.jpg)
ខ្សែភ្លើងដែលត្រូវជនសង្ស័យលួចកាត់នៅខេត្តព្រសីហនុ។ រូបថត គួច ចំរើន Page
សីហនុៈ នគរបាលខេត្ដព្រះសីហនុនៅថ្ងៃទី ៨ កញ្ញា នេះ បានកសាងសំណុំរឿងបញ្ជូនជនសង្ស័យប្រមាណ ១២ នាក់ ក្នុងចំណោម ១៧ នាក់ ទៅសាលាដំបូងខេត្តនេះ ក្រោយពីបញ្ចប់ការសាកសួរករណីលួចកាត់ខ្សែភ្លើងសម្រាប់តបណ្ដាញបំភ្លឺតាមមហាវិថីនៅក្នុងខេត្ត និងករណីទទួលផលចោរកម្ម។
លោក ជួន ណារិន្ទ បានប្រាប់ភ្នំពេញប៉ុស្ដិ៍នៅថ្ងៃទី ៨ កញ្ញា នេះ ថា ក្រោយបញ្ចប់ការសាកសួរជនសង្ស័យទាំង ១៧ នាក់ សមត្ថកិច្ចរកឃើញថា មានជនសង្ស័យតែប្រមាណ ១២ នាក់ប៉ុណ្ណោះ ដែលជាប់ពាក់ព័ន្ធ។ ចំណែកស្រ្ដីដែលទើបតែមកប្រកបរបរទិញលក់អេតចាយនៅក្នុងខេត្ដ-ក្រុងព្រះសីហនុ ៥ នាក់ រកឃើញថា មិនជាប់ពាក់ព័ន្ធករណីនេះទេ។
លោកស្នងការថ្លែងថា៖ «ក្នុងចំណោមជនជនសង្ស័យដែលត្រូវបញ្ជូនទៅតុលាការទាំងជាង ១០ នាក់នេះ មានប្រុសៗ ២ នាក់ ជាអ្នកលួចកាត់ខ្សែភ្លើងដែលកប់នៅតាមមហាវិថីនានាតែម្ដង។ ក្រៅពីនេះមានអ្នករុញរទេះដើរទិញអេតចាយ និងអ្នកបើកឃ្លាំងទទួលទិញអេតចាយ ជាអ្នកទទួលទិញផលចោរកម្ម»។
លោកបានបន្ថែមថា ជនសង្ស័យទាំងជាង ១០ នាក់នេះ មានលំនៅបច្ចុប្បន្ន នៅក្នុងភូមិគគីរ ឃុំបិតត្រាំង ស្រុកព្រៃនប់។ ប៉ុន្ដែពួកគេភាគច្រើនជាជនចំណាកស្រុកមកពីខេត្ដផ្សេងៗ។
លោក ឃាង ភារម្យ អ្នកនាំពាក្យរដ្ឋបាលខេត្ដ ព្រះសីហនុ បញ្ជាក់នៅថ្ងៃទី៨ កញ្ញា នេះថា ខ្សែភ្លើងដែលជនសង្ស័យខាងលើលួចកាត់ គាស់នេះ គឺជាប្រភេទសម្រាប់តនៅតាមមហាវិថីនានា ដែលទើបតែរៀបចំឡើង ក្នុងគម្រោង ស្ថាបនាផ្លូវទាំង ៣៤ ខ្សែក្នុងខេត្ដ ក្រុង ព្រះសីហនុ។
លោកថ្លែងថា៖ «បើបូកសរុបខ្សែភ្លើងដែលបាត់បង់សរុបទាំងអស់មានជាង ៥ ០០០ ម៉ែត្រ ក្នុងនោះជនសង្ស័យបានលួចកាត់ម្ដង ៣០ ម៉ែត្រៗ ជាចន្លោះនៅតាមមហាវិថីហើយយកទៅលក់ឲ្យអ្នកទិញអេដចាយ។ក្នុងនោះខ្សែភ្លើងដែលទាញយកតែសាច់ស្ពាននៃផ្ទៃខាងក្នុងខ្សែទៅលក់បានក្នុង ១ គីឡូតម្លៃ ១៩ ០០០ រៀល។
យោងតាមរបាយការណ៍របស់ស្នងការដ្ឋានគរបាលខេត្ដព្រះសីហនុជនសង្ស័យចំនួន ១៧ នាក់នោះ រួមមាន ៥ នាក់ ឃាត់ខ្លួននៅទីតាំងទិញលក់អេតចាយ ស្ថិតនៅភូមិ ៥ សង្កាត់ ៤ ក្រុងព្រះសីហនុ ខេត្ដព្រះសីហនុ។ រីឯ ១២ នាក់ទៀតឃាត់ខ្លួននៅទីតាំងទិញលក់អេតចាយមួយកន្លែងទៀតស្ថិតក្នុងឃុំបិតត្រាំង ស្រុកព្រៃនប់ ខេត្ដព្រះសីហនុ ។
ក្រៅពីនេះសមត្ថកិច្ចស្រាវជ្រាវរកឃើញសម្ភារវត្ថុតាងដោយចាប់យកស្ពាន់ខ្សែភ្លើងទម្ងន់ ១៥ គីឡូក្រាមម៉ាក THIPHA Cable 2020 CXV/DSTA 4×12-1x12mm2 ជាកម្មសិទ្ធិរបស់ក្រុមហ៊ុនឌុយវ៉ាល់អេឡិចត្រិចដែលទទួលអនុវត្ត
គម្រោងរៀបចំបណ្ដាញខ្សែភ្លើងនេះ៕
