.jpg)
សមត្ថកិច្ចពិនិត្យលិខិតស្នាមចំពោះអ្នកបើកបរក្នុងអំឡុងពេលបម្រាមគោចរ។ ហ៊ាន រង្សី
ភ្នំពេញៈ គិតត្រឹមយប់ថ្ងៃទី ៤ ខែមេសា សមត្ថកិច្ចបានឃាត់ខ្លួនមនុស្សចំនួន ១២ នាក់ និងឃាត់យានយន្តចំនួន ១៦៥ គ្រឿង ដែលល្មើសនឹងបម្រាមគោចរ ក្នុងភូមិសាស្ត្ររាជធានីភ្នំពេញដែលសម្រេចផ្អាកជាបណ្តោះអាសន្ននូវសកម្មភាពចរាចរណ៍ និងអាជីវកម្មនានាចាប់ពីម៉ោង ៨ យប់ដល់ម៉ោង ៥ ព្រឹក គិតចាប់តាំងពីថ្ងៃទី ២ ខែមេសាមក។
លោក ហែម ដារិទ្ធិ អភិបាលខណ្ឌពោធិ៍សែនជ័យប្រាប់ ភ្នំពេញ ប៉ុស្តិ៍ ពីម្សិលមិញថា អាជ្ញាធរបានចុះបង្ក្រាប និងបិទទីតាំងស្ទីម ម៉ាស្សាសូណាយីហោ «ផ្ទះសុខភាព» នៅភូមិត្រពាំងថ្លឹង ៣ ក្នុងសង្កាត់ចោមចៅទី ១ ព្រមទាំងឃាត់ខ្លួនមនុស្សចំនួន ១២ នាក់ ដែលធ្វើសកម្មភាពផ្ទុយនឹងបម្រាមគោចរ។
លោកបន្ថែមថា អ្នកទាំង ១២ នាក់ ត្រូវបានបញ្ជូនទៅអធិការដ្ឋាននគរបាលខណ្ឌពោធិ៍សែនជ័យ ដើម្បីសាកសួរ និងកសាងសំណុំរឿងចាត់ការបន្តតាមនីតិវិធីច្បាប់។ លោកថា៖ «គ្រូពេទ្យនឹងចុះទៅយកសំណាកតេស្តរកកូវីដ១៩ទាំង ១២ នាក់ បន្ទាប់ពីយកសំណាករួច យើងបញ្ជូនគាត់ទៅធ្វើចត្តាឡីស័កនៅព្រែកព្នៅ ក្រោយពីធ្វើចត្តាឡីស័ក ១៤ ថ្ងៃហើយ ឬតេស្តកូវីដអវិជ្ជមានទើបបញ្ជូនទៅតុលាការ»។
តែលោកបញ្ជាក់ថា បុគ្គលដែលនឹងត្រូវបញ្ជូនទៅតុលាការ គឺអ្នកដែលចូលទៅរកសេវាម៉ាស្សា និងម្ចាស់ហាងប៉ុណ្ណោះ ខណៈអ្នកបម្រើការងារនៅទីនោះ សមត្ថកិច្ចគ្រាន់តែធ្វើការអប់រំនឹងបញ្ជូនត្រឡប់ទៅផ្ទះវិញ។
បើតាមលោក ដារិទ្ធិ អាជ្ញាធរមូលដ្ឋានធ្លាប់បានចុះណែនាំដល់ម្ចាស់ហាងពាក់ព័ន្ធវិធានការរបស់ក្រសួងសុខាភិបាលរួមនឹងបម្រាមគោចរដែរ ប៉ុន្តែម្ចាស់ហាង ហាក់បីដូចជាមិនអើពើ ទើបឈានដល់ការបិទហាងនេះ។
ទន្ទឹមនឹងការអនុវត្តបម្រាមគោចរនេះដែរ អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា បានឱ្យដឹងថា នៅយប់ថ្ងៃទី ៤ មេសា សមត្ថកិច្ចបានឃាត់យានយន្តចំនួន ១០ គ្រឿង ខណៈពលរដ្ឋភាគច្រើនបានយល់ដឹងពីបម្រាមនេះ។
លោកថា៖ «នៅយប់ថ្ងៃទី ៤ មេសា អ្នកបើកបរល្មើសបម្រាមគោចរមានតិចតួចមែនទែន បានន័យថា ប្រជាពលរដ្ឋភាគច្រើនបានយល់ដឹងសរុបរួមមកសមត្ថកិច្ចឃាត់យានយន្តមានតែ ១ គ្រឿងទេ រថយន្ត ៦ គ្រឿង និងម៉ូតូ ៤ គ្រឿង អ៊ីចឹងរយៈពេល ៣ ថ្ងៃឃាត់បានយានយន្ត ១៦៥ គ្រឿង»។
លោក សុខ សីហា បន្ថែមថា ក្នុងករណីសមត្ថកិច្ចឃាត់យានយន្តអ្នកល្មើសបម្រាមគោចរ ម្ចាស់យានយន្តនោះអាចទូរស័ព្ទហៅសាច់ញាតិមកទទួលពួកគេបាន ដោយករណីនេះអាចរាប់ថា ជាករណីចាំបាច់។
