ភ្នំពេញ៖ សមត្ថកិច្ចបានចាប់ឃាត់ខ្លួនមនុស្សចំនួន ៧ នាក់ ដែលបំពានច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងបានឃាត់យានយន្តចំនួន ៥៧ គ្រឿង ដែលបើកបរល្មើសបម្រាមក្នុងអំឡុងពេលរាជរដ្ឋាភិបាលប្រកាសបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្តាល។
អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា ប្រាប់ ភ្នំពេញ ប៉ុស្តិ៍ នៅថ្ងៃនេះថា រយៈពេលនៃការចាប់ផ្តើមអនុវត្តវិធានការបិទខ្ទប់ និងបម្រាមគោចរ ដោយគិតចាប់ពីថ្ងៃទី ១៦ ខែមេសាមក សមត្ថកិច្ចបានឃាត់យានយន្តចំនួន ៥៧ គ្រឿង។
លោកបន្តថា៖ «ថ្ងៃទី ១៦ យើងអនុវត្តបានម៉ូតូ ៤២ គ្រឿង ថ្ងៃទី ១៧ ឃាត់បានម៉ូតូ ១៥ គ្រឿង ចឹងសរុបមកប៉ុន្មានថ្ងៃនេះ យើងអនុវត្តឃាត់បានម៉ូតូ ៥៧ គ្រឿង»។
លោកឱ្យដឹងថា ក្នុងអំឡុងពេលអនុវត្តវិធានការបិទខ្ទប់ សមត្ថកិច្ចក៏បានណែនាំដល់ប្រជាពលរដ្ឋ ក៏ដូចជាអ្នកធ្វើដំណើរផងដែរ ដើម្បីឱ្យពួកគាត់ចូលរួមជាមួយរដ្ឋាភិបាលក្នុងការទប់ស្កាត់ជំងឺឆ្លងកាចសាហាវនេះ។
កាលពីថ្ងៃទី ១៤ មេសា រាជរដ្ឋាភិបាលកម្ពុជា បានចេញសេចក្តីសម្រេចបិទខ្ទប់ភូមិសាស្ដ្ររាជធានីភ្នំពេញ និងក្រុងតាខ្មៅ នៃខេត្តកណ្តាល ជាបណ្តោះអាសន្នសម្រាប់រយៈពេល ១៤ ថ្ងៃ គិតចាប់ពីវេលាម៉ោងសូន្យនាថ្ងៃទី ១៥ មេសា រហូតដល់ថ្ងៃទី ២៨ មេសា ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ ក្នុងភូមិសាស្រ្តទាំងពីរនេះ។
ជាមួយគ្នានេះ សមត្ថកិច្ចក៏បានឃាត់ខ្លួនមនុស្សចំនួន ៧ នាក់ ដែលបានបំពានច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
លោក សុខសីហា ថ្លែងថា៖ «អ្នកបំពានទៅនឹងច្បាប់ប្រយុទ្ធប្រឆាំងកូវីដ ១៩ យើងបានធ្វើការឃាត់ខ្លួនទាក់ទងអ្នកមិនអនុវត្តវិធានក្នុងមាត្រា ១១ នៃច្បាប់កូវីដ គឺមានចំនួន ៧ នាក់ ក្នុងនោះ ៦ នាក់ ត្រូវបានបញ្ជូនទៅតុលាការហើយ ៥ នាក់ ត្រូវបានតុលាការចេញដីកាឃុំខ្លួនហើយ»។
ចំណែកម្នាក់ទៀត សមត្ថកិច្ចបានធ្វើការអប់រំ និងបញ្ជូនឱ្យត្រឡប់ទៅផ្ទះវិញ។
មាត្រា ១១ នៃច្បាប់នេះចែងថា បទ «រារាំងដល់ការអនុវត្តវិធានការ» ទប់ស្កាត់ការឆ្លងរាលដាលជំងឺកូវីដត្រូវផ្តន្ទាទោសដាក់ពន្ធនាគារពី ៦ ខែ ទៅ ៣ ឆ្នាំ និងពិន័យជាប្រាក់ពី ២ លានរៀល ទៅ ១០ លានរៀល។ ប៉ុន្តែក្នុងករណីបណ្តាលឱ្យមានការចម្លងជំងឺកូវីដ ១៩ ដល់អ្នកដទៃ ឬប៉ះពាល់ធ្ងន់ធ្ងរដល់សុខភាពសាធារណៈប្រឈមទោសពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៥ ទៅ ២០ លានរៀល»៕