ភ្នំពេញៈ ស្ត្រីម្នាក់ដែលគេប្រទះឃើញសាកសពហើមស្អុយនៅក្នុងបន្ទប់ជួលត្រូវបានសមត្ថកិច្ចដាក់ការសន្និដ្ឋានថា អាចត្រូវបានមិត្តប្រុសរបស់នាងសម្លាប់ បន្ទាប់មកមិត្តប្រុសនោះបានសម្លាប់ខ្លួនជាក្រោយនៅទីតាំងផ្សេងគ្នាដែលហេតុការណ៍នេះបានធ្វើឲ្យមានការភ្ញាក់ផ្អើលនៅថ្ងៃទី ២២ កក្កដា ក្នុងភូមិដំណាក់ធំ ៣ សង្កាត់ស្ទឹងមានជ័យ៣ ខណ្ឌមានជ័យ។
លោក ឯម ភារី នាយនគរបាលប៉ុស្តិ៍រដ្ឋបាលសង្កាត់ស្ទឹងមានជ័យ ៣ ឲ្យដឹងពីម្សិលមិញថា ស្ត្រីរងគ្រោះឈ្មោះ សួង ធី អាយុ ៣៣ ឆ្នាំជាកម្មការិនីរោងចក្រកាត់ដេរ រីឯមិត្តប្រុសរបស់នាងឈ្មោះ ពៅ វុធ អាយុ ៣០ ឆ្នាំក៏ជាកម្មកររោងចក្រដូចគ្នាដែរ។ សពស្ត្រីរងគ្រោះមានស្លាកស្នាមច្របាច់នៅត្រង់បំពង់ក ហើយមានឃើញខ្សែភ្លើងឆក់។
លោកថា៖ «ការសម្លាប់នេះ សមត្ថកិច្ចជំនាញផ្នែកកោសល្យវិច័យដាក់ការសង្ស័យថា គ្មាននរណាសម្លាប់ស្ត្រីរងគ្រោះក្រៅពីមិត្តប្រុសរបស់នាងទេ បន្ទាប់មកមិត្តប្រុសនោះទៅសម្លាប់ខ្លួនជាក្រោយ»។
លោកប្រាប់បន្តថា ករណីនេះបើតាមសាក្សីដែលរស់នៅជិតទីតាំងបន្ទប់ជួលរបស់ស្ត្រីរងគ្រោះបាននិយាយប្រាប់សមត្ថកិច្ចថា ជនរងគ្រោះទាំង ២ នាក់នេះគេមិនដឹងថា ជាប្តីប្រពន្ធនឹងគ្នាឬយ៉ាងណាទេ ប៉ុន្តែពួកគេស្រលាញ់គ្នារបៀបជាសង្សា តែស្នាក់នៅបន្ទប់ជួលខុសគ្នាក្នុងភូមិតែមួយ។
កាលពីថ្ងៃទី ២០ ខែកក្កដា អ្នករស់នៅក្បែរបន្ទប់ស្ត្រីរងគ្រោះបានឃើញនាង និងមិត្តប្រុសចេញពីធ្វើការធម្មតា និងនាំគ្នាមកបន្ទប់ជួលរបស់ស្ត្រីរងគ្រោះ។ ប៉ុន្តែព្រឹកថ្ងៃទី ២២ ខែកក្កដា ប្រជាពលរដ្ឋនៅក្បែរបន្ទប់ជួលនោះធំក្លិនស្អុយក៏នាំគ្នាគាស់ទ្វារបន្ទប់ចូលទើបឃើញសាកសពស្ត្រីរងគ្រោះហើម និងមានក្លិនស្អុយ។
លោកបញ្ជាក់ទៀតថា ចំណែកបុរសឈ្មោះ ពៅ វុធ ដែលជាមិត្តប្រុសរបស់នាងក៏ត្រូវបានពលរដ្ឋប្រទះឃើញដេកស្លាប់ នៅប៉ុន្មានម៉ោងក្នុងថ្ងៃដែលប្រទះឃើញសាកសពស្ត្រីរងគ្រោះដែរ ប៉ុន្តែបុរសនោះស្លាប់នៅបន្ទប់ជួលផ្សេងគ្នា។ បើតាមការធ្វើកោសល្យវិច័យរបស់នគរបាល និងគ្រូពេទ្យរកឃើញថា បុរសនោះស្លាប់ដោយគាំងបេះដូង។
ទោះយ៉ាងណាបើតាមលោកវេជ្ជបណ្ឌិត នង សុវណ្ណរ័ត្ន ជាគ្រូពេទ្យឯកទេស ជំនាញផ្នែកកោសល្យវិច័យសាកសពនៃក្រសួងសុខាភិបាលបានប្រាប់ពីម្សិលមិញថា តាមការពិនិត្យយ៉ាងហ្មត់ចត់របស់លោកឃើញថា សាកសពរបស់ស្ត្រីរងគ្រោះគឺមានស្នាមច្របាច់ក ហើយមានស្នាមឆក់ខ្សែភ្លើងទៀត។ ដូច្នេះមានន័យថាជនសង្ស័យច្របាច់កស្ត្រីរងគ្រោះ ហើយខ្លាចមិនទាន់ស្លាប់បានយកខ្សែភ្លើងឆក់បន្ថែម ព្រោះនៅផ្នែកឌុយខ្សែភ្លើងក៏មានឃើញស្នាមទូស្សេដែរ។
លោកបញ្ជាក់ថា សាកសពស្ត្រីម្នាក់នោះអាចត្រូវគេសម្លាប់ចន្លោះ ៣ ថ្ងៃមុន ព្រោះសាកសពមានសភាពស្អុយហើមខ្លាំងទៅហើយ។ ចំពោះបុរសដែលស្លាប់នោះវិញ គឺលោកមិនអាចកំណត់អត្តសញ្ញាណបានថា ជាប្តីរបស់ស្ត្រីរងគ្រោះឬយ៉ាងណាទេ តែនៅមុនពេលស្លាប់គាត់បានប្រាប់គេថា គាត់ឆ្អល់ចុងដង្ហើមឈឺដើមទ្រូងហើយព្រឹកឡើងថ្ងៃទី ២២ កក្កដា គេក៏ឃើញគាត់ដេកស្លាប់នៅក្នុងបន្ទប់ជួល។ «ដូច្នេះរោគសញ្ញាទាំងអស់នេះដែលប្រទេសកម្ពុជាយើងប្រជាពលរដ្ឋច្រើនមានបញ្ហាជំងឺបេះដូង»។ លោកបញ្ជាក់ថា៖ «ការស្លាប់របស់បុរសនោះទាក់ទងនឹងបញ្ហាជំងឺបេះដូងទេ»៕