.jpg)
ភ្នំពេញៈ សមត្ថកិច្ចខណ្ឌពោធិ៍សែនជ័យកាលពីម្សិលមិញបានបន្តនីតិវិធីស៊ើបសួរក្រុមជនសង្ស័យ ៧ នាក់ បន្ទាប់ពីចាប់ខ្លួនកាលពីថ្ងៃទី ១ ខែតុលា ក្នុងភូមិសាស្ត្រខណ្ឌពោធិ៍សែនជ័យរាជធានីភ្នំពេញពាក់ព័ន្ធនឹងករណីឆក់ប្លន់ក្នុងនោះមាន ៣ នាក់ ពាក់ព័ន្ធឃាតកម្មនៅខណ្ឌព្រែកព្នៅ។
លោក ជា សុវណ្ណ អធិការរងខណ្ឌពោធិ៍សែនជ័យប្រាប់កាលពីម្សិលមិញថា ក្រុមជនសង្ស័យ ៧ នាក់ ដែលសមត្ថកិច្ចចាប់ខ្លួនពាក់ព័ន្ធបទល្មើសឆក់ប្លន់នោះ ពេលនេះកំពុងត្រូវបានស៊ើបសួរដើម្បីរកបក្ខពួកគេទៀត។
លោកបញ្ជាក់ថា៖ «សមត្ថកិច្ចខ្ញុំកំពុងបន្តស៊ើបសួរពួកគេហើយមិនទាន់បញ្ជូនទៅតុលាការទេ»។
លោកប្រាប់ថា កម្លាំងនគរបាលនៃអធិការដ្ឋានខណ្ឌពោធិ៍សែនជ័យបានបើកប្រតិបត្តិការតាមបង្ក្រាបក្រុមជនសង្ស័យទាំងនោះ ក្រោយពីពួកគេធ្វើសកម្មភាពឆក់ប្លន់នៅក្នុងទឹកដីខណ្ឌកំបូល និងខណ្ឌពោធិ៍សែនជ័យរួមទាំងខណ្ឌនានាក្នុងរាជធានីភ្នំពេញ និងបានដកហូតម៉ូតូធ្វើសកម្មភាព ៤ គ្រឿង។
ភ្នំពេញប៉ុស្តិ៍មិនអាចទាក់ទងលោក យឹម សារ៉ាន់ អធិការនគរបាលខណ្ឌពោធិ៍សែនជ័យបានទេពីម្សិលមិញ ព្រោះគ្មានអ្នកលើកទូរស័ព្ទ។ ប៉ុន្តែលោកសារ៉ាន់ បានប្រាប់អង្គភាពព័ត៌មាន Fresh News ថា ក្រោយពីមន្ត្រីជំនាញសាកសួរអស់ពេល ១ យប់ ១ ថ្ងៃ ក៏បែកធ្លាយរឿងជនសង្ស័យ ៣ នាក់ គឺជាឃាតករដែលធ្លាប់បានវាយសម្លាប់បុរសម្នាក់កាលពីថ្ងៃទី ១៤ ខែ សីហា ឆ្នាំ ២០១៩ នៅម្តុំវត្តពោធិ៍នៅខណ្ឌព្រែកព្នៅ។
លោក យឹម សារ៉ាន់ បានបន្តថា ជនសង្ស័យករណីឃាតកម្មនេះ ទី១- ឈ្មោះ សៀង តុង ភេទប្រុស អាយុ ១៨ ឆ្នាំ ជាជាងពិតានមានលំនៅភូមិស្វាយ សង្កាត់ស្នោ ខណ្ឌពោធិ៍សែនជ័យ ទី២- ឈ្មោះ ម៉ៅ សុវណ្ណហៃ ភេទប្រុស អាយុ ១៨ ឆ្នាំ មានលំនៅភូមិចុងថ្នល់ សង្កាត់ពន្សាំង ខណ្ឌព្រែកព្នៅ និងទី៣- ឈ្មោះ សន ប៊ុនធិម អាយុ ១៧ ឆ្នាំ ស្នាក់នៅសង្កាត់ស្នោ។
លោកអធិការបន្តថា ខណៈនេះកម្លាំងជំនាញខណ្ឌពោធិ៍សែនជ័យកំពុងសហការជាមួយកម្លាំងជំនាញខណ្ឌព្រែកព្នៅ និងកម្លាំងជំនាញនៃស្នងការដ្ឋានរាជធានីភ្នំពេញស្រាវជ្រាវរកភ័ស្តុតាងបន្ថែមទៀត។
ចំណែកជន ៤ នាក់ទៀត ទី១- ឈ្មោះ យ៉ុង សហសវត្សរ៍ ភេទប្រុស អាយុ ២៣ ឆ្នាំ មានលំនៅភូមិស្នោ សង្កាត់ស្នោ ខណ្ឌពោធិ៍សែនជ័យ។ ទី២- ឈ្មោះ កាក់ សំរេច ភេទប្រុស អាយុ ២៣ ឆ្នាំ មានលំនៅភូមិស្នោកើត សង្កាត់ស្នោ ខណ្ឌពោធិ៍សែនជ័យ។ ទី៣- ឈ្មោះ សាន ផានិត ភេទប្រុស អាយុ ១៩ ឆ្នាំ មានលំនៅភូមិស្រែអំពិល សង្កាត់ស្នោ ខណ្ឌពោធិ៍សែនជ័យ និង ទី៤- ឈ្មោះ រឿន សារ៉ូត ភេទប្រុស អាយុ ២០ ឆ្នាំ មានលំនៅភូមិស្រែរាជ្ជះ សង្កាត់សំរោងក្រោម ខណ្ខពោធិ៍សែនជ័យ។
ចំណែកវត្ថុតាងដែលសមត្ថកិច្ចដកហូតរួមមាន ថ្នាំក្រាមសថ្លាចំនួន ១ កញ្ចប់តូច និងម៉ូតូ ៤ គ្រឿង ក្នុងនោះមាន ម៉ាកហុងដាសេ ១២៥ ពណ៌ខ្មៅពាក់ស្លាកលេខភ្នំពេញ 1GW-4373, ម៉ាកហុងដាសេ ១២៥ ពណ៌ខ្មៅ ពាក់ស្លាកលេខភ្នំពេញ 1HD-9258. ម៉ាកហុងដាសេ ១២៥ ពណ៌ខ្មៅ ពាក់ស្លាកលេខភ្នំពេញ 1HN-0663, ម៉ាកហុងដា សេ ១២៥ ពណ៌ខ្មៅ ពាក់ស្លាកលេខភ្នំពេញ 1HP-2321 ទូរស័ព្ទដៃ ២ គ្រឿង ម៉ាក iPhone 6 និង iPhone 7 ខ្សែក ២ ខ្សែ និងចិញ្ចៀន ១ វង់ និងលុយ ១០ ០០០ រៀល។
បើតាមលោក យឹម សារ៉ាន់ សកម្មភាពចុងក្រោយរបស់ក្រុមជនសង្ស័យទាំងនោះគឺការធ្វើសកម្មភាពដេញកាប់ប្លន់ម៉ូតូនៅមុខវត្តព្នៀតក្នុងទឹកដីសង្កាត់សំរោងក្រោម តែមិនបានសម្រេចកាលពីអំឡុងខែកញ្ញា និង ១ ករណីទៀត គឺឆក់ទូរស័ព្ទម៉ាក iphone7 plus នៅមុខវត្តតាភេម ក្នុងខណ្ឌកំបូល៕
