កោះកុងៈ កម្លាំងគណ:បញ្ជាការឯកភាពរដ្ឋបាលខេត្តកោះកុងបានចុះដកបង្គោលរបង រុះរើសំណង់ខ្ទមអនាធិបតេយ្យ និងដកហូតដើមឈើ ដែលបានដាំ និងសាងសង់ដោយខុសច្បាប់ក្នុងឧទ្យានជាតិបទុមសាគរស្ថិតក្នុងស្រុកបទុមសាគរ ខេត្តកោះកុង ព្រមទាំងព្រមាន បញ្ជូនទៅតុលាការ បើការរំលោភបំពានស្ថិតក្នុងភាពមិនរាងចាល។
លោក សុខ សុទ្ធី អ្នកនាំពាក្យ និងជាអភិបាលរងនៃគណ:អភិបាលខេត្តកោះកុងបានប្រាប់ ភ្នំពេញ ប៉ុស្តិ៍ កាលពីម្សិលមិញថា កាលពីថ្ងៃទី ១១ មករា ក្រុមការងារចម្រុះខេត្តដោយមានការសម្របសម្រួលពីលោក អេង ចាន់ភារ៉ា ព្រះរាជអាជ្ញារងនៃអយ្យការអមសាលាដំបូងខេត្តកោះកុងបានចុះដកបង្គោលរបង រុះរើសំណង់ខ្ទមអនាធិបតេយ្យចំនួន ១១ ខ្ទម ក្នុងនោះចំនួន ៩ ខ្ទម បានធ្វើការរុះរើរួចរាល់ និងចំនួន ២ ទៀត ម្ចាស់ខ្ទមបានធ្វើកិច្ចសន្យារុះរើដោយខ្លួនឯង។
លោកបន្តថា ដោយសារតែពលរដ្ឋទាំងនេះទើបប្រព្រឹត្តភាពល្មើសជាលើកដំបូង និងបានទទួលកំហុស ទើបសមត្ថកិច្ចគ្រាន់តែធ្វើការអប់រំ និងព្រមានហាមប្រព្រឹត្តទង្វើដដែលទៀត ដោយមិនមានការឃាត់ខ្លួននោះទេ ប៉ុន្តែក្នុងករណីមិនរាងចាលនឹងបញ្ជូនសំណុំរឿងទៅតុលាការ។
ជាមួយនឹងការចុះរុះរើនេះ លោក សុទ្ធី បានឱ្យដឹងថា តាមរយៈការបង្ហោះដ្រូន ក្នុងតំបន់ដែលចុះទៅបង្ក្រាបនេះគឺនៅមានការសាងសង់ខ្ទមជាង ២០ បន្ថែមទៀត ប៉ុន្តែដោយសារតែទីតាំងទាំងនោះស្ថិតក្នុងព្រៃជ្រៅទើបសមត្ថកិច្ចមិនទាន់អាចចុះទៅបង្ក្រាបក្នុងពេលភ្លាមៗបាន។
លោកបញ្ជាក់ថា៖ «តាមការស្មានមើលទៅក្នុងតំបន់ព្រៃរាក់នៃឧទ្យានជាតិបទុមសាគរមានការទៅសាងសង់ខ្ទមនៅក្នុងព្រៃ តាមរយៈកាប់ទន្ទ្រានដីព្រៃជ្រៅប្រហែលជាង ២០ ខ្ទមផ្សេងទៀត។ ដោយសារតែទីតាំងគាត់សាងសង់នៅឆ្ងាយៗ ហើយភូមិសាស្ត្រលំបាក យើងធ្វើ ១ ជំហានម្តងៗ»។
តាមរយៈការកាប់ទន្ទ្រានដីព្រៃពីខាងក្នុងឧទ្យានជាតិបទុមសាគរលោក សុខ សុទ្ធី រៀបរាប់ថា ពលរដ្ឋទាំងនោះបានបង្កើតជាសកម្មភាពនៃការសាងសង់ខ្ទមតូចៗដោយមានដាំដំណាំហូបផ្លែមួយចំនួនក្នុងចេតនាបង្ហាញថា ពួកគេបានរស់នៅទីនេះជាយូរឆ្នាំមកហើយ។
លោកបន្តថា នៅពេលមានការបង្ក្រាបរុះរើពេលនោះពួកគេនឹងបង្កើតជាកម្លាំងតវ៉ា ដើម្បីស្នើឱ្យរដ្ឋាភិបាល កាត់ឆ្វៀលដីដែលរំលោភក្នុងតំបន់ការពារនោះទៅឱ្យពួកគេ ហើយក៏បានលក់ដីទាំងនោះបន្តទៅបុគ្គលដែលនៅពីក្រោយខ្នងសម្រាប់ធ្វើកម្មសិទ្ធិស្របច្បាប់។ ឧទ្យានជាតិបទុមសាគរស្ថិតក្នុងស្រុកបទុមសាគរ ខេត្តកោះកុង មានផ្ទៃដីប្រមាណ ១៧ ម៉ឺនហិកតា។
