The Phnom Penh Post Search

Search form

Logo of Phnom Penh Post newspaper Phnom Penh Post - សមត្ថកិច្ច​ទទួល​អាំងប៉ាវ​ទាំង​ឯកសណ្ឋាន​រង​ការ​រិះគន់




សមត្ថកិច្ច​ទទួល​អាំងប៉ាវ​ទាំង​ឯកសណ្ឋាន​រង​ការ​រិះគន់

សមត្ថកិច្ច​តម្រង់​ជួរ​ទទួល​អាំងប៉ាវ​នៅ​ផ្ទះ​ឧកញ៉ា សុខ គង់ ដែល​ស្ថិត​នៅ​តាម​មហាវិថី​នរោត្តម​ រាជធានី​ភ្នំពេញ​កាលពី​ថ្ងៃ​ម្សិលមិញ​។
សមត្ថកិច្ច​តម្រង់​ជួរ​ទទួល​អាំងប៉ាវ​នៅ​ផ្ទះ​ឧកញ៉ា សុខ គង់ ដែល​ស្ថិត​នៅ​តាម​មហាវិថី​នរោត្តម​ រាជធានី​ភ្នំពេញ​កាលពី​ថ្ងៃ​ម្សិលមិញ​។ ហេង ជីវ័ន

សមត្ថកិច្ច​ទទួល​អាំងប៉ាវ​ទាំង​ឯកសណ្ឋាន​រង​ការ​រិះគន់

ភ្នំពេញៈ មន្ត្រី​សាធារណៈ​រួម​មាន​នគរបាល​ចរាចរណ៍​ផង​ដែរ​នោះ​បាន​ឈរ​តម្រៀប​គ្នា​ជា​ជួរ​នៅ​ឯ​គេហដ្ឋាន​លោក​ឧកញ៉ា សុខគង់ ស្ថិត​នៅ​តាម​បណ្តោយ​មហា​វិថី ព្រះនរោត្តម​កាលពី​ម្សិលមិញ​ដើម្បី​រង់​ចាំ​ទទួល​យក​ថវិកា​ (អាំងប៉ាវ) ពី​ក្រុម​គ្រួសារ​របស់​គាត់​ក្នុង​ឱកាស​បុណ្យ​ចូល​ឆ្នាំ​ ចិន-វៀតណាម ​ដែល​អ្នក​រិះគន់​យល់​ថា​ការ​ផ្តល់​ដល់​មន្ត្រី​ឯកសណ្ឋាន​ទាំង​នេះ​គឺជា​រូបភាព​មួយ​គួរ​ចៀសវាង​ព្រោះ​សាធារណ​មតិ​នឹង​គិត​ថា​ពួកគេ​នឹង​អនុវត្ត​ការងារ​មិន​អព្យាក្រឹត​នោះ​ឡើយ​។

ជា​ទម្លាប់​រាល់​ឆ្នាំ​ក្រុម​គ្រួសារ​ឧកញ៉ា សុខគង់ ដែល​ជា​ម្ចាស់​ក្រុមហ៊ុន សូគីម៉ិចគ្រុប រកស៊ី​លើ​ប្រេង​ឥន្ធនៈ កាស៊ីណូ ​និង​សណ្ឋាគារ​បាន​អះអាង​ថា​ពួកគេ​តែងតែ​ផ្តល់​អំណោយ​​បន្តិច​បន្តួច​ដល់​មន្ត្រី និង​​ពលរដ្ឋ​សាមញ្ញ​ដែល​មិនមែន​ជា​ការ​លើក​ទឹកចិត្ត​នោះ​ទេ។

ស្ត្រី​ម្នាក់​ជា​សមាជិក​នៃ​ក្រុម​គ្រួសារ​ដែល​និយាយ​ប្រាប់​អ្នក​កាសែត​កាលពី​ម្សិលមិញ​ឲ្យ​ដឹង​ថា​ជា​ពិធី​សែន​ដក​ជើង​ធូប​មុន​ថ្ងៃ​ចូល​ឆ្នាំ​ចិន​ដូច្នេះ​ក្រុម​គ្រួសារ​​ដែល​គ្រួសារ​តែង​ធ្វើ​ទាន​រាល់​ឆ្នាំ។

អ្នកស្រី​ថា​៖ «យើង​ចែក​នេះ​សម្រាប់​ក្នុង​ឱកាស​គម្រប់​ខួប​ ៣០ ឆ្នាំ​របស់​លោក​ឪពុក​»។

ក្រៅពី​មន្ត្រី​ឯកសណ្ឋាន​ទាំង​នេះ​គេ​ក៏​សង្កេត​ឃើញ​មាន​ក្រុម​ប្រជាពលរដ្ឋ​ជាច្រើន​រយ​នាក់​ផង​ដែរ​ដែល​បាន​ឈរ​តម្រៀប​គ្នា​ជា​ជួរ​ទទួល​យក​ថវិកា​ដែល​គ្មាន​ដាក់​ក្នុង​អាំងប៉ាវ ឬ​ស្រោម​សំបុត្រ​ចែក​ជូន​ដល់​​ពួកគេ។ ក្មេងៗ​ទទួល​បាន​ ៥ ពាន់​រៀល​មនុស្ស​វ័យ​ជំទង់​ទទួល​បាន​ ១ ម៉ឺន​រៀល​រីឯ​ជន​ពិការ​ទទួល​បាន​ម្នាក់ ៣ ម៉ឺន​រៀល​។

