.jpg)
ជនសង្ស័យម្នាក់ឈ្មោះ ស៊ីម ឈុនលៀង ហៅតាលៀង ដែលរងបទក្លែងបន្លំ និងកំហែងយកប្រាក់។ រូបថត នគរបាល
សៀមរាប: សមត្ថកិច្ចនគរបាលខេត្តសៀមរាបនៅថ្ងៃព្រហស្បតិ៍នេះបានបញ្ជូនខ្លួនជនសង្ស័យម្នាក់ទៅសាលាដំបូងខេត្តសៀមរាប បន្ទាប់ពីឃាត់ខ្លួនកាលពីថ្ងៃទី ១៣ ខែឧសភា ខណៈបុរសរូបនេះថាខ្លួនជាអ្នកសារព័ត៌មាននិងជាមន្ត្រីនៃមន្ទីរបរិស្ថានខេត្តសៀមរាបហើយបានជំរិតទារប្រាក់ពីម្ចាស់អាជីវកម្មមួយនៅស្រុកក្រឡាញ់ ខេត្តសៀមរាប។
លោក ហួត សុធី ស្នងការរងនគរបាលខេត្តសៀមរាបប្រាប់ភ្នំពេញប៉ុស្ដិ៍ថាសមត្ថកិច្ចជំនាញនៃស្នងការដ្ឋាននគរបាលខេត្តសៀមរាប បានបញ្ជូនខ្លួននិងសំណុំរឿងទៅសាលាដំបូងខេត្តសៀមរាបនៅរសៀលថ្ងៃទី ១៤ ខែឧសភា នេះរួចរាល់ហើយ ប៉ុន្ដែលោកមិនទាន់ដឹងពីនីតិវិធីរបស់តុលាការនៅឡើយ។
លោកបន្តថានៅថ្ងៃទី ១៣ ខែឧសភា កម្លាំងការិយាល័យសន្តិសុខផ្ទៃក្នុងរបស់លោកបានសហការជាមួយមន្ត្រីប៉ុស្តិ៍នគរបាលរដ្ឋបាលសង្កាត់ស្វាយដង្គំក្រុងសៀមរាប បានឃាត់ជនសង្ស័យម្នាក់ឈ្មោះ ស៊ីម ឈុនលៀង ហៅតាលៀងអាយុ ៥៦ ឆ្នាំ មានមុខរបរជាអ្នកសារព័ត៌មាន (មិនចាំឈ្មោះអង្គភាព) រស់នៅភូមិវាលសង្កាត់គោកចកក្រុងសៀមរាប ពីបទក្លែងបន្លំ និងកំហែងយកប្រាក់។
លោកបញ្ជាក់ថា៖ «យើងបានបញ្ជូនគាត់ទៅតុលាការរួចរាល់ហើយ តែតុលាការសម្រេចយ៉ាងណា ខ្ញុំអត់ដឹងទេ។ ការឃាត់ខ្លួននេះ ក្រោយពីយើងបានទទួលពាក្យបណ្តឹងពីតំណាងមន្ទីរបរិស្ថានខេត្តសៀមរាប និងម្ចាស់អាជីវកម្ម១កន្លែង និងក្រោមការស៊ើបអង្កេតពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប និងមានការបញ្ជាផ្ទាល់ពីឯកឧត្តមស្នងការ»។
លោកបានបន្ថែមថា ជនម្នាក់នេះបានធ្វើសកម្មភាពហៅទូរស័ព្ទទៅម្ចាស់អាជីវកម្ម ១ កន្លែង នៅស្រុកក្រឡាញ់ ដោយប្រាប់គេថា ខ្លួនជាមន្ត្រីបរិស្ថានខេត្ត និងជាអ្នកសារព័ត៌មាន ដោយមានបញ្ជាពីថ្នាក់ដឹកនាំខេត្តឲ្យជួយដោះស្រាយបញ្ហាលុយខ្លះ បើមិនអ៊ីចឹងទេ ខ្លួននឹងឲ្យក្រុមការងារចុះត្រួតពិនិត្យអាជីវកម្ម។ ភ្លាមៗនោះ ម្ចាស់អាជីវកម្មបានប្ដឹងមកសមត្ថកិច្ច ដើម្បីចាត់វិធានការតាមច្បាប់។
លោកថា ក្នុងអំឡុងពេលសាកសួរជនសង្ស័យរូបនោះបានឆ្លើយសារភាពថាខ្លួនពិតជាបានធ្វើសកម្មភាពបែបនេះមែន។
លោក យិន ស្រាង អ្នកនាំពាក្យសាលាដំបូងខេត្តសៀមរាបបានថ្លែងពីម្សិលមិញថា លោកមិនទាន់បានទទួលសំណុំរឿងនេះទេ ដោយសារម្សិលមិញជាថ្ងៃឈប់សម្រាក។
លោក លីវ សុខុន ប្រធានមន្ទីរព័ត៌មានខេត្តសៀមរាបបានថ្លែងនៅថ្ងៃព្រហស្បតិ៍នេះដែរថា លោកមិនសូវស្គាល់បុរសដែលសមត្ថកិច្ចឃាត់ខ្លួននេះ ទេ ហើយក៏មិនមានអង្គភាពពិតប្រាកដដែរ។ លោកបានទទួលរបាយការណ៍សមត្ថកិច្ចខ្លះ ដោយជនសង្ស័យបានសារភាពថាខ្លួនបម្រើការងារនៅអង្គភាព«ថ្មីពិត» ប៉ុន្ដែមិនទាន់ដឹងថា គាត់ជាអ្នកសារព័ត៌មាន ឬជានិពន្ធនាយកទេ។
លោកបន្តថា ជនសង្ស័យរូបនេះ ធ្លាប់ទូរស័ព្ទទៅគំរាមម្ចាស់អាជីវកម្មមួយចំនួននៅខេត្តសៀមរាបជាច្រើនលើករួចហើយ ប៉ុន្ដែមិនមានអ្នកហ៊ានចេញមុខប្ដឹង។ ម្យ៉ាងទៀត លោកក៏គ្មានភ័ស្តុតាងគ្រប់គ្រាន់សម្រាប់ដាក់ពាក្យប្ដឹងដែរ ប៉ុន្ដែករណីចុងក្រោយនេះប្រហែលជាម្ចាស់អាជីវកម្មនោះមានភ័ស្ដុតាងត្រឹមត្រូវ ទើបបានជាហ៊ានប្ដឹងបុគ្គលរូបនេះ។
លោកបញ្ជាក់ថា៖ «ខ្ញុំអត់មានមតិអ្វីទេ គ្រាន់តែចង់ឲ្យសមត្ថកិច្ច និងតុលាការធ្វើការងាររបស់ពួកគាត់តាមនិតិវិធីច្បាប់ បើពិនិត្យឃើញទោសកំហុសគាត់បែបណាដាក់ទោសតាមបែបហ្នឹងទៅ ព្រោះបើគាត់ធ្វើសមត្ថភាពបែបនេះ គឺខូចឈ្មោះអ្នកសារព័ត៌មានគេអ្នកល្អៗអស់ហើយ»៕
