.jpg)
ផលិតផលក្លែងក្លាយ ដែលគ្រោងរៀបចំពិធីដុតកម្ទេច។ ហេង ជីវ័ន
ភ្នំពេញ: គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយគ្រោងរៀបចំពិធីដុតកម្ទេចផលិតផលក្លែងក្លាយ និងខូចគុណភាពដែលសមត្ថកិច្ចរឹបអូសបានប្រមាណជាង ១១០ តោន ដោយក្នុងនោះ ១០ តោន នឹងត្រូវដុតបំផ្លាញចោលនៅខេត្តកំពង់ធំនៅចុងខែកុម្ភៈ និងជាង ១០០ តោនទៀតគ្រោងដុតបំផ្លាញចោលនៅអំឡុងដើមខែមីនា។
លោក លីវ សុផាណារិទ្ធ អ្នកនាំពាក្យគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃបានថ្លែងពីម្សិលមិញថា គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយនឹងធ្វើការបែងចែកជា ២ ដំណាក់កាលគឺទី ១ គណៈកម្មាធិការគ្រោងរៀបចំដុតបំផ្លាញផលិតផលក្លែងក្លាយចំនួន ១០ តោន នៅខេត្តកំពង់ធំនៅចុងខែកុម្ភៈនេះ ដែលមានដូចជា គ្រឿងសម្អាង គ្រឿងឧបភោគបរិភោគ និងផលិតក្លែងក្លាយមួយចំនួន។ ចំណែកដំណាក់កាលទី ២ គ្រោងនឹងដុតបំផ្លាញផលិតផលក្លែងក្លាយ ប្រមាណ ១០០ តោននៅអំឡុងដើមខែមីនា ក្រោយពីតុលាការបានចេញដីកាអនុញ្ញាតឲ្យធ្វើការកម្ទេចចោល។
លោកបញ្ជាក់ថា៖ «គម្រោងដុតកម្ទេចផលិតផលក្លែងក្លាយ និងខូចគុណភាពប្រមាណជាង ១១០ តោននេះ គឺយើងបានការយល់ព្រមពីតុលាការខេត្តកំពង់ធំ និងតុលាការរាជធានីភ្នំពេញហើយ អ៊ីចឹងយើងធ្វើការដុតបំផ្លាញចោលទាំងអស់តែម្ដង ប៉ុន្ដែពេលនេះខ្ញុំមិនទាន់ដឹងពីពេលវេលាជាក់លាក់នៅឡើយ។ ជុំវិញការវាយតម្លៃទំនិញខូចគុណភាពទាំងនោះមានតម្លៃប៉ុន្មាននោះគឺខ្ញុំអត់ចាំច្បាស់ទេ»។
លោក ទ្បី សុភាព ប្រធានសមាគមសហព័ន្ធវិនិយោគិនកម្ពុជា និងជាប្រធានសមាគមអ្នកលក់ឱសថកម្ពុជាថ្លែងថា លោកគាំទ្រចំណាត់ការរបស់សមត្ថកិច្ចជំនាញក្នុងការចាត់វិធានការចំពោះឈ្មួញខិលខូចដែលតែងរកស៊ីក្លែងបន្លំគុណភាពទំនិញ។
លោកបន្តថា លោកចង់ឲ្យមានកិច្ចសហប្រតិបត្តិការរួមគ្នា រវាងសមាគម និងអាជ្ញាធរលើការផ្សព្វផ្សាយ អប់រំ បណ្តុះបណ្តាលធនធានមនុស្ស និងបច្ចេកទេសដោយប្រើប្រាស់វិធាននានា ឬកំណត់វិធីសាស្ត្រក្នុងការសម្គាល់អត្តសញ្ញាណផលិតផលឱសថ គ្រឿងសម្អាងក្លែងក្លាយខុសច្បាប់នាំចូលដោយគ្មានអាជ្ញាប័ណ្ណ រំលោភលើកម្មសិទ្ធិបញ្ញា រំលោភលើសិទ្ធិនាំចូលផ្ដាច់មុខ ដើម្បីពង្រឹងវិធានការទប់ស្កាត់ និងបង្ក្រាបផលិតផលក្លែងក្លាយ ខុសច្បាប់ និងថតទុកនូវរាល់ប្រភេទនៃផលិតផលទាំងនោះដែលបង្កគ្រោះថ្នាក់ដល់អ្នកប្រើប្រាស់។
