កំពង់ស្ពឺៈ ក្រុមប្រើដាវសាមូរ៉ៃស្ទាក់ប្លន់អ្នកដំណើរតាមផ្លូវចំនួន ៩ នាក់ ត្រូវបានសមត្ថកិច្ចបញ្ជូនទៅសាលាដំបូងខេត្តពីម្សិលមិញ ក្រោយពីចាប់ខ្លួនបានពីថ្ងៃ ១៣ មីនា នៅភូមិបេង ឃុំព្នាយ ស្រុកសំរោងទង។
លោក សម សាក់ ស្នងការរងទទួលផែនព្រហ្មទណ្ឌកម្រិតធ្ងន់ប្រាប់ពីម្សិលមិញថា ក្រុមជនសង្ស័យត្រូវបានសមត្ថកិច្ចចាប់បញ្ជូនបន្តទៅសាលាដំបូងខេត្តកំពង់ស្ពឺនៅថ្ងៃទី ១៥ មីនា ហើយ បន្ទាប់ពីបញ្ចប់ការសាកសួរ។ ក្នុងក្រុមនេះគឺជាមុខសញ្ញាដែលធ្លាប់ធ្វើសកម្មភាពបទល្មើសជាច្រើនដងក្នុងខេត្តកំពង់ស្ពឺ។ ប៉ុន្តែពួកគេមិនព្រមឆ្លើយសារភាពនៅចំពោះមុខសមត្ថកិច្ចទេ។
លោកថា៖ «យើងបានបញ្ចប់នីតិវិធីសាកសួរពួកគេហើយ។ ពួកគេនឹងត្រូវតុលាការសាកសួរបន្តទៀត»។
លោកឲ្យដឹងទៀតថា ក្រុមនេះរួមមាន ១- ឈ្មោះ ខុន រស្មី ភេទប្រុស អាយុ ១៨ ឆ្នាំ ២- ឈ្មោះ ម៉ក់ ណាឃីម ភេទប្រុស អាយុ ២៤ ឆ្នាំ ៣- ឈ្មោះ ខុម សុផុន ភេទប្រុស អាយុ ១៨ ឆ្នាំ ៤- ឈ្មោះ ខា ម៉ានុត ភេទប្រុស អាយុ ២០ ឆ្នាំ ៥- ឈ្មោះ ចក់ គឹមហួរ ភេទប្រុស អាយុ ១៧ ឆ្នាំ ៦- ឈ្មោះ នឿម រតនា ហៅ ទិ អាយុ ១៩ ឆ្នាំ ៧- ឈ្មោះ ផល តារា ហៅ ឃ្លោក ភេទប្រុស អាយុ ២៣ ឆ្នាំ។ ជនទាំង ៧ នាក់រស់នៅភូមិបេង ឃុំព្នាយ ស្រុកសំរោងទង។
រីឯជន ២ នាក់ទៀតឈ្មោះ ឡុង ពិសិដ្ឋ ហៅករុណា ភេទប្រុស អាយុ ២៣ ឆ្នាំ និងឈ្មោះ កែវ រិទ្ធីសាក់ ហៅសាក់ភេទប្រុស អាយុ ២១ ឆ្នាំ។ ជនទាំង ២ នាក់រស់នៅភូមិអង្គរជា ឃុំព្នាយ ស្រុកសំរោងទង ខេត្តកំពង់ស្ពឺ។ ក្នុងចំណោមជនទាំង ៩ នាក់ ៥ នាក់មានផ្ទុកសារធាតុញៀនក្នុងទឹកនោមដែលសមត្ថកិច្ចនគរបាលប្រឆាំងគ្រឿងញៀនខេត្តកំពង់ស្ពឺពិនិត្យឃើញក្នុងទឹមនោមបន្ទាប់ពីចាប់ខ្លួន។
