.jpg)
បុរសជាជនសង្ស័យម្នាក់ត្រូវបានមន្ត្រីអធិការដ្ឋាននគរបាលស្រុកស្ទឹងហាវ បញ្ជូនខ្លួនទៅស្នងការដ្ឋាននគរបាលខេត្តព្រះសីហនុ។ រូបថត FN
ព្រះសីហនុ: បុរសជាជនសង្ស័យម្នាក់ត្រូវបានមន្ត្រីអធិការដ្ឋាននគរបាលស្រុកស្ទឹងហាវបញ្ជូនខ្លួនទៅស្នងការដ្ឋាននគរបាលខេត្តព្រះសីហនុ ដើម្បីសាកសួរតាមនីតិវីធីច្បាប់ បន្ទាប់ពីសមត្ថកិច្ចឃាត់ខ្លួននៅថ្ងៃទី ២៦ ខែមករា ពាក់ព័ន្ធដឹកនាំពលរដ្ឋរំលោភយកដីធ្លីរបស់រដ្ឋ នៅភូមិ ១ ឃុំទំនប់រលក ស្រុកស្ទឹងហាវ ខេត្តព្រះសីហនុ។
លោក រស់ កី អធិការនគរបាលស្រុកស្ទឹងហាវបានឱ្យដឹងកាលពីថ្ងៃទី ២៦ មករាថា ជនសង្ស័យមានឈ្មោះ អឿន ម៉ាប់ អាយុ ៤១ ឆ្នាំ មុខរបរជាងម៉ាស៊ីនត្រជាក់ មានស្រុកកំណើតភូមិខ្ទុំកណ្ដាល ឃុំជីគរ ស្រុកត្បូងឃ្មុំ ខេត្តត្បូងឃ្មុំ។ បច្ចុប្បន្នស្នាក់នៅឃុំស្មាច់ដែង ស្រុកព្រៃនប់ ត្រូវបានចោទប្រកាន់ពីបទ «ញុះញុង់ឱ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធករណីដឹកនាំពលរដ្ឋរំលោភយកអចលនទ្រព្យរបស់រដ្ឋ។
លោកបន្តថា កម្លាំងនគរបាលស្រុកស្ទឹងហាវនៅព្រឹកថ្ងៃទី ២៦ ខែមករា បានឃាត់ខ្លួនជនសង្ស័យរូបនេះ រួចបញ្ជូនមកការិយាល័យជំនាញចាត់ការបន្ត។ លុះដល់ល្ងាចថ្ងៃទី ២៦ ខែមករា មន្ត្រីជំនាញបានកសាងសំណុំរឿងបញ្ជូនទៅស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីតាមច្បាប់។
លោកបញ្ជាក់ថា៖ «ជនសង្ស័យបាននាំប្រជាពលរដ្ឋមួយក្រុមមកចាប់ដីរបស់រដ្ឋនៅចំណុចដីសម្បទានសង្គមកិច្ចក្នុងភូមិ ១ ឃុំទំនប់រលក កាលពីអំឡុងឆ្នាំ ២០២០ ហើយអាជ្ញាធរបានចុះទៅអប់រំ ណែនាំ និងហាមឃាត់ពីសកម្មភាពហ្នឹង ប៉ុន្ដែជនសង្ស័យ បង្គាប់ញុះញង់ឱ្យពលរដ្ឋនាំគ្នាតវ៉ាបិទផ្លូវ គឺពួកគាត់មករាររាំងការអនុវត្តច្បាប់របស់មន្ត្រីជំនាញ។ ដូច្នេះយើងបានស៊ើបអង្កេតច្បាស់លាស់ ទើបឈានដល់ការឃាត់ខ្លួនតែម្ដង»។
បើតាមលោក រស់ កី ក្រោយពីការចាប់ខ្លួន សមត្ថកិច្ចបានដកហូតវត្ថុតាងរួមមាន រថយន្ត ១ គ្រឿងម៉ាក Landrover ស៊េរី ២០០៥ ពណ៌ខ្មៅ មានស្លាកលេខ ភ្នំពេញ 2W-2723 និងទូរសព្ទ័ ១ គ្រឿង។ ទាំងវត្ថុតាង និងសំណុំរឿងទាំងអស់ត្រូវបានបញ្ជូនទៅស្នងការដ្ឋាននគរបាលខេត្តដើម្បីចាត់ចែងតាមនីតិវិធីច្បាប់។
លោក បូ ណាំ នាយប៉ុស្ដិ៍នគរបាលរដ្ឋបាលឃុំទំនប់រលកបានប្រាប់ពីថ្ងៃទី ២៦ មករា នេះថា សមត្ថកិច្ចលោកបានចូលរួមសហការជាមួយកម្លាំងរបស់អធិការដ្ឋាននគរបាលស្រុកស្ទឹងហាវដែរ ប៉ុន្ដែរបាយការណ៍និងការរៀបចំកំណត់ហេតុនានា ត្រូវបានប្រគល់ជូនមន្ត្រីជំនាញនៃអធិការដ្ឋាននគរបាលស្រុកជាអ្នកចាត់ចែង។
លោកបន្តថា ជនសង្ស័យឈ្មោះ អឿន ម៉ាប់ ធ្លាប់បានដឹកនាំពលរដ្ឋមួយក្រុមដើររំលោភយកដីព្រៃរបស់រដ្ឋ និងដីដែលជាកម្មសិទ្ធិរបស់ពលរដ្ឋផ្សេងទៀតធ្វើជាកម្មសិទ្ធិរបស់ខ្លួន ប៉ុន្ដែត្រូវបានអាជ្ញាធរចុះដោះស្រាយជាបន្តបន្ទាប់។ ចំពោះករណីចុងក្រោយនេះ ជនសង្ស័យបានដឹកនាំពលរដ្ឋមករាររាំងការអនុវត្តច្បាប់របស់អាជ្ញាធរ និងនាំគ្នាធ្វើបាតុកម្មតវ៉ាផងដែរ។
លោក បូ ណាំ បញ្ជាក់ថា៖ «មុនពេលចាប់ខ្លួននេះ យើងបានស៊ើបអង្កេតច្បាស់លាស់អស់ហើយ និយាយរួមចាប់ជនល្មើសម្នាក់ៗ មិនមែនយើងចេះចាប់ៗទេ គឺស្រាវជ្រាវឱ្យច្បាស់លាស់សិន។ កន្លងមក សមត្ថកិច្ចធ្លាប់បានកោះហៅគាត់មកសាកសួរដែរ ប៉ុន្ដែគាត់មិនព្រមចូលបំភ្លឺទេ គឺគាត់គេចវេះរហូត គាត់មិនព្រមសហការជាមួយអាជ្ញាធរទេ អ៊ីចឹងយើងក៏ស្នើសុំបទបញ្ជាពីថ្នាក់លើ ដើម្បីចាត់វិធានការតាមផ្លូវច្បាប់»។
លោក ជួន ណារិន្ទ ស្នងការនគរបាលខេត្តព្រះសីហនុ ពីថ្ងៃទី ២៦ មករានេះ មិនអាចទាក់ទងសុំការបញ្ជាក់ជុំវិញការបញ្ជូនខ្លួនជនសង្ស័យម្នាក់នេះមកស្នងការដ្ឋាននគរបាលខេត្តព្រះសីហនុទេ ដោយទូរស័ព្ទរបស់លោកមិនមានអ្នកទទួល៕