មន្ត្រី​នគរបាល​ម្នាក់​អះអាង​ថា​ការ​ទទួល​​នេះ​មិន​ច្រើន​នោះ​ទេ​ហើយ​ក៏​មិន​ខុស​អី​ដែរ «ធ្វើ​យ៉ាង​ណា​បើ​ប្រាក់​ខែ​ប៉ូលិស​តិចតួច»។

លោក ហួត ចាន់យ៉ារ៉ាន់ អធិការ​នគរបាល​ខណ្ឌ​ដូនពេញ​ថ្លែង​ថា​លោក​មិន​បាន​ដឹង​ពី​ការ​ចែក​លុយ​កាក់​នោះ​ទេ​តែ​ជាទូទៅ​ក្រុម​ឧកញ៉ា​ដែល​ជា​សែ​ស្រឡាយ​ចិន​តែង​ធ្វើការ​ចែក​ថវិកា​អ៊ីចឹង​ហើយ។

ពេល​សួរ​ថា​មន្ត្រី​ខណ្ឌ​របស់​លោក​មាន​ទៅ​ទទួល​ឬ​អត់​លោក​ឆ្លើយ​ទំនង​ជា​ខឹង​ថា «ខ្ញុំ​អត់​ដឹង​ទេ​អត់​នៅ​ហ្នឹង​ទេ​ព្រោះ​ជាប់​ប្រជុំ​ម៉េច​គ្រាន់តែ​រឿង​អ៊ីចឹង​ក៏​ឆ្ងល់​ប្លែក​ដែរ?»។

ប៉ុន្តែ​លោក ចេវ ហាក់ នាយការិយាល័យ​នគរបាល​ចរាចរណ៍​រាជធានី​ភ្នំពេញ​ទទួល​ស្គាល់​ថា​មាន​មន្ត្រី​នគរបាល​ចរាចរណ៍​រាជធានី​ទៅ​ផ្ទះ​ឧកញ៉ា សុខ គង់ ទទួល​លុយ​ពិត​មែន​ហើយ​ក៏​មិនមែន​ជា​រឿង​ចម្លែក​នោះ​ទេ​ព្រោះ​ជា​ «ប្រពៃណី​របស់​ជនជាតិ​ចិន​ក្នុង​ពេល​ចូល​ឆ្នាំ»។

លោក​ ហាក់ បន្ដ​ថា៖ «ឧកញ៉ា​មួយ​ចំនួន​រួម​ទាំង​ឧបនាយក​រដ្ឋមន្ត្រី​ សុខ អាន ផង​ដែរ​តែង​ធ្វើការ​ចែក​អាំងប៉ាវ​នៅ​ថ្ងៃ​ចូលឆ្នាំ​ចិន​អ៊ីចឹង។ វា​ជា​រឿង​ធម្មតា​ហើយ​យើង​គេ​ហៅ​ទៅ​តើ!​»។

ទោះ​យ៉ាង​ណា​លោក សន ជ័យ នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា (ANSA) បាន​ថ្លែង​ថា​ក្នុង​រូបភាព​មន្ត្រី​ពាក់​ឯកសណ្ឋាន​រដ្ឋ​អ៊ីចឹង​ការ​ទទួល​យក​អាំងប៉ាវ​ ឬ​អ្វី​មួយ​​ពី​ក្រុម​ឧកញ៉ា​គឺ​ជា​រឿង​មិន​ត្រឹមត្រូវ​នោះ​ឡើយ។

លោក​ថា​៖ «ធ្វើ​ដូច្នេះ​វា​ប៉ះពាល់​មុខមាត់​កងកម្លាំង​​យើង​តែ​ក៏​គ្មាន​ច្បាប់​ហាម​ឃាត់​ពួកគាត់​ដែរ។ វា​អាច​ជា​រូបភាព​អាក្រក់​មួយ​មាន​អត្ថន័យ​ច្រើន​ប៉ះពាល់​អត្តសញ្ញាណ​មន្ត្រី​ទាំង​នេះ។ អ៊ីចឹង​ក្រសួង​ពាក់ព័ន្ធ​ចូរ​ពិចារណា»។

លោក​បន្ត​ថា៖ «អាច​គេ​ថា​កងកម្លាំង​ប្រដាប់​អាវុធ​ហ្នឹង​មិន​អព្យាក្រឹត​ព្រោះ​ទទួល​​ប្រយោជន៍​ពី​ក្រុម​ឧកញ៉ា​ហើយ​បើ​ឧកញ៉ា​ទាំងនោះ​ធ្វើ​អ្វី​ខុស​នោះ​ពួកគេ​អាច​នឹង​ការពារ​ច្រើន​ជាង»៕

អត្ថបទគួរចាប់អារម្មណ៍