.jpg)
អាល់កុលក្លែងក្លាយដែលសមត្ថកិច្ចបង្ក្រាបនៅរាជធានីភ្នំពេញកាលពីដើមខែនេះ។ រូបថត ក្រសួងពាណិជ្ជកម្ម
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) កំពុងបន្តអនុវត្ដវិធានការផ្លូវច្បាប់ ចំពោះម្ចាស់អាល់កុលក្លែងក្លាយ ក្រោយពីបង្ក្រាបបាន ៥ ករណី ចាប់ពីខែមីនារហូតដល់ម្សិលមិញ ប៉ុន្តែមានតែម្ចាស់អាល់កុលក្លែងក្លាយ ១ ករណីប៉ុណ្ណោះ ដែលបានចូលខ្លួនមកដោះស្រាយ។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. បានប្រាប់ភ្នំពេញប៉ុស្ដិ៍កាលពីម្សិលមិញថា រហូតមកទល់ពេលនេះ (ម្សិលមិញ) មានអាល់កុលក្លែងក្លាយ (លាយមេតាណុល) ដែលជាសារធាតុពុលមិនអាចប្រើក្នុងការកម្ចាត់មេរោគសរុបជាង ៦៤ ០០០ លីត្រ ត្រូវបានសមត្ថកិច្ចចម្រុះ សហការជាមួយសាលារាជធានីភ្នំពេញដោយមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញបានបំផ្លាញចោលរួចរាល់ហើយកាលពីថ្ងៃសុក្រសប្ដាហ៍មុន។
លោកបានបន្តថា ក្រោយការបង្ក្រាបករណីទាំងនេះ ក.ប.ប. បានជូនដំណឹងជាបន្តបន្ទាប់ឱ្យម្ចាស់ផលិតផលក្លែងក្លាយទាំងនោះចូលខ្លួនមកដោះស្រាយជាមួយសមត្ថកិច្ច។ ប៉ុន្ដែរហូតដល់ពេលនេះមានតែម្ចាស់ទីតាំង ១ ប៉ុណ្ណោះដែលបានចូលខ្លួន។
លោកថា៖ «សរុបទាំងអស់យើងបង្ក្រាបបាន ៥ ករណីក្នុងនោះមាន ១ ករណី បានចូលខ្លួនមកផ្ដល់ជាព័ត៌មានបន្ថែមហើយ ដើម្បីឱ្យយើងអាចយកទៅកសាងកំណត់ហេតុបទល្មើសបញ្ជូនទៅព្រះរាជអាជ្ញា។ ចំណែក ៤ ករណីទៀតមិនទាន់បង្ហាញខ្លួនទេ។
ចំពោះនីតិវិធីបន្តលើករណីនេះគឺយើងផ្អែកលើនីតិវិធីរបស់ព្រះរាជអាជ្ញាតាមច្បាប់ស្ដីពីការគ្រប់គ្រងគុណភាព សុវត្ថិភាព ទំនិញ និងសេវាដែលពួកគាត់មានសិទ្ធិសម្រេចលើការផាកពិន័យ ឬក៏ដាក់ទោសទណ្ឌ...»។
តាមរបាយការណ៍របស់អគ្គនាយកដ្ឋាន ក.ប.ប. បានឱ្យដឹងថា ការបំផ្លាញចោលអាល់កុលក្លែងក្លាយជាង ៦៤ ០០០ លីត្រនោះបានប្រព្រឹត្តទៅកាលពីថ្ងៃសុក្រទី ១០ ខែមេសា នៅទីតាំងស្ថានីយបូមទឹកស្អុយទី ១ ទំនប់កប់ស្រូវ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
លោក ឌឹម ថេង អគ្គនាយករងនៃអគ្គនាយកដ្ឋាន ក.ប.ប. បានថ្លែងថា៖ «ក្នុងស្ថានភាពប្រទេសជាតិក៏ដូចជា ពិភពលោកកំពុងជួបប្រទះជំងឺរាតត្បាតកូវីដ១៩នេះតម្រូវការអាល់កុលដើម្បីលាងសម្អាតដៃកម្ចាត់មេរោគបានកើនឡើងយ៉ាងខ្លាំង។
កត្ដានេះបង្កឱ្យមានការឆ្លៀតឱកាសកេងចំណេញផ្នែកសេដ្ឋកិច្ចពីសំណាក់ជនខិលខូចមួយចំនួនលួចបន្លំចែកចាយអាល់កុលក្លែងក្លាយ (មេតាណុល) បណ្តាលឱ្យមានគ្រោះថ្នាក់ធ្ងន់ធ្ងរដល់សុខភាពអ្នកប្រើ»។
លោកបន្ដថា ក.ប.ប. នឹងបន្តស៊ើបអង្កេត និងបង្ក្រាបនូវសារធាតុមេតាណុលដែលជនខិលខូចដាក់លក់ក្នុងរូបភាពជាអាល់កុលកម្ចាត់មេរោគដែលធ្វើឱ្យអ្នកប្រើប្រាស់មានការភាន់ច្រឡំជាអាល់កុលពិត។
លោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិថ្លែងថា ក្នុងពេលរាជរដ្ឋាភិបាលកំពុងយកចិត្ដទុកដាក់ប្រយុទ្ធប្រឆាំងនឹងការរីករាលដាលនៃជំងឺកូវីដ១៩នេះ បែរជាមានជនខិលខូចបន្លំលក់ទំនិញក្លែងក្លាយទៅវិញ។ ករណីនេះសមត្ថកិច្ចពាក់ព័ន្ធនៃអគ្គស្នងការដ្ឋានបានចូលរួមជាបន្តបន្ទាប់ក្នុងការអនុវត្ដបទបញ្ជារបស់រាជរដ្ឋាភិបាល និងបង្ក្រាបទប់ស្កាត់ការចរាចរលក់ដូរអាល់កុលក្លែងក្លាយនេះ។
លោកបានបញ្ជាក់ថា៖ «ជាតួនាទីភារកិច្ច នគរបាលជាតិមានកងកម្លាំងនគរបាលសេដ្ឋកិច្ចជាកងកម្លាំងអនុវត្ដផ្ទាល់បានចូលរួមសហការក្នុងការអនុវត្ដទប់ស្កាត់ ការលក់ដូរផលិតផលខុសច្បាប់ ការនាំចូលទំនិញគ្មានពន្ធ និងការក្លែងបន្លំស្លាកសញ្ញាទំនិញជាដើមនេះ។ ដូច្នេះជាគោលការណ៍គឺយើងមានការម៉ឺងម៉ាត់បំផុតក្នុងការស្រាវជ្រាវស៊ើបអង្កេត ទប់ស្កាត់ និងបង្ក្រាបមិនឱ្យមានករណីបែបនេះកើតមានឡើងទៀតទេ»៕
