.jpg)
ជនសង្ស័យពេលសមត្ថកិច្ចឃាត់ខ្លួននៅទីតាំងដាំកញ្ឆា។ រូបថត ប៉ូលិស
តាកែវៈ សមត្ថកិច្ចការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាល ខេត្ត តាកែវ បានកសាងសំណុំរឿងបញ្ជូនបុរសចំណាស់ម្នាក់ទៅសាលាដំបូងខេត្ត តាកែវ ពីម្សិលមិញ បន្ទាប់ពីចាប់ខ្លួនពីថ្ងៃទី ២៤ កុម្ភៈ នៅភូមិជ្រោយ ឃុំ ព្រះបាទជាន់ជុំ ស្រុក គិរីវង់ ខេត្ត តាកែវ ពាក់ព័ន្ធនឹងករណីលួចដាំកញ្ឆាជាច្រើនដើម។
លោក ម៉ាក់ សេរីវឌ្ឍនា ប្រធានការិយាល័យប្រឆាំងបទល្មើសគ្រឿងញៀនឲ្យដឹង កាលពីថ្ងៃអង្គារថា ជនសង្ស័យដែលលួចដាំដើមកញ្ឆានោះ មានឈ្មោះ វ៉ាន់ លីម អាយុ ៦៤ ឆ្នាំ រស់នៅភូមិ-ឃុំ កើតហេតុខាងលើ។ សមត្ថកិច្ចរបស់លោកត្រូវបញ្ជូនគាត់ទៅសាលាដំបូងខេត្ត តាកែវ នៅថ្ងៃទី ២៦ កុម្ភៈ បន្ទាប់ពីបញ្ចប់ការសាកសួរនិងកសាងសំណុំរឿងតាមនីតិវិធីច្បាប់ដោយមិនឃុំខ្លួនគាត់លើសពី ៤៨ ម៉ោងទេ។ ជនសង្ស័យបានលួចដាំដើមកញ្ឆានៅក្នុងចម្ការពោតរបស់គាត់ ពោល គឺគាត់ដាំដើមកញ្ឆានៅចន្លោះគុម្ពពោតលើផ្ទៃដីប្រហែលជា ៥០០ ទៅ ៦០០ ម៉ែត្រការ៉េ ប៉ុន្តែសមត្ថកិច្ចទៅកាប់ដើមកញ្ឆានោះអស់ហើយ។
លោក សេរីវឌ្ឍនា បានបន្តថា ជនសង្ស័យបានលួចដាំដើមកញ្ឆាជាមួយនឹងដំណាំរបស់ខ្លួនដោយគិតថា សមត្ថកិច្ចមិនអាចដឹងបាន។ ប៉ុន្តែតាមរយៈជំនាញ សមត្ថកិច្ចបានស្រាវជ្រាវរហូតឈានទៅបង្ក្រាបនៅថ្ងៃទី ២៤ ខែ កុម្ភៈ ឆ្នាំ ២០២០។ តាមពិតទៅដំណាំកញ្ឆានេះខ្មែរយើងធ្លាប់ដាំ និងជក់តាំងពីដើមរៀងមក ក៏ប៉ុន្តែនៅក្នុងច្បាប់របស់ អង្គការសហប្រជាជាតិ បានចាត់ទុកដំណាំនេះថាខុសច្បាប់។
លោកបានឲ្យដឹងដែរថា នៅស្រុក គិរីវង់ នេះពីមុនមក សមត្ថកិច្ចមិនធ្លាប់ចាប់បានជនសង្ស័យជាអ្នកដាំកញ្ឆាបែបនេះទេ ព្រោះកន្លងមក ជនសង្ស័យតែងតែគេចខ្លួនរួច មុនពេលសមត្ថកិច្ចទៅដល់។ លុះក្រោយមកទើបបានសមត្ថកិច្ចស្រាវជ្រាវដឹង រហូតឈានដល់ចាប់ខ្លួនអ្នកដាំដើមកញ្ឆាបានជាបន្តបន្ទាប់ និងមានការឃុំខ្លួននៅពន្ធនាគារផងដែរ។
បើតាមលោក សេរីវឌ្ឍនា ដំណាំកញ្ឆានេះ គេច្រើនដាំលើកំពូលភ្នំឬតាមជ្រលងភ្នំឬក៏នៅតាមដងអូរដែលជាតំបន់ដាច់ស្រយាលដែលសមត្ថកិច្ចមិនដឹងឬទៅមិនដល់។ ចំពោះការចាប់ខ្លួនបុរសខាងលើ សមត្ថកិច្ចដកហូតបានវត្ថុតាងមួយចំនួន រួមមាន កញ្ឆាក្រៀម ទម្ងន់ ១៥,០៥ គីឡូក្រាម និងកញ្ឆាស្រស់ចំនួន ៣៥ គីឡូក្រាម រួមនឹងជញ្ជីងចំនួន ១ ផងដែរ។
លោកថ្លែងថា៖ «ភាគច្រើនអ្នកលួចដាំដើមកញ្ឆាមិនមែនដាំលើដីឯកជនទេគឺតែងដាំនៅលើដីរបស់រដ្ឋ។ ធ្វើដូច្នេះ ពួកគាត់ងាយគេចខ្លួនមុនសមត្ថកិច្ចយើងទៅដល់»។
លោកបានបន្តថា ការដាំកញ្ឆានេះឆាប់ទទួលផលណាស់គឺប្រើពេលពីដាំទៅក្នុងចន្លោះពី ១ ខែកន្លះទៅ ២ ខែ គឺអាចទទួលផលបានហើយ តែបើកញ្ឆាជាពូជធ្ងន់វិញ គឺប្រើពេល ៤ ខែ ទើបបានផល។ ដោយឡែក ករណីបង្ក្រាបបទល្មើសលួចដាំកញ្ឆានេះ បើគិតក្នុងឆ្នាំ ២០១៩ គឺសមត្ថកិច្ចរបស់លោក បានកាប់បំផ្លាញដើមកញ្ឆាចោលចំនួន ២៩ លើកមកហើយដោយអនុវត្តនៅលើទីតាំងចំនួន ១៥៧ កន្លែង៕
