.jpg)
ក្របីញី ១ ក្បាលត្រូវបានបាញ់សម្លាប់ បន្ទាប់ពីវ័ធបុរសម្នាក់ស្លាប់ ២ នាក់របួស។ រូបថត ហ្វេសប៊ុក
ព្រៃវែងៈ សមត្ថកិច្ចបានបាញ់សម្លាប់ក្របីញី ១ ក្បាលកាលពីម្សិលមិញ បន្ទាប់ពីក្របី ១ ក្បាលនេះបានវ័ធបុរសម្នាក់ស្លាប់ និង ២ នាក់ទៀតរងរបួស កាលពីថ្ងៃទី ៣១ ខែតុលា នៅភូមិស្តាស្រុក ឃុំព្នៅទី ២ ស្រុកស៊ីធរកណ្តាល។
លោក សេង សាវ៉ន អធិការស្រុកស៊ីធរកណ្តាលបានឱ្យដឹងថា ជនរងគ្រោះដែលស្លាប់ឈ្មោះ រឿន រេន ភេទប្រុស អាយុ ៤៧ ឆ្នាំ ត្រូវក្របីវ័ធចំភ្លៅ ដើមទ្រូង និងត្រូវក្របីជាន់ចំឆ្អឹងជំនីរ។ ចំណែកជនរងរបួសឈ្មោះ ណេន ចំរើន ភេទប្រុស អាយុ ៣៩ ឆ្នាំ របួសកំភួនជើងខាងស្ដាំធ្ងន់និង ឈ្មោះ ណេន យ៉េន ភេទប្រុស អាយ ៥១ ឆ្នាំ ត្រូវកែងដៃ និងដងខ្លួនរងរបួសស្រាល។
លោករំឭកប្រាប់ថា មុនថ្ងៃកើតហេតុឈ្មោះ ណេន យ៉េន បានទិញក្របីប្រហែល ៧ ទៅ ៨ ក្បាលមកចិញ្ចឹមហើយឈ្មោះ ណេន ចំរើន ជាប្អូនបានសុំទិញក្របីញី ១ ក្បាលពីបងរបស់គាត់ ណេន ចំរើន ព្រោះតែឃើញក្របីនោះឡើងសាច់អាចយកមកប្រើការងារកសិកម្មបាន។ បន្ទាប់ពីទិញក្របីបានហើយ ស្ត្រីជាប្រពន្ធរបស់ឈ្មោះ ណេន ចំរើន បានយកក្របីនោះទៅចងនៅវាលស្រែឱ្យវាស៊ីស្មៅ។
លោកបន្តថា លុះដល់ពេលល្ងាចស្ត្រីជាប្រពន្ធរបស់ឈ្មោះ ចំរើន បានទៅដឹកក្របីនោះមកផ្ទះវិញតែត្រូវសត្វក្របីនោះដេញវ័ធ។ ដោយឃើញក្របីដេញវ័ធស្ត្រីជាប្អូនថ្លៃដូច្នេះ ណេន យ៉េន បានរត់ទៅជួយតែត្រូវសត្វក្របីនោះដេញវ័ធបណ្តាលឱ្យរបួសស្រាល។ ខណៈនោះ ណេន ចំរើន បានរត់យកដំបងបំណងវាយសត្វក្របីនោះ តែត្រូវក្របីវ័ធត្រូវកំភួនជើងស្តាំ ១ ស្នែងទៀត។
លោក សាវ៉ន បន្តថា ដោយឃើញសភាពបែបនេះមានបុរសចំនួន ៥ នាក់ ដោយម្នាក់ៗបាននាំគ្នាកាន់ដំបងម្នាក់ ១ៗដេញតាមវាយសត្វក្របីនោះ ហើយបុរសឈ្មោះ រឿន រេនក្នុងចំណោមបុរស ៥ នាក់នោះកាន់តែដបទឹកសុទ្ធមួយទេ ព្រោះគាត់អះអាងប្រាប់គេថា គាត់មិនបាច់ប្រើដំបងទេ ព្រោះគាត់ចេះមន្តអាគមសូត្រតែបាលីទៅ គឺសត្វក្របីនោះស្លូតឯងហើយ។
លោកបញ្ជាក់ថា៖ «គេប្រាប់ខ្ញុំថា បុរសរងគ្រោះស្លាប់នោះត្រូវស្រាស្រឿងៗផង ពេលដែលគាត់ដេញសត្វក្របី គឺគាត់សូត្របាលីមន្តអាគមប្រោះទឹកហើយប្រាប់គេថាគាត់ប្រោះតែទឹកបន្តិច គឺក្របីនោះអត់ស៊ីស្មៅ ១ អាទិត្យក៏មាន។ តែក្របីនោះក៏ស្ទុះមកវ័ធគាត់ត្រូវចំភ្លៅ ដើមទ្រូង និងត្រូវក្របីជាន់ចំឆ្អឹងជំនីរ ហើយរត់ចូលព្រៃបាត់»។
លោកបន្តថា បន្ទាប់ពីត្រូវរបួសហើយនោះអ្នកភូមិបានដឹកជនរងគ្រោះទៅមណ្ឌលសុខភាពឃុំព្នៅទី ២ ស្រុកស៊ីធរកណ្តាល តែបានដាច់ខ្យល់ស្លាប់ក្រោយបញ្ជូនដល់មណ្ឌលសុខភាពឃុំ។ ក្រោយពីសមត្ថកិច្ចជំនាញធ្វើកោសល្យវិច័យរួចហើយ សមត្ថកិច្ចបានចាត់ចែងប្រគល់សាកសពដល់ក្រុមគ្រួសារយកទៅធ្វើបុណ្យតាមប្រពៃណី។
ចំណែកជនរងគ្រោះ ២ នាក់ទៀតក៏កំពុងសម្រាកព្យាបាលនៅមណ្ឌលសុខភាពឃុំព្នៅទី ២ នៅឡើយដែរ។
លោកបន្ថែមថា ដោយសារតែខ្លាចមានគ្រោះថ្នាក់ទៅថ្ងៃក្រោយទៀតប្រជាពលរដ្ឋបានសំណូមពរដល់សមត្ថកិច្ចរបស់លោកឱ្យបាញ់សម្លាប់សត្វក្របីនោះ។ កម្លាំងសមត្ថកិច្ចរបស់លោកបានតាមបាញ់វាងាប់នៅក្នុងព្រៃនៅថ្ងៃទី ១ ខែវិច្ឆិកា។ ចំពោះខាងគ្រួសារជនរងគ្រោះដែលស្លាប់នោះមិនដឹងថាប្តឹងម្ចាស់ក្របីឬយ៉ាងណានោះទេតែលោកគិតថា ជនរងគ្រោះរូបនោះបានស្ម័គ្រចិត្តទៅតាមចាប់ក្របីនោះដោយខ្លួនឯងទេទើបក្របីវ័ធបណ្តាលឱ្យស្លាប់។
លោក សាវ៉ន ថា៖ «បើយើងពិនិត្យលើអង្គហេតុគឺគ្មានអ្នកណាទៅបង្កបទល្មើសលើជនរងគ្រោះទេ ព្រោះម្ចាស់ក្របីគ្នាក៏រងគ្រោះដែរ»៕
