រតនគិរីៈ ឈើ ៤ ជ្រុងទ្រវែងចម្រុះប្រភេទចំនួន ៣០ ដុំ ត្រូវបានកម្លាំងសមត្ថកិច្ចចម្រុះខេត្តរតនគិរីសហការជាមួយកម្លាំងសមត្ថកិច្ចមូលដ្ឋានស្រុកអូរយ៉ាដាវប្រទះឃើញនៅក្នុងព្រៃក្បែរចម្ការរបស់ប្រជាពលរដ្ឋនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ដោយសង្ស័យថា ឈើទាំងនេះត្រូវបានក្រុមឈ្មួញលាក់ទុក ដើម្បីនាំចេញទៅលក់នៅប្រទេសវៀតណាម។
លោក ស៊ូយ សំណាង អធិការស្រុកអូរយ៉ាដាវ បានប្រាប់ភ្នំពេញប៉ុស្តិ៍ថា កