.jpg)
កំពង់ចាមៈ សមត្ថកិច្ចកំពុងបន្តស្រាវជ្រាវរកមូលហេតុពិតករណីបុរសចាក់កសម្លាប់ប្រពន្ធហើយគេចខ្លួនទៅស្លាប់ក្នុងព្រៃកាលពីថ្ងៃទី ២៣ ខែមេសានៅភូមិអម្ពិល ឃុំព្រែកដំបូក ស្រុកស្រីសន្ធរ ខេត្តកំពង់ចាម ខណៈរឿងនេះនៅមិនទាន់ច្បាស់។
លោក សុខ យ៉េន អធិការនគរបាលស្រុកស្រីសន្ធរប្រាប់ឲ្យដឹងថា អំពើមនុស្សឃាតដែលបុរសជាប្តីចាក់កសម្លាប់ប្រពន្ធ ហើយគេចខ្លួនទៅស្លាប់ក្នុងព្រៃរបោះក្នុងភូមិខាងលើនោះរហូតមកទល់ពេលនេះព័ត៌មានលម្អិតពីប្រវត្តិជនសង្ស័យពាក់ព័ន្ធនឹងសុខភាពគឺសមត្ថកិច្ចមិនទាន់ប្រមូលបានអស់ទេ។
លោកបន្តថា៖«ខ្ញុំមិនអាចសន្និដ្ឋានថាមកពីអ្វីឲ្យច្បាស់លាស់ទេ។ មូលហេតុពិតនៃអំពើមនុស្សឃាតនេះយើងនៅមិនទាន់ប្រមូលព័ត៌មានអស់នៅឡើយទេថា តើជនដៃដល់អាចមានជំងឺសរសៃប្រសាទ ឬក៏អត់?»។ លោកថា ជនសង្ស័យឈ្មោះ ឡាច ថា អាយុ ៣៨ ឆ្នាំ ឯប្រពន្ធរងគ្រោះឈ្មោះ ស ស្រីនាង អាយុ ២៦ ឆ្នាំមានកូនស្រីម្នាក់អាយុ ១០ ឆ្នាំ រស់នៅភូមិ-ឃុំកើតហេតុ។
លោកប្រាប់តាមសម្តីអ្នកភូមិថា មុនថ្ងៃកើតហេតុប្រហែលកន្លះខែ ជនសង្ស័យបានសួរប្រពន្ធថា ហេតុអ្វីបានជំពាក់លុយគេដល់ទៅ ៣៥០០ ដុល្លារ តើលុយនោះខ្ចីគេមកធ្វើស្អីខ្លះ? ប៉ុន្តែស្ត្រីរងគ្រោះបានស្រែកទៅប្តីថាកុំចង់ដឹងថាគាត់ជំពាក់នរណាអី សំខាន់រកតែលុយនោះមកឲ្យគាត់យកទៅសងគេទៅវាចប់រឿងហើយ។
លោក សុខ យ៉េន បន្តតាមសម្តីអ្នកភូមិថា ជនសង្ស័យជាមនុស្សស្រវឹងខួបផឹកស្រារាល់ថ្ងៃហើយក៏តែងបង្កហិង្សាលើប្រពន្ធស្ទើររាល់ថ្ងៃដែរ។ លោកថាមុនពេលកើតហេតុអ្នកភូមិថាពួកគេមានទំនាស់ក្នុងគ្រួសារ ព្រោះជនសង្ស័យដឹងរឿងប្រពន្ធជំពាក់លុយគេទើបឈ្លោះគ្នា។ លុះដល់ចន្លោះម៉ោង ២ ទៅ ៣ ទៀបភ្លឺឈានចូលថ្ងៃទី ២៣ ខែមេសា ក៏ស្រាប់តែអ្នកផ្ទះក្បែរខាងឮសូរសំឡេងជជែកគ្នា និងសំឡេងស្រែកឲ្យជួយហើយពេលអ្នកភូមិទៅមើលក៏ឃើញស្ត្រីរងគ្រោះស្លាប់បាត់ទៅហើយ។
លោក ម៉េង ថៃអ៊ាង នាយនគរបាលប៉ុស្តិ៍ឃុំព្រែកដំបូកបានប្រាប់ដែរថា ជនសង្ស័យនៅពេលស្រវឹងម្តងៗ តែងបង្កជម្លោះក្នុងគ្រួសារ ហើយក៏មានប្រើហិង្សាផងដែរ ប៉ុន្តែមិនមានវាយដំបង្ករបួសស្នាមធ្ងន់ទេ។
លោកប្រាប់តាមសម្តីសាច់ញាតិស្ត្រីរងគ្រោះថា៖ «លោក ឡាច ថា មិនដឹងថា មានជំងឺសរសៃប្រសាទឬក៏អត់ទេ ប៉ុន្តែជននេះពេលមានអារម្មណ៍មិនល្អ ស្ត្រីរងគ្រោះជាប្រពន្ធតែងទៅទិញថ្នាំសរសៃប្រសាទមកឲ្យលេប។ ប៉ុន្តែជនសង្ស័យគ្មានលិខិតពេទ្យបញ្ជាក់ពីជំងឺសរសៃប្រសាទទេ»។
លោកនាយនគរបាលប៉ុស្តិ៍រំឭកថា ក្រោយកើតហេតុសមត្ថកិច្ចបានចុះធ្វើកោសល្យវិច័យឃើញថានៅលើកញ្ចឹងកស្ត្រីរងគ្រោះមានស្នាមចាក់នឹងវត្ថុស្រួចធ្លាយបំពង់កពីស្តាំទៅឆ្វេង ១ កន្លែង។ ឯជនសង្ស័យក្រោយពីសម្លាប់ប្រពន្ធហើយបានរត់ចូលព្រៃរបោះដែលមានចម្ងាយពីភូមិប្រហែល ២ គីឡូម៉ែត្រហើយត្រូវបានគេប្រទះឃើញដេកស្លាប់នៅទីនោះ។ ប៉ុន្មានថ្ងៃមុនកើតហេតុ ជនសង្ស័យមិនបានហូបអាហារអ្វីទេ និងចេះតែផឹកស្រា។ សមត្ថកិច្ចសន្និដ្ឋានថា ជនសង្ស័យមិនបានធ្វើអត្ថឃាតខ្លួនឡើយព្រោះគ្មានស្លាកស្នាមនៅលើខ្លួន ប៉ុន្តែសង្ស័យថាអាចខ្យល់គស្លាប់៕
