ភ្នំពេញៈ កម្លាំងសមត្ថកិច្ចសរុបចំនួន ៨ ម៉ឺននាក់ នឹងត្រូវដាក់ពង្រាយ ដើម្បីការងារសន្តិសុខពេលបោះឆ្នោតជ្រើសតាំងតំណាងរាស្ត្ររដ្ឋសភា នៅថ្ងៃទី ២៩ ខែកក្កដា ខាងមុខ ខណៈដែល គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីណែនាំអំពីសន្តិសុខសុវត្ថិភាពសម្រាប់ការបោះឆ្នោតនេះ។
នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ និង ជាអ្នកនាំពាក្យអគ្គស្នងការដ្ឋាននគរបាលជាតិបានថ្លែង កាលពីថ្ងៃទី ១៨ ខែមេសាថា កម្លាំងសមត្ថកិច្ចសរុប ៨ ម៉ឺននាក់ នឹងត្រូវដាក់ពង្រាយ ដើម្បីរក្សាសន្តិសុខការបោះឆ្នោតសកលជ្រើសតាំងតំណាងរាស្ត្រខាងមុខនេះ។
នៅក្នុងគេហទំព័រនគរបាលជាតិបានស្រង់សម្ដី របស់លោកក្នុងក្នុងពិធីបើកវគ្គបណ្តុះបណ្តាលគ្រូបង្គោល ស្តីពីច្បាប់បទបញ្ជា និង នីតិវិធីសម្រាប់ការបោះឆ្នោត និង ក្រមសីលធម៌សម្រាប់ភ្នាក់ងារសន្តិសុខបោះឆ្នោតដែលមានរយៈពេល ៣ ថ្ងៃ គឺពីថ្ងៃទី ១៨ ដល់ថ្ងៃទី ២០ ខែមេសានេះ នៅអគ្គស្នងការដ្ឋាននគរបាលជាតិ។
ភ្នំពេញ ប៉ុស្តិ៍ មិនអាចសុំការបំភ្លឺបន្ថែមពីលោក គៀត ច័ន្ធថារិទ្ធ បានទេ នៅថ្ងៃព្រហស្បតិ៍នេះ ប៉ុន្តែគេហទំព័រនគរបាលជាតិបានស្រង់សម្ដី លោកដែលបានអះអាងថា កម្លាំងទាំង ៨ ម៉ឺននាក់នេះ «មកពីកងយោធពលខេមរភូមិន្ទ និង កងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំសង្កាត់ និងក្រុង ស្រុក ខណ្ឌ ប្រមាណជាង ២ ម៉ឺននាក់ ផងដែរ»។
កាលពីសប្តាហ៍មុន គណៈកម្មាធិការជាតិរៀបចំការបោះឆ្នោត បានចេញសេចក្តីណែនាំមួយដល់ប្រធានគណៈកម្មការរាជធានីខេត្ត ដោយស្នើឲ្យសហការជាមួយស្នងការដ្ឋានរាជធានីខេត្តគ្រប់លំដាប់ថ្នាក់ និង ភាគីពាក់ព័ន្ធចាត់វិធានការឲ្យទាន់ពេលវេលាក្នុងករណីមានករណីអសន្តិសុខណាមួយកើតឡើង។
កាលពីបោះឆ្នោត ឃុំ-សង្កាត់ ឆ្នាំ ២០១៧ កន្លងទៅ កម្លាំងសមត្ថកិច្ចចំនួន ៥ ម៉ឺននាក់ត្រូវបានដាក់ពង្រាយដើម្បីការពារសន្តិសុខពេលបោះឆ្នោត៕