លោកបញ្ជាក់ថា៖ «កន្លងមកនេះខ្ញុំមានការកត់សម្គាល់ថាមានក្រុមឈ្មួញមួយចំនួនគាត់នាំចូលផលិតផលច្រើនប្រភេទមកលក់ដោយមានអ្នកខ្លះគាត់ដឹងថា ផលិតផលគាត់ក្លែងក្លាយ ខូចគុណភាព ប៉ុន្ដែគាត់ធ្វើពុតជាមិនដឹង ហើយនៅតែបន្តលក់ទៅឲ្យអ្នកផ្សេងប្រើប្រាស់ រីឯមួយចំនួនទៀតគាត់អត់ដឹងថា ផលិតផលគាត់ក្លែងក្លាយ ឬខូចគុណភាពទេគឺគាត់ក៏លក់ឲ្យគេប្រើដែរ ដោយសារតែគាត់អត់ដឹងផលិតផលនោះយ៉ាងម៉េច។ ដូច្នេះយើងទាំងអស់គ្នា ត្រូវតែចូលរួមផ្សព្វផ្សាយ ដើម្បីលុបបំបាត់ផលិតផលក្លែងក្លាយនៅលើទីផ្សារយើង»។
កាលពីថ្ងៃទី ៩ ខែកុម្ភៈ គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ និងសមាគមសហព័ន្ធវិនិយោគិនកម្ពុជាបានចុះហត្ថលេខាលើអនុស្សរណៈយោគយល់គ្នា ដើម្បីប្រយុទ្ធប្រឆាំងការនាំចូល ការផលិត និងការចែកចាយផលិតផល ឱសថ គ្រឿងសម្អាង ដែលក្លែងក្លាយនាំចូលគ្មានការអនុញ្ញាត រំលោភកម្មសិទ្ធិបញ្ញា និងរំលោភសិទ្ធិនាំចូលផ្តាច់មុខ។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយថ្លែងថា កន្លងមកគណៈកម្មាធិការបានប្រតិបត្តិការបង្ក្រាប និងបំផ្លាញចោលផលិតផលខុសច្បាប់ជាច្រើនលើក និងមានចំនួនរាប់រយតោនរួមមាន ផលិតផលឱសថ គ្រឿងសម្អាង ផលិតផលប្រើប្រាស់ និងគ្រឿងឧបភោគបរិភោគខុសច្បាប់ និងខូចគុណភាពជាច្រើនសន្ធឹកសន្ធាប់ និងបានឃាត់ខ្លួនជនសង្ស័យបញ្ជូនទៅតុលាការ ដើម្បីផ្តន្ទាទោសតាមច្បាប់ជាច្រើននាក់។
លោកបន្ដថា ការចុះអនុស្សរណៈយោគយល់គ្នាកាលពីថ្ងៃទី ៩ ខែកុម្ភៈ មិនត្រឹមតែផ្តល់អត្ថប្រយោជន៍ដល់អ្នកប្រើប្រាស់ប៉ុណ្ណោះទេ គឺថែមទាំងការពារអ្នកវិនិយោគសុចរិត និងសហគ្រាសទាំងឡាយដែលប្រកបរបរស្របច្បាប់ មានភាពស្មោះត្រង់ និងរកស៊ីប្រកួតប្រជែងដោយភាពត្រឹមត្រូវ ដើម្បីរួមចំណែកក្នុងការអភិវឌ្ឍសេដ្ឋកិច្ច និងពិតជាបានផ្តល់នូវសុវត្ថិភាពចំណីអាហារជូនដល់ប្រជាជនកម្ពុជា៕
