.jpg)
សមត្ថកិច្ចចុះបង្ក្រាបទីតាំងកែច្នៃឈើខុសច្បាប់នៅខេត្តព្រះវិហារ កាលពីសប្ដាហ៍មុន។ រូបថត សហការី
ព្រះវិហារ: សមត្ថកិច្ចបង្ក្រាបទីតាំងកែច្នៃឈើខុសច្បាប់ ២ ទីតាំងស្ថិតនៅឃុំស្រអែម ស្រុកជាំក្សាន្ត ខេត្តព្រះវិហារ និងរឹបអូសឈើធ្នង់ និងឈើចម្រុះប្រភេទជាច្រើនដុំ ប៉ុន្តែជនល្មើសដែលជាម្ចាស់ទីតាំងបានគេចខ្លួនមុនពេលសមត្ថកិច្ចទៅដល់។
លោក ពឺង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារបានថ្លែងពីម្សិលមិញថា សមត្ថកិច្ចជំនាញនៃខណ្ឌរដ្ឋបាលព្រៃឈើខេត្តបានសហការជាមួយមន្ត្រីកងរាជអាវុធហត្ថស្រុកជាំក្សាន្ដ បាននិងកំពុងធ្វើការស្រាវជ្រាវរកជនសង្ស័យដែលបានលួចបើកអាជីវកម្មកែច្នៃឈើខុសច្បាប់ទាំង ២ ទីតាំងនោះ។
ការបង្ក្រាបនេះធ្វើបន្ទាប់ពីមានសេចក្ដីរាយការណ៍ពីប្រជាពលរដ្ឋមូលដ្ឋាន ប៉ុន្ដែភ្លាមៗនោះជនសង្ស័យដែលជាម្ចាស់អាជីវកម្មបានរត់គេចខ្លួន។ ចំណែកវត្ថុតាងឈើ និងសម្ភារបម្រើឱ្យអាជីវកម្មកែច្នៃឈើទាំងអស់ត្រូវបានសមត្ថកិច្ចប្រមូលយកមករក្សាទុកនៅស្នាក់ការសង្កាត់រដ្ឋបាលព្រៃឈើស្រុកជាំក្សាន្ដ ដើម្បីបន្តនីតិវិធីច្បាប់។
លោកបញ្ជាក់ថា៖ «ចំពោះចំនួនឈើទាំងអស់ ខ្ញុំមិនទាន់បានដឹងពីទំហំ ឬចំនួនម៉ែត្រគុបទេ ព្រោះមន្ត្រីជំនាញយើងកំពុងធ្វើការវាស់វែង ហើយឈើភាគច្រើនជាប្រភេទឈើធ្នង់ និងឈើលាយម្រុះ។ (នៅថ្ងៃទី ២៣ វិច្ឆិកា) ខ្ញុំមិនទាន់បានទទួលរបាយការណ៍អ្វីបន្ថែមទៀតពីមន្ត្រីជំនាញយើងទេ»។
លោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារពីម្សិលមិញមិនទាន់អាចទាក់ទងសុំការបញ្ជាក់បន្ថែមជុំវិញករណីនេះបានទេ ដោយលោកបានបិទទូរស័ព្ទ។
លោកបន្តថា នៅពេលកម្លាំងសមត្ថកិច្ចចុះទៅដល់ទីតាំងសិប្បកម្មទាំង ២ នោះជនល្មើសដែលជាជនជាតិវៀតណាមបានរត់គេចខ្លួនអស់ដោយបន្សល់ទុកវត្ថុតាងសម្ភារកែច្នៃឈើ និងឈើប្រណីតជាច្រើនកំណាត់។ លោក ពេជ្រ សុភី មេបញ្ជាការកងរាជអាវុធហត្ថស្រុកជាំក្សាន្តពីម្សិលមិញមិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។
លោក ហ៊ុយ សុផុន នាយប៉ុស្ដិ៍នគរបាលរដ្ឋបាលឃុំស្រអែមបានបញ្ជាក់ថាពិតជាមានការបង្ក្រាបទីតាំងឈើនោះមែន៕
