ព្រះសីហនុ: សមត្ថកិច្ចកងរាជអាវុធហត្ថខេត្តព្រះសីហនុកាលពីម្សិលមិញបានបន្តសាកសួរបុរសជាជនសង្ស័យជាតិចិន ៦ នាក់ បន្ទាប់ពីឃាត់ខ្លួនកាលពីថ្ងៃទី ៣០ ខែ កញ្ញា ពាក់ព័ន្ធនឹងការបង្ខាំងមនុស្សជំរិតទារប្រាក់ប្រព្រឹត្តនៅក្នុងភូមិ ៥ សង្កាត់លេខ ៤ ក្រុងព្រះសីហនុដោយរំដោះបានជនរងគ្រោះជាតិចិនចំនួន ៤ នាក់។
លោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុបានប្រាប់កាលពីម្សិលមិញថា ពិតជាមានការឃាត់ខ្លួនជនជាតិចិនចំនួន ៦ នាក់មែន ជុំវិញការជំរិតទារប្រាក់ពីជនរងគ្រោះចំនួន ៤ នាក់ ប៉ុន្ដែលោកបដិសេធការធ្វើអធិប្បាយបន្ថែមពីករណីនេះដោយបង្វែរសំណួរទៅលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសវិញ។
លោកបញ្ជាក់ថា៖ «សូមសួរទៅអ្នកនាំពាក្យកងរាជអាវុធហត្ថលើផ្ទៃប្រទេសគឺគាត់នឹងបំភ្លឺជូនហើយ ចំណែកខ្ញុំអត់មានអ្វីត្រូវនិយាយទេ»។
យ៉ាងណាក្ដីលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានថ្លែងកាលពីម្សិលមិញមិញថា លោកនៅមិនទាន់បានទទួលព័ត៌មានអ្វីបន្ថែមទៀតជុំវិញករណីនេះទេ ព្រោះមន្ត្រីជំនាញនៃកងរាជអាវុធហត្ថខេត្តព្រះសីហនុកំពុងធ្វើការតាមនីតិវិធីច្បាប់។ ប៉ុន្ដែលោកមិនទាន់ដឹងថាមន្ត្រីគ្រោងនឹងបញ្ជូនជនសង្ស័យទាំង ៦ នាក់នោះ ទៅសាលាដំបូងខេត្តព្រះសីហនុនៅពេលណាទេ។
លោកបញ្ជាក់ថា៖ «ខ្ញុំអត់ទាន់ដឹងគេបញ្ជូនទៅតុលាការ ឬអត់ទេ គេកំពុងធ្វើការរបស់គេ ព្រោះខ្ញុំបានជម្រាបជូនហើយថា ពាក់ព័ន្ធនីតិវិធីច្បាប់ ខ្ញុំមិនអាចជម្រាបជូនបានទេ។ ខ្ញុំអត់អាចនិយាយរឿងហ្នឹងបានទេ»។
ប៉ុន្តែតាមសារព័ត៌មានក្នុងស្រុក Swiftnews បានចុះផ្សាយកាលពីម្សិលមិញថា៖ «ក្រុមជនសង្ស័យត្រូវបានកម្លាំងសមត្ថកិច្ចឃាត់ខ្លួន បន្ទាប់ពីមានសេចក្តីរាយការណ៍ថាបានធ្វើសកម្មភាពចាប់បង្ខាំង និងធ្វើទារុណកម្មលើក្រុមជនរងគ្រោះដើម្បីជំរិតទារប្រាក់ពីសាច់ញាតិរបស់ពួកគេនៅប្រទេសចិន។
សារព័ត៌មានដដែលបន្តថានៅពេលឃាត់ខ្លួនក្រុមជនសង្ស័យ សមត្ថកិច្ចដកហូតបានវត្ថុតាង រួមមាន ទូរស័ព្ទដៃចំនួន ៦ គ្រឿង ខ្នោះដៃចំនួន ៤ គូ ពិលឆក់ចំនួន ១ អត្តសញ្ញាណប័ណ្ណជនជាតិចិនចំនួន ១ សន្លឹក កាតធនាគារចំនួន ១ សន្លឹក ខ្សែចំណងជ័រមួយចំនួន រថយន្តចំនួន ១ គ្រឿង និងប្រាក់ដុល្លារចំនួន ១ ៥០០ ដុល្លារ។ បច្ចុប្បន្នក្រុមជនសង្ស័យ និងវត្ថុតាងត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តព្រះសីហនុដោយកំពុងសាកសួរដើម្បីចាត់ការតាមនីតិវិធី»។
លោក លឹម ប៊ុនហេង ព្រះរាជអាជ្ញារងនៃសាលាដំបូងខេត្តព្រះសីហនុបានថ្លែងកាលពីម្សិលមិញថា សាលាដំបូងខេត្តព្រះសីហនុមិនទាន់ទទួលសំណុំរឿងជនជាតិចិនចំនួន ៦ នាក់នេះទេ «ខ្ញុំអត់ទាន់បានទទួលសំណុំរឿងនេះនៅឡើយខ្ញុំគិតថា មន្ត្រីជំនាញប្រហែលជាកំពុងកសាងសំណុំរឿងមកតុលាការ ចាំមើលបន្ដិចទៀតប្រហែលគាត់បញ្ជូនមកដល់តុលាការហើយ»៕