.jpg)
បុរសសង្ស័យក្រោយពេលសមត្ថកិច្ចឃាត់ខ្លួន ។ រូបថត ហ្វេសប៊ុក
ស្វាយរៀងៈ ជនសង្ស័យម្នាក់ដែលពាក់ព័ន្ធនឹងករណីឃាតកម្មត្រូវបានសមត្ថកិច្ចបញ្ជូនខ្លួនទៅតុលាការខេត្តស្វាយរៀងពីម្សិលមិញ ក្រោយពីជននេះបានវាយបុរសម្នាក់នឹងពូថៅស្លាប់កាលពីថ្ងៃទី ៧ មករា នៅភូមិ-ឃុំដូនសរ ស្រុកស្វាយជ្រំ។
លោក គឹម ឡៃ ប្រធានការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀងថ្លែងថា លោកបានកសាងសំណុំរឿងបញ្ជូនជនសង្ស័យឈ្មោះ ព្រំ ថុល ទៅសាលាដំបូងខេត្តហើយ ដើម្បីចាត់ការបន្តទៅតាមច្បាប់ ព្រោះថាជនសង្ស័យប្រព្រឹត្តបទល្មើសជាក់ស្តែង។
លោកប្រាប់ថា៖ «ជនសង្ស័យប្រាប់សមត្ថកិច្ចយើងថា គាត់ពិតជាបានវាយសម្លាប់ជនរងគ្រោះមែន»។
ពាក់ព័ន្ធករណីនេះដែរ លោក ពិន អាន អធិការនគរបាល ស្រុកស្វាយជ្រំ ប្រាប់ថា ជនសង្ស័យឈ្មោះ ព្រំ ថុល ភេទប្រុស អាយុ ៥៧ ឆ្នាំ ដែលវាយសម្លាប់បុរសរងគ្រោះត្រូវសមត្ថកិច្ចបញ្ជូនបន្តទៅស្នងការដ្ឋាននគរបាលខេត្តស្វាយរៀងហើយ។ រីឯជនរងគ្រោះឈ្មោះ ឥន ស៊ីថា ភេទប្រុស អាយុ ៥៥ ឆ្នាំ។ ពួកគេរស់នៅក្នុងភូមិ-ឃុំ កើតហេតុខាងលើ ។
លោកបញ្ជាក់ថា៖ «ជនសង្ស័យបានប្រព្រឹត្តបទល្មើសជាក់ស្តែង ព្រោះសាក្សីឃើញគាត់វាយសម្លាប់ជនរងគ្រោះ»។
លោក ទិត្យ សុធា នាយនគរបាលប៉ុស្តិ៍ឃុំដូនសរប្រាប់តាមសម្តីសាក្សីថា រវាងជនសង្ស័យ និង ជនរងគ្រោះជាបងប្អូនជីដូនមួយនឹងគ្នា ហើយពួកគេក៏គ្មានការងារអ្វីធ្វើដែរ និងដើរតែផឹកស្រារាល់ថ្ងៃ។ មុនពេលកើតហេតុនៅវេលាម៉ោងប្រមាណជា ១២ ថ្ងៃត្រង់ទី ៧ មករា ជនរងគ្រោះ និងជនសង្ស័យបានជិះម៉ូតូ ១ គ្រឿង ឌុបគ្នាទៅផឹកស្រានៅផ្ទះមិត្តភ័ក្តិរបស់ពួកគេម្នាក់នៅក្នុងភូមិខាងលើ។
លោកបន្តថា ក្រោយពីពួកគេផឹកស្រា ស អស់កន្លះលីត្រមិនដឹងជាយ៉ាងម៉េច ស្រាប់តែគេឃើញជនរងគ្រោះដើរទៅផ្ទះជនសង្ស័យវិញតែម្នាក់ឯង ហើយគេឃើញជនល្មើសជិះម៉ូតូមកតាមក្រោយ។ ពេលនោះគេឃើញជនសង្ស័យចតម៉ូតូចោលហើយជជែកគ្នាជាមួយជនរងគ្រោះមួយសន្ទុះស្រាប់តែគេឮសំឡេងវាយ ហើយអ្នកនៅក្បែរនោះបានទៅមើល។ គ្រានោះគេបានឃើញជនសង្ស័យវាយសំពងជនរងគ្រោះនឹងពូថៅជាច្រើនពូថៅ និងមានប្រឡាក់ឈាមពេញខ្លួនផង។
មន្ត្រីនគរបាលរូបនោះបន្ថែមថា ក្រោយពីអ្នកភូមិឃើញជនរងគ្រោះដេកស្តូកស្តឹង ប្រជាពលរដ្ឋម្នាក់បានរត់ទៅប្រាប់លោក។ ដោយទីតាំងនគរបាលប៉ុស្តិ៍នៅចម្ងាយប្រហែល ៣០០ ម៉ែត្រពីកន្លែងកើតហេតុនោះ លោកបាននាំមន្ត្រីនគរបាលចុះដល់កន្លែងកើតហេតុភ្លាមៗប៉ុន្តែជនរងគ្រោះបានស្លាប់បាត់ទៅហើយ។
លោកថានៅពេលសមត្ថកិច្ចទៅដល់កន្លែងកើតហេតុ ជនសង្ស័យមិនបានរត់គេចខ្លួនទៅណាទេ ហើយលោកក៏បានចាប់ខ្លួនជនសង្ស័យនាំទៅប៉ុស្តិ៍នគរបាលឃុំដូនសរ ដើម្បីសាកសួរ។ ជនសង្ស័យសារភាពថាមូលហេតុដែលគាត់វាយសម្លាប់ជនរងគ្រោះដោយសារជនរងគ្រោះទាស់សម្តីជាមួយគាត់ធ្វើឲ្យគាត់ខឹង និងមិនព្រមនៅផឹកស្រាជាមួយទើបគាត់ខឹងក៏វាយសម្លាប់ទៅ។
លោកថ្លែងថា៖ «ជនសង្ស័យមិនកាប់ទេតែគេយកខ្នងពូថៅវាយ។ ខ្ញុំបានពិនិត្យជនរងគ្រោះឃើញមានស្នាមវាយឡើងទក់សាច់ពីក្បាល និងដងខ្លួន ច្រើនពូថៅពិបាករាប់ចំនួនណាស់»៕
