯកជន។
ក៏ប៉ុន្តែសាក្សីថា ជនរងគ្រោះមិនសូវធ្វើការបានជាប់លាប់ទេ ដោយសារអាការរោគ (សរសៃប្រសាទ) របស់គាត់។ លុះព្រឹកឡើងថ្ងៃទី ២១ ខែ មេសា គ្នីគ្នារបស់គាត់ ២ នាក់ទៀតបានចេញទៅធ្វើការអស់។ លុះដល់ម៉ោងប្រមាណ ៥ ល្ងាច ថ្ងៃដដែល ស្រ្តីម្ចាស់បន្ទប់ជួលបានទៅមើលបន្ទប់ជនរងគ្រោះព្រោះឃើញបិទទ្វារជិត ហើយបានយកដៃរុញទ្វារនោះតែជាប់គន្លឹះពីខាងក្នុង។
លោកបន្តថា ដោយឃើញដូច្នោះស្រ្តីម្ចាស់ផ្ទះមានសង្ស័យក៏អើតមើលតាមចន្លោះបង្អួចក៏ឃើញជនរងគ្រោះដេកដោយមានប្រឡាក់ឈាមនៅលើកំរាលឥដ្ឋផង។ ពេលនោះស្រ្តីម្ចាស់ផ្ទះបានស្រែកឲ្យអ្នកជិតខាងមកជួយពិនិត្យមើលភិនភាគរបស់ជនរងគ្រោះ និង ស្នាមឈាមហូរដែលដំបូងសង្ស័យថា អាចជាអំពើឃាតកម្ម។ ប៉ុន្តែ អ្នកជិតខាងគ្រាន់តែនាំគ្នាអើតមើលប៉ុណ្ណោះ ព្រោះរង់ចាំឲ្យសមត្ថកិច្ចនគរបាលពិនិត្យជាមុនសិន។
លោកបញ្ជាក់ថា បន្ទាប់មក ម្ចាស់ផ្ទះបានរាយការណ៍ប្រាប់សមត្ថកិច្ចរបស់លោកហើយលោកបានរាយការណ៍បន្តទៅ លោក ជួន ណារិន្ទ ស្នងការនគរបាលខេត្តព្រះសីហនុ ហើយបានដឹកនាំសមត្ថកិច្ចជំនាញផ្នែកបច្ចេកទេសវិទ្យាសាស្រ្តចុះទៅទីតាំងកើតហេតុរួចបានគាស់ទ្វារបន្ទប់នោះដើម្បីចូលពិនិត្យសាកសព។
លោកថ្លែងថា៖ «នៅក្នុងបន្ទប់នោះមានតែគាត់ម្នាក់ឯងសូម្បីរកតែច្រកចេញមកក្រៅមួយប្រឡោះតូចគឺអត់មានទាំងអស់ អីចឹងយើងសន្និដ្ឋានទៅគឺជនរងគ្រោះសម្លាប់ខ្លួនឯងច្រើនជាង»។
លោកបន្តថា ក្រៅពីនោះសមត្ថកិច្ចបានឃើញកាំបិតចិតបន្លែតូចមួយមានប្រឡាក់ឈាមនៅក្បែរសាកសពហើយនៅផ្នែក ក មានស្នាមអារ ដាច់បំពង់កដែលបង្ហាញពីលក្ខណៈធ្វើអត្តឃាតខ្លួនឯង។
ចំណែកបុរស ២ នាក់ដែលមានស្រុកកំណើតជាមួយជនរងគ្រោះបានប្រាប់សមត្ថកិច្ចថាជនរងគ្រោះមានជំងឺសសៃប្រសាទតែគេមិនដឹងថាគាត់មានលិខិតបញ្ជាក់ពីគ្រូពេទ្យឬយ៉ាងណាទេ។ពួកគេថាជនរងគ្រោះបានប៉ងសម្លាប់ខ្លួន២ទៅ៣ដងមកហើយតែមានគេជួយទាន់។ ប៉ុន្តែដល់ពេលលើកនេះគាត់នៅម្នាក់ឯងក៏មានឱកាសសម្លាប់ខ្លួនបានសម្រេច។
លោកបញ្ជាក់ថា ក្រោយធ្វើកោសល្យវិច័យរួចសមត្ថកិច្ចបានប្រគល់សាកសពជូនក្រុមគ្រួសារគាត់ហើយ៕