ភ្នំពេញ៖ នគរបាលខណ្ឌច្បារអំពៅពីម្សិលមិញបានកសាងសំណុំរឿងបញ្ជូនបុរស ២ នាក់ ទៅសាលាដំបូងរាជធានីភ្នំពេញ បន្ទាប់តាមចាប់ខ្លួនបាននៅស្រុកគិរីវង់ ខេត្តតាកែវ ពីថ្ងៃទី ១៦ មីនា ពាក់ព័ន្ធករណីប្លន់សម្លាប់បុរសម្នាក់រួចយកសពប្លុងចោល តាមផ្លូវថៃហ្គឺក្នុងភូមិតាព្រហ្ម ខណ្ឌច្បារអំពៅ រាជធានីភ្នំពេញ ប្រព្រឹត្តពីថ្ងៃទី ១១ មីនា។
លោក ម៉ៅ សៀត អធិការរងនគរបាលខណ្ឌច្បារអំពៅឲ្យដឹងពីម្សិលមិញថា ជនសង្ស័យ ឈ្មោះ ម៉ៅ រដ្ឋា និងឈ្មោះ ម៉េង ណាឃីម ត្រូវបានសមត្ថកិច្ចលោកបញ្ជូនទៅសាលាដំបូងរាជធានីភ្នំពេញនៅថ្ងៃទី ១៨ មីនា ដើម្បីឱ្យតុលាការបន្តនីតិវិធីតាមផ្លូវច្បាប់។
លោកថា៖ «ជនសង្ស័យជាប់ពាក់ព័ន្ធនឹងបទល្មើសឃាតកម្មសម្លាប់មនុស្ស។ តាមចម្លើយរបស់ជនសង្ស័យអាចធ្វើឲ្យសមត្ថកិច្ចសន្និដ្ឋានបានថា ពួកគេពិតជាបានសម្លាប់ជនរងគ្រោះមែន»។
បើតាមលោក ម៉ៅ សៀត ក្រុមជនសង្ស័យបានសម្លាប់បុរស ឈ្មោះ សៅ គ្រឿន ហៅ ពៅ អាយុ ៣៧ ឆ្នាំ ជាមេការរថយន្តដឹកដី រស់នៅភូមិរបោះអង្កាញ់សង្កាត់ព្រែកឯង ខណ្ឌច្បារអំពៅ។ សពដែលធុំក្លិនស្អុយត្រូវបានអ្នកដំណើរប្រទះឃើញនៅក្បែរផ្លូវជាតិក្នុងគុម្ពត្រែងក្នុងភូមិ-សង្កាត់ កើតហេតុ។
បន្ទាប់ពីដឹងហេតុការណ៍នេះ នគរបាលខណ្ឌច្បារអំពៅ បានរាយការណ៍ទៅស្នងការដ្ឋាននគរបាលរាជធានីភ្នំពេញ ហើយសមត្ថកិច្ចជំនាញព្រហ្មទណ្ឌក្រុងបានសហការជាមួយនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ ស្រាវជ្រាវរហូតចាប់ជនសង្ស័យទាំង ២ នាក់ បាននៅស្រុកគិរីវង់ ខេត្តតាកែវ។
លោកឧត្តមសេនីយ៍ឯក ង៉េង ជួ ប្រធាននាយកដ្ឋានព្រហ្មទណ្ឌ ក្រសួងមហាផ្ទៃប្រាប់ ភ្នំពេញ ប៉ុស្តិ៍ ពីម្សិលមិញថា ប្រតិបត្តិការនេះមានការបញ្ជាពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិលោកឧត្តមសេនីយ៍ឯក អ៊ិន បូរ៉ា អគ្គស្នងការរងនគរបាលជាតិ សហការជាមួយនគរបាលខេត្តតាកែវ និងមានការសម្របសម្រួលនីតិវិធីផ្លូវច្បាប់ពីអយ្យការអមសាលាដំបូងរាជធានីភ្នំពេញ។
លោកបានឱ្យដឹងថា ប្រតិបត្តិការនេះសមត្ថកិច្ចចាប់ជនសង្ស័យបាននៅរសៀលថ្ងៃទី ១៦ មីនា ក្នុងស្រុកគិរីវង់ខេត្តតាកែវ ហើយមកបានប្រគល់ជូននគរបាលខណ្ឌច្បារជាម្ចាស់ករណីវិញ ក្រោយពីបញ្ចប់នីតិវិធីស៊ើបសួរ និងធ្វើកំណត់ហេតុរួច។
បើតាមលោក ម៉ៅ សៀត ជនសង្ស័យបានសារភាពថា សម្ភារជនរងគ្រោះដែលពួកគេយកបានរួមមាន ម៉ូត្រូឌីមសង់ ១ គ្រឿង, ខ្សែក ខ្សែដៃមាស,ចិញ្ចៀន ១ វង់ និងទូរស័ព្ទ ១ គ្រឿង។ បន្ទាប់ពីយកទ្រព្យសម្បត្តិនោះចែកគ្នារួច ពួកគេក៏បានគេចខ្លួនទៅស្រុកគិរីវង់ ខេត្តតាកែវ៕