លោកបញ្ជាក់ថា បើតាមការប្រាប់ពីបុរសរងគ្រោះឈ្មោះ សេង រដ្ឋា អាយុ ២៣ ឆ្នាំ គឺពេលជនរងគ្រោះកំពុងជិះម៉ូតូ ១ គ្រឿងម៉ាក Beat ពណ៌សលាយខៀវ ពាក់ស្លាកលេខកំពង់ស្ពឺ 1Q.7064 ចេញពីធ្វើម្ហូបការនៅផ្ទះរបស់ឈ្មោះ ទៀ ស៊ុយហេង នៅផ្សារស្ពឺមកដល់ចំណុចកើតហេតុ ស្រាប់តែមានមនុស្សជិះម៉ូតូដេញតាមគាត់ពីក្រោយ ហើយក៏មានអ្នកខ្លះជិះវ៉ាទៅពីមុខគាត់ដែរ។ ពេលនោះជនរងគ្រោះបានផ្តួលម៉ូតូហើយរត់ ប៉ុន្តែត្រូវបានបក្ខពួក ក្រុមជនល្មើសដេញកាប់ តែកាប់ជនរងគ្រោះមិនបានក៏ត្រឡប់មក កាប់ម៉ូតូ។ ព្រោះខឹងយកមិនបានហើយនាំគ្នារត់គេចខ្លួនបាត់អស់។ បន្ទាប់មកជនរងគ្រោះរាយការណ៍ប្រាប់សមត្ថកិច្ច ហើយសមត្ថកិច្ចកំណត់មុខសញ្ញាតាមស្រាវជ្រាវរហូតចាប់បាន។
លោកថ្លែងថា៖ «តាមយើងស្រាវជ្រាវ និងពិនិត្យភិនភាគវត្ថុតាងម៉ូតូពណ៌ស ១ គ្រឿងដែលយើងដកហូតបាននោះជាមធ្យោបាយធ្វើសកម្មភាពច្រើនដងហើយតែពួកគេមិនឆ្លើយសារភាពទេ»។
លោកឲ្យដឹងថា ពាក់ព័ន្ធការបង្ក្រាបក្រុមស្ទាក់ប្លន់អ្នកដំណើរតាមផ្លូវនេះ សមត្ថកិច្ចរបស់ស្នងការដ្ឋាននគរបាលខេត្តកំពង់ស្ពឺបង្ក្រាបក្នុងខែធ្នូ ឆ្នាំ ២០១៩ និងដើមខែមករា ឆ្នាំ ២០២០ គឺក្រុមទី ១ ចាប់បាន ១២ នាក់ ក្រុមទី ២ ចាប់បាន ៦ នាក់ និងក្រុមទី ៣ បាន ៩ នាក់ដែលជាបក្ខពួកតែមួយ។
លោក ឃុត សុផល អធិការនគរបាលស្រុកសំរោងទងឲ្យដឹងដែរថា កាលពីវេលាម៉ោង ២ ទៀបភ្លឺថ្ងៃទី ១៣ មីនា ក្រុមជនសង្ស័យទាំង ៩ នាក់ បានស្ទាក់ប្លន់អ្នកដំណើរម្នាក់។ ប៉ុន្តែក្រុមនេះមិនបានបង្ករបួសដល់ជនរងគ្រោះទេដោយបុរសជនរងគ្រោះរត់រួចបានស្រែកបង្កការភ្ញាក់ផ្អើលដល់ពលរដ្ឋ។ បន្ទាប់មកពលរដ្ឋបានរាយការណ៍មកសមត្ថកិច្ចចុះអន្តរាគមន៍ភ្លាមៗស្រាវជ្រាវចាប់បានជនសង្ស័យជាបន្តបន្ទាប់។ ចំពោះវត្ថុតាងប្រព្រឹត្តបទល្មើសដែលសមត្ថកិច្ចដកហូតបានមានម៉ូតូចំនួន ៤ គ្រឿង ដាវចំនួន ២ ដើម និងកាំបិតផ្គាក់ចំនួន ៣៕