ភ្នំពេញៈ សមត្ថកិច្ចសង្កាត់ចោមចៅ ៣ ខណ្ឌពោធិ៍សែនជ័យកាលពីថ្ងៃម្សិលមិញបានប្រកាសស្វែងរកចាប់បុរសជាជនសង្ស័យម្នាក់ ១ ថ្ងៃ ក្រោយពីស្ត្រីជាប្រពន្ធបានដាក់ពាក្យបណ្ដឹងរឿងប្រើអំពើហិង្សាដោយបានចាក់សាំងដុតនាងកាលពីថ្ងៃទី ១៩ ខែមករានេះ។
លោក ជា សុវណ្ណ អធិការរងផែនព្រហ្មទណ្ឌនៃអធិការដ្ឋានគរបាល ខណ្ឌពោធិ៍សែនជ័យបានប្រាប់ឲ្យដឹងកាលពីថ្ងៃម្សិលមិញថា ករណីជនសង្ស័យឈ្មោះ វង់ ចាន់សុភាព អាយុ ២៩ ឆ្នាំ រីឯស្ត្រីរងគ្រោះឈ្មោះ បូ ស្រីនាង អាយុ ២៩ ឆ្នាំជាកម្មករកាត់ដេរ។
លោក សុវណ្ណ ថ្លែងថា៖ «សមត្ថកិច្ចរបស់យើងកំពុងតាមចាប់ខ្លួនជនសង្ស័យក្រោយពីស្ត្រីរងគ្រោះមកប្តឹងសមត្ថកិច្ចរបស់យើង ក្រោយពីនាងចេញពីមន្ទីរពេទ្យ ដោយសាររលាកភ្លើងមិនធ្ងន់ធ្ងរ»។
លោក ជា សុវណ្ណ ថ្លែងប្រាប់ដោយយោងតាមការអះអាងរបស់ជនរងគ្រោះបានឲ្យដឹងថា មូលហេតុនៃរឿងនេះគឺមុនកើតហេតុស្ត្រីរងគ្រោះមិនបានរួមរស់នៅជាមួយប្តីរបស់គាត់អស់ជាច្រើនខែមកហើយ។ លុះមកដល់រសៀលថ្ងៃទី ១៩ មករា គាត់បានទៅបន្ទប់ជួលដើម្បីយកសម្លៀកបំពាក់ និងរបស់របររបស់គាត់។
បើតាមមន្ត្រីនគរបាលមួយរូបក្នុងខណ្ឌពោធិ៍សែនជ័យបានឲ្យដឹងកាលពីម្សិលមិញក្នុងលក្ខខណ្ឌសុំមិនបញ្ចេញឈ្មោះថា មុនកើតហេតុស្ត្រីរងគ្រោះឈ្មោះ បូ ស្រីនាង បានមកបន្ទប់ជួលរបស់នាងដើម្បីយកខោអាវ ព្រោះនាងមិនបានរួមរស់នៅជាមួយប្តីរបស់នាងជាង ១ ខែមកហើយ ក៏ស្រាប់តែបុរសជាប្តីបានឈ្លោះប្រកែកជាមួយគាត់ដោយស្តីបន្ទោសគាត់ថា ទៅដេកជាមួយប្រុស បន្ទាប់មកក៏យកដបសាំងចំណុះប្រហែល ១ លីត្រចាក់លើខ្លួនគាត់ហើយកេះដែកដុតតែម្តង។
លោក ថេង កុសល នាយនគរបាលប៉ុស្តិ៍ក្នុងសង្កាត់ចោមចៅ ៣ បានឲ្យដឹងថា រវាងស្ត្រីរងគ្រោះ និងជនល្មើសជាប្តីប្រពន្ធនឹងគ្នា ដោយបានរៀបការជាមួយគ្នាអស់រយៈពេលជាង ៧ ឆ្នាំមកហើយព្រមទាំងមានកូនស្រី ២ នាក់ផងហើយពួកគេបានមករស់នៅបន្ទប់ជួលក្នុងភូមិព្រៃព្រីងខាងជើងទី ១ ក្នុងសង្កាត់ចោមចៅ ៣ ខណ្ឌពោធិ៍សែនជ័យ រាជធានីភ្នំពេញ។
លោកប្រាប់តាមសម្តីសាច់ញាតិស្ត្រីរងគ្រោះថា ដោយការរស់នៅមិនចុះសម្រុងគ្នា ប្តីប្រពន្ធខាងលើស្ម័គ្រចិត្តរៀងខ្លួនសុំលែងលះគ្នាដោយសន្តិវិធី ដែលមានការឯកភាពយកកូនម្នាក់មួយ កូនច្បងរស់នៅជាមួយប្តី រីឯកូនប្អូនរស់នៅជាមួយប្រពន្ធ។ ដោយពួកគេមិនបានរស់នៅជាមួយគ្នាអស់រយៈពេលជាង ១ ខែមកហើយ។
លុះមកដល់រសៀលថ្ងៃទី ១៩ ខែ មករា ឆ្នាំ ២០២០ ស្ត្រីរងគ្រោះបានជិះម៉ូតូឌុបកូនស្រី និងប្អូនស្រីតូចម្នាក់ទៀតទៅបន្ទប់ជួលដែលជនសង្ស័យ (ប្តី) ស្នាក់នៅក្នុងបំណងទៅប្រមូលខោអាវរបស់នាង។ ពេលទៅដល់ស្រាប់តែខាងប្តីខឹង ស្ទុះយកដបសាំងចាក់ស្រោចលើខ្លួនស្ត្រីជាប្រពន្ធ ហើយដុតតែម្តង បណ្ដាលឱ្យឆេះរលាករលួយពេញខ្លួនប្រាណ រួចយកលុយ យកទូរស័ព្ទ រត់គេចខ្លួនបាត់។ បន្ទាប់ពីកើតហេតុស្ត្រីរងគ្រោះបានជិះម៉ូតូទៅមន្ទីរពេទ្យដោយខ្លួនឯង ហើយក្រោយពីគ្រូពេទ្យរុំរបួសឲ្យហើយក៏ជិះម៉ូតូត្រឡប់មកដាក់ពាក្យបណ្តឹងនៅប៉ុស្តិ៍នគរបាលសង្កាត់ចោមចៅ ៣៕