.jpg)
សមត្ថកិច្ចកំពុងពិនិត្យសំណាកសត្វព្រៃ នៅពេលចុះបង្ក្រាបកាលពីម្សិលមិញ។ រូបថត Fresh News
ភ្នំពេញៈ សំណាកសត្វព្រៃជាច្រើនប្រភេទក្នុងនោះមានសំណាកសត្វព្រៃប្រភេទកម្រ និងជិតផុតពូជត្រូវបានក្រុមអន្ដរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើចាប់រឹបអូសពីទីតាំងហាងកែច្នៃចម្លាក់មួយកន្លែង នៅក្នុងសង្កាត់ច្បារអំពៅ ២ កាលពីរសៀលម្សិលមិញបើទោះបីជាមានការបញ្ជាក់ថាទីតាំងនេះគ្រាន់តែជាអ្នកស៊ីឈ្នួលកែច្នៃឆ្លាក់សំណាកសត្វព្រៃទាំងនេះរបស់អតិថិជនក៏ដោយ។
មន្ត្រីកងរាជអាវុធហត្ថដែលចូលរួមនៅក្នុងប្រតិបត្តិការនេះបានប្រាប់ភ្នំពេញប៉ុស្តិ៍ក្នុងលក្ខខណ្ឌមិនបញ្ចេញឈ្មោះថា ដោយមានកិច្ចសហការសម្របសម្រួលពីតំណាងអយ្យការអមសាលាដំបូងរាជធានីភ្នំពេញនៅរសៀលថ្ងៃចន្ទ ទី ១២ ខែ វិច្ឆិកា ក្រុមអន្ដរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ រួមជាមួយកងរាជអាវុធហត្ថលើផ្ទៃប្រទេសបានចុះត្រួតពិនិត្យទីតាំងហាងចម្លាក់មួយឈ្មោះ «ចឹក ម៉េង លក់ និងឆ្លាក់វត្ថុស័ក្ដិសិទ្ធិ» ស្ថិតនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ និងបានរកឃើញសំណាកសត្វព្រៃជាច្រើនប្រភេទដែលរួមមានសំណាកភ្លុកដំរី សំណាកចែដំរីកែច្នៃ ខ្នាយជ្រូកព្រៃ ធ្មេញ និងក្រចកខ្លាឃុំ ចុងស្នែងប្រើស ជើងឈ្លូសក្រៀម នុបប្រើស ស្នែងកេះ និងសម្ភារផ្សេងៗមួយចំនួនទៀត។
ប្រភពដដែលបន្តថាម្ចាស់ទីតាំងខាងលើនោះឈ្មោះ ម៉ុក ទិព្វរាសី ភេទស្រី អាយុ ២២ ឆ្នាំមានលំនៅផ្ទះលេខ ១៦៦ ផ្លូវលេខ ៣៦៩ ភូមិ-សង្កាត់ខាងលើនេះ។
ប្រភពបានបន្ថែមថា៖ «ការដកហូតនូវសំណាកសត្វព្រៃទាំងនេះបានធ្វើឡើងបន្ទាប់ពីម្ចាស់ទីតាំងចម្លាក់ខាងលើនេះពុំមានលិខិតអនុញ្ញាតពីរដ្ឋបាលព្រៃឈើស្ដីពីការធ្វើសន្និធិសំណាកសត្វព្រៃនោះឡើយ»។
ជុំវិញករណីនេះបុរសជាជាងចម្លាក់នៅក្នុងហាងចម្លាក់ខាងលើដែលប្រាប់ថា ឈ្មោះ ម៉េង បានប្រាប់ភ្នំពេញប៉ុស្តិ៍ថាហាងចម្លាក់របស់គាត់មានប័ណ្ណប៉ាតង់ចេញពីអាជ្ញាធរខណ្ឌច្បារអំពៅ ហើយថាសំណាកសត្វទាំងនោះគឺជារបស់អតិថិជនដែលគេយកមកជួលឲ្យគាត់ឆ្លាក់ និងកែច្នៃជារូបភាពផ្សេងៗ មិនមែនជាកម្មសិទ្ធិរបស់គាត់នោះទេ។
លោក ម៉េង បានបញ្ជាក់ថា៖ «យើងគ្រាន់តែជាជាងចម្លាក់ ហើយបើកហាងឆ្លាក់ដើម្បីទទួលបានកម្រៃតិចតួចសម្រាប់ចិញ្ចឹមជីវិតប៉ុណ្ណោះ មិនមែនជាអ្នករកស៊ីជួញដូរ ឬប្រមាញ់សត្វព្រៃនោះទេ»។
លោក ម៉េង បានថ្លែងបន្តថាសំណាកដែលបានឆ្លាក់ជារូបព្រះ [ព្រះពុទ្ធ] រួចទៅហើយមានចំនួន ៣០ រូបក៏ត្រូវបានសមត្ថកិច្ចចាប់រឹបអូសយកទៅដែរ ដែលធ្វើឲ្យគ្រួសារគាត់ត្រូវបង់សំណងទៅអតិថិជនដែលជាម្ចាស់កម្មសិទ្ធិនៃសំណាកទាំងនោះ។
ប៉ុន្តែលោកបានបញ្ជាក់ថាលោកនៅពុំទាន់ដឹងច្បាស់ទេថាតើម្ចាស់សំណាកសត្វព្រៃទាំងនោះបានមកពីណា? ហើយគេនឹងត្រូវទាមទារឲ្យលោកបង់សំណងដល់ពួកគេប៉ុនណានោះដែរ។
លោកបានបន្ថែមថា៖ «នៅពេលនេះពួកយើងមិនដឹងជាត្រូវដោះស្រាយប្រាប់អតិថិជនបែបណានោះទេ បើអាជ្ញាធរប្រមូលចាប់យកទៅអស់បែបនេះ ហើយពួកយើងក៏មិនដឹងថាតើអាជ្ញាធរនឹងចាត់វិធានការបន្តបែបណាទៀតមកលើពួកយើងនោះដែរ»។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និង នេសាទ បានប្រាប់ភ្នំពេញប៉ុស្តិ៍ថា នៅពេលនេះក្រុមមន្ត្រីជំនាញកំពុងចំណាត់ការបន្តលើករណីនេះទៅតាមនីតិវិធីច្បាប់។
លោកបានបញ្ជាក់ថា៖ «ការសន្និធិសត្វព្រៃ ឬសំណាកសត្វព្រៃដោយគ្មានការអនុញ្ញាតពីស្ថាប័នជំនាញគឺជាអំពើខុសច្បាប់។ ចំពោះករណីនេះខ្ញុំនៅពុំទាន់ទទួលបានរបាយការណ៍លម្អិតពីក្រុមមន្ត្រីជំនាញនៅឡើយទេ ព្រោះនៅពេលនេះក្រុមមន្ត្រីជំនាញកំពុងចាត់ការបន្តតាមនីតិវិធី»៕
