ភ្នំពេញៈ មេខ្លោងក្នុងអំពើប្លន់ និងចាប់ជំរិតគ្រួសារមួយក្នុងបុរីអង្គរភ្នំពេញ កាលពីព្រឹថ្ងៃទី ១ ខែមីនា ឆ្នាំ ២០២១ គឺជាអតីតអ្នកបើកបររថយន្តឱ្យគ្រួសារជនរងគ្រោះ។ នេះបើយោងតាមរបាយការណ៍ព័ត៌មានរបស់កងរាជអាវុធហត្ថរាជធានីភ្នំពេញដែល ភ្នំពេញ ប៉ុស្តិ៍ ទទួលបានកាលពីថ្ងៃទី ២ ខែ មីនា ឆ្នាំ ២០២១។
របាយការណ៍បានសរសេរថា អ្នកផ្ដើមគំនិតក្នុងអំពើប្លន់ និងចាប់ជំរិតនោះឈ្មោះ អ៊ឹម សុវណ្ណារិទ្ធ អាយុ ២១ ឆ្នាំ ធ្លាប់ធ្វើជាអ្នកបើកឡានឱ្យម្ចាស់ផ្ទះ ដែលត្រូវបានគេស្គាល់ឈ្មោះ ម៉ៅ ហួរ អាយុ ៥៨ ឆ្នាំ ជាអតីតប្រធានសាខាអគ្គិសនីកម្ពុជា ខេត្តកំពង់ចាម ដែលបច្ចុប្បន្នជាពាណិជ្ជកររកស៊ីដេញថ្លៃផ្គត់ផ្គង់អគ្គិសនីក្នុងតំបន់មួយចំនួនទាំងក្នុងរាជធានីភ្នំពេញ និងបណ្ដាខេត្តមួយចំនួន។ ជនសង្ស័យក្រោយពីឈប់ធ្វើការជាអ្នកបើកបររថយន្តឱ្យក្រុមគ្រួសារលោក ហួរ មួយរយៈក៏បានវិលត្រឡប់មកសុំការងារធ្វើឡើងវិញ តែត្រូវក្រុមគ្រួសារលោក ហួរ បដិសេធ ព្រោះពួកគាត់បានទទួលយកអ្នកបើកបរថ្មីរួចទៅហើយ។
បន្ទាប់ពីនោះមកជនសង្ស័យបានប្រមូលបក្ខពួក ៣ នាក់ផ្សេងទៀត មកចូលរួមរៀបចំគម្រោងការចាប់ជំរិត និងប្លន់សម្លាប់ផ្ដាច់ពូជក្រុមគ្រួសាររបស់លោកហួរដែលមានសមាជិកសរុប ៨ នាក់ ប្ដីប្រពន្ធ និងកូន ៦ នាក់ ព្រមទាំងអ្នកបម្រើការងារនៅក្នុងគេហដ្ឋាន ២ នាក់ទៀត សរុបទាំងអស់ ១០ នាក់។ ប៉ុន្តែគម្រោងការពួកគេត្រូវបានបែកធ្លាយក៏ត្រូវបានកងកម្លាំងពិសេសនៃកងរាជអាវុធហត្ថរាជធានីភ្នំពេញ ចាត់វិធានការបង្ក្រាបដោយបាញ់សម្លាប់ទាំង ៤ នាក់នៅនឹងកន្លែង ខណៈពួកគេកំពុងធ្វើសកម្មភាពចូលប្លន់ និងចាប់ជំរិតម្ចាស់ផ្ទះតាមផែនការរបស់ពួកគេមិនបានសម្រេច កាលពីព្រឹកថ្ងៃទី ១ មីនា ២០២១។
គម្រោងពួកគេជំរិតជនរងគ្រោះឱ្យសរសេរសែក ១ លានដុល្លារ ដើម្បីគំរាមបើកលុយចេញពីធនាគារ ក្រោយពីដកលុយបាន ពួកគេនឹងសម្លាប់មនុស្សក្នុងផ្ទះទាំង ១០ នាក់នោះ ដើម្បីយកលុយ និងគ្រឿងអលង្ការដែលមាននៅក្នុងផ្ទះហើយដឹកសពទៅបោះចោលនៅពេជ្រនិល។
លោក អ៊ុង សិរីគុត្ត ស្នងការនៃស្នងការដ្ឋានបុគ្គលិក បញ្ជាការដ្ឋានអង្គរក្សកាលពីម្សិលមិញបានចេញលិខិតបដិសេធ ចំពោះការផ្សព្វផ្សាយតាមបណ្ដាញសង្គមថា មេខ្លោង ឈ្មោះ អ៊ឹម សុវណ្ណារិទ្ធ ធ្លាប់បម្រើការងារនៅបញ្ជាការដ្ឋានអង្គរក្សនៃអគ្គបញ្ជាការដ្ឋានកងយោធពលខេមរភូមិន្ទកាលពីឆ្នាំ ២០១៩ មានឋានន្តរស័ក្តិជាវរសេនីយ៍ត្រី។ ចំពោះបណ្ឌសម្គាល់បញ្ជាការដ្ឋានអង្គរក្សដែលជនល្មើសបានប្រើប្រាស់នោះ គឺជាបណ្ណក្លែងក្លាយធ្វើឱ្យប៉ះពាល់ដល់កិត្យានុភាពរបស់កងកម្លាំងនៃអគ្គបញ្ជាការដ្ឋានអង្គរក្ស៕