លោកថា៖ «ទាក់ទងចំណុចនេះ យើងក៏មានការលើកលែងដែរប្រសិនបើគាត់បញ្ជាក់ច្បាស់ថា គាត់ត្រូវទៅយកសាច់ញាតិរបស់គាត់ ប្រពន្ធកូន បងប្អូនគាត់ ដែលកំពុងតែត្រូវបានអាជ្ញាធរធ្វើការដកហូតយានយន្តដោយសារល្មើសបម្រាមគោចរ ដូចជាមិនមានបញ្ហាអីទេ តែគាត់ត្រូវប្រាប់សមត្ថកិច្ចថាទៅយកសាច់ញាតិនៅគោលដៅណា»។
យោងតាមសេចក្តីសម្រេចរបស់រដ្ឋបាលរាជធានីភ្នំពេញស្តីពីការអនុវត្តវិធានការរដ្ឋបាលបណ្តោះអាសន្នដើម្បីទប់ស្កាត់ការឆ្លងរាលដាលជំងឺកូវីដ១៩ ចេញផ្សាយនៅថ្ងៃទី ១ ខែមេសា ឆ្នាំ ២០២១ បានហាមការធ្វើចរាចរណ៍ជាបណ្តោះអាសន្ននៅក្នុងភូមិសាស្ត្រ រាជធានីភ្នំពេញចាប់ពីចន្លោះម៉ោង ៨ យប់ ដល់ម៉ោង ៥ ទៀបភ្លឺ រយៈពេល ២ សប្តាហ៍ ចាប់ពីថ្ងៃទី ១ ដល់ថ្ងៃទី ១៤ ខែមេសា ២០២១។
ដោយឡែកសមត្ថកិច្ចខេត្តកំពង់ឆ្នាំងរួមនឹងមន្ត្រីសុខាភិបាលនឹងចុះអនុវត្តច្បាប់ ករណីកូនរបស់អ្នករត់កង់៣ រារាំងមិនឱ្យគ្រូពេទ្យនាំឪពុករបស់ខ្លួន ដែលពាក់ព័ន្ធអ្នកវិជ្ជមានកូវីដ១៩ ទៅធ្វើចត្តាឡីស័ក។ លោក ឆាយ ខែមរ័ត្ន អធិការក្រុងកំពង់ឆ្នាំងថ្លែងថា នៅព្រឹកថ្ងៃទី ៥ មេសា ក្រុមការងារបានចុះទៅយកអ្នករត់កង់ ៣ ម្នាក់ អាយុ ៣៦ ឆ្នាំ រស់នៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ទៅធ្វើចត្តាឡីស័ក បន្ទាប់ពីរកឃើញថា ជាប់ពាក់ព័ន្ធដោយប្រយោលជាមួយអ្នកវិជ្ជមានកូវីដ១៩ ប៉ុន្តែត្រូវបានកូនស្រីរបស់គាត់រារាំងមិនឱ្យនាំខ្លួនទៅទេ។
លោកថា៖ «យើងចុះទៅយកទាំងប្តីប្រពន្ធតាមពិតគាត់ប៉ះពាល់ដោយប្រយោលជាមួយអ្នកវិជ្ជមានកូវីដ ប៉ុន្តែក្រុមការងារសំណូមពរឱ្យគាត់ទៅធ្វើចត្តាឡីស័កនៅមណ្ឌលដែលមានចម្ងាយឆ្ងាយពីទីរួមខេត្ត ប៉ុន្តែមានកូនស្រីគាត់ម្នាក់រារាំងមិនឱ្យឪពុកទៅដោយគាត់ថា នៅផ្ទះអត់មានអ្នកមើលថែកូនៗនៅផ្ទះ»។
លោកបញ្ជាក់ថា ក្រុមការងារបានឆ្លងទៅស្ថាប័នមួយចំនួន និងឆ្លងទៅក្រសួងសុខាភិបាលដើម្បីសុំគោលការណ៍ និងអភិបាលក្រុងកំពង់ឆ្នាំង ដើម្បីធ្វើកំណត់ហេតុឈ្មោះកូនដែលរារាំង ដើម្បីអនុវត្តតាមនីតិវិធី។
លោក ខែមរ័ត្ន ឱ្យដឹងថា ក្នុងករណីនេះសមត្ថកិច្ចនឹងចុះអនុវត្តតាមនីតិវិធីនៅត្រឹមល្ងាចថ្ងៃទី ៥ មេសា បើសិនកូនស្រីរបស់អ្នករត់កង់៣នៅតែរារាំងសមត្ថកិច្ច នោះត្រូវប្រឈមនឹងផ្លូវច្បាប់ផងដែរ។
យោងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតក្នុងមាត្រា ១១ ចែងថា «បទរារាំងដល់ការអនុវត្តវិធានការដែលបានដាក់ចេញដោយអាជ្ញាធរមានសមត្ថកិច្ច ដើម្បីប្រយុទ្ធប្រឆាំង និងទប់ស្កាត់ការឆ្លងរាលដាលនៃជំងឺកូវីដ ១៩ ត្រូវផ្តន្ទាទោសដាក់ពន្ធនាគារពី ២ ទៅ ៥ ឆ្នាំ និងពិន័យជាប្រាក់ពី ៥ លានរៀលទៅ ២០ លានរៀល បើបណ្តាលឱ្យមានការចម្លងជំងឺកូវីដ១៩ ដល់អ្នកដទៃ ឬប៉ះពាល់ធ្ងន់ធ្ងរដល់សុខភាពសាធារណៈ»៕
