.jpg)
សមត្ថកិច្ចធ្វើកោសល្យវិច័យលើសពក្មេងរងគ្រោះ។ រូបថត CPU
តាកែវៈ សមត្ថកិច្ចបានចាប់ខ្លួនស្ត្រីវ័យក្មេងម្នាក់បញ្ជូនទៅសាលាដំបូងខេត្តតាកែវកាលពីម្សិលមិញ ករណីធ្វើឲ្យក្មេងប្រុសម្នាក់ស្លាប់កាលពីថ្ងៃទី ៣១ សីហា ក្នុងភូមិទួលពង្រ ឃុំសោម ស្រុកគិរីវង់ ខេត្តតាកែវ។
លោក យុង ញីវ ប្រធានការិយាល័យនគរបាលកម្រិតស្រាលបានឲ្យដឹងថា នារីសង្ស័យឈ្មោះ សុខ ណាលីន អាយុ ១៩ ឆ្នាំ រីឯក្មេងប្រុសរងគ្រោះឈ្មោះ ឡូ សុភ័ក្រ អាយុ ១ ឆ្នាំកន្លះ ពួកគេរស់នៅក្នុងភូមិពង្រ។
លោក ញីវ ថ្លែងថា៖ «ករណីនេះស្ត្រីសង្ស័យពិតជាជាប់ពាក់ព័ន្ធនឹងបទល្មើសហើយហើយសមត្ថកិច្ចរបស់ខ្ញុំត្រូវតែអនុវត្តទៅតាមច្បាប់ក្នុងនាមជានគរបាលយុត្តិធម៌»។
លោក លឹម ចាន់មុនី ប្រធានការិយាល័យបច្ចេកទេសវិទ្យាសាស្ត្រនៃស្នងការដ្ឋាននគរបាលខេត្តតាកែវបានរៀបរាប់ឲ្យដឹងពីម្សិលមិញថា មុនកើតហេតុវេលាម៉ោងជាង ១០ ព្រឹកថ្ងៃទី ៣១ សីហា ស្ត្រីសង្ស័យបានអង្គុយបកទំពាំងដោយប្រើខ្វាង ហើយនៅក្បែរគាត់មានស្ត្រីចំណាស់ម្នាក់ អាយុប្រហែល ៥០ ឆ្នាំ កំពុងចៀននំចាក់ចុលនៅក្បែរនោះដែរ។ ពេលនោះស្ត្រីសង្ស័យបានយកជើងម៉ារបស់ស្ត្រីអ្នកចៀននំមកអង្គុយហើយស្ត្រីចៀននំបានទាញយកជើងម៉ានោះពីគូទស្ត្រីសង្ស័យធ្វើឲ្យអុកគូទទៅនឹងដីហើយក៏មានការខឹងសម្បា និងជេរស្ត្រីអ្នកចៀននំ។ ខណៈកំពុងឈ្លោះប្រកែកគ្នានោះ ក៏មានក្មេងប្រុសម្នាក់បានមកឈរទិញនំក្បែរស្ត្រីអ្នកលក់នំដែរ។ ពេលនោះស្ត្រីសង្ស័យបានយកខ្វាងដែលកំពុងកាន់នៅក្នុងដៃគប់សំដៅទៅស្ត្រីអ្នកលក់នំ ប៉ុន្តែបែរជាត្រូវចំដើមទ្រូងក្មេងរងគ្រោះទៅវិញ។
លោកបានឲ្យដឹងទៀតថាក្រោយកើតហេតុ ម្តាយឪពុករបស់ក្មេងរងគ្រោះបានដឹកទៅមន្ទីរពេទ្យបង្អែកស្រុកគិរីវង់តែដោយសាររបួសធ្ងន់ពេក ធ្វើឲ្យក្មេងរងគ្រោះដាច់ខ្យល់ស្លាប់នៅពាក់កណ្តាលផ្លូវទៅ៕