បច្ចុប្បន្នផ្នែកខ្លះនៃតំបន់ការពារនេះត្រូវបានកាត់ឆ្វៀលជូនប្រជាពលរដ្ឋ និងផ្តល់ជាដីសម្បទានសេដ្ឋកិច្ច និង ១ ផ្នែកទៀត ក៏បានផ្តល់ជាការជួលក្នុងរយៈពេលវែងពីរដ្ឋាភិបាលទៅឱ្យក្រុមហ៊ុនវិនិយោគវិស័យអេកូទេសចរណ៍ ខណៈការកាប់ទន្ទ្រានពីសំណាក់ពលរដ្ឋខុសច្បាប់ មានចន្លោះពី ២០០ ទៅ ៣០០ ហិកតា។ នេះបើតាមរដ្ឋបាលខេត្តកោះកុង។
លោក ថោង ច័ន្ទដារ៉ា អ្នកសម្របសម្រួលផ្នែកសិទ្ធិមនុស្សនៃសមាគម អាដហុកប្រចាំខេត្តកោះកុងថ្លែងថា ការសាងសង់ខ្ទមទាំងនេះគឺកើតមានឡើងជាយូរមកហើយ ហើយក៏កើតឡើងជាហូរហែផងដែរ ដោយហាក់មានការសមគំនិតជាមួយអាជ្ញាធរមូលដ្ឋាន ឬមន្ត្រីខិលខូចមួយចំនួន ដើម្បីទទួលបានផលប្រយោជន៍ណាមួយ។
លោកបញ្ជាក់ថា៖ «មានតែអាជ្ញាធរមូលដ្ឋានបិទភ្នែក បើកដៃឱ្យសកម្មភាពទាំងនេះកើតឡើង ព្រោះបើសិនជាប្រជាពលរដ្ឋធម្មតា គាត់មិនអាចហ៊ាន ដោយសារតែកម្លាំងជំនាញ គាត់ចល័តការពាររាល់តែថ្ងៃហ្នឹង។ ប៉ុន្តែនេះ រូបភាពនេះគឺជាការឱ្យដៃជាថ្នូរនឹងការបានប្រយោជន៍ហើយ បានទម្លាក់កំហុសមកតែប្រជាពលរដ្ឋ។ យើងទទួលស្គាល់ថា អ្នករុករានជាប្រជាពលរដ្ឋ ប៉ុន្តែអាចរូបភាពមានគេជួលពីខេត្តផ្សេង ដើម្បីឱ្យរុករាន និងឈរជើងនៅលើដីទាំងនោះគឺមិនមែនពលរដ្ឋនៅក្នុងស្រុកភូមិទេ»។
លោក ថោង ច័ន្ទដារ៉ា ថ្លែងដោយបានរំពឹងថា សមត្ថកិច្ចជំនាញគួរតែពង្រឹងតួនាទីការងារឱ្យមានតម្លាភាព ហើយអាជ្ញាធរគ្រប់ជាន់ថ្នាក់ត្រូវចូលរួមចាត់វិធានការ កុំបិទបាំងព័ត៌មាន បើក្នុងករណីរកឃើញ អ្នកនៅពីក្រោយខ្នងត្រូវតែហ៊ានចាត់វិធានការ បើទោះជាជននៅពីក្រោយខ្នងនៃការរំលោភយកដីរបស់រដ្ឋមានខ្សែធំយ៉ាងណាក៏ដោយ។
លោក ថោង ច័ន្ទដារ៉ា បានថ្លែងឱ្យដឹងថា៖ «យើងត្រូវតែវែកមុខអ្នកនៅពីក្រោយខ្នងហ្នឹងឱ្យឃើញ កុំព្យាយាមបិទបាំង ទោះប៉ះខ្សែអ្នកនេះ ឬអ្នកនោះ ហើយយើងមិនហ៊ានប្រាប់ មិនហ៊ាន ចាប់។ ធ្វើដូច្នេះដូចលើកទឹកចិត្តឱ្យពួកគាត់បន្តប្រព្រឹត្តដដែលជាដដែល ព្រោះវាមិនមានដំណោះស្រាយនោះទេ។ យើងត្រូវធ្វើយ៉ាងម៉េច ឱ្យមានតម្លាភាពនៅក្នុងចំណាត់ការរបស់សមត្ថកិច្ច រកឱ្យឃើញអ្នកនៅពីក្រោយខ្នង បើមិនអ៊ីចឹង ចេះតែកើតមានកន្លែងនេះ កន្លែងនោះបន្ត ធ្វើតាមគ្នារហូត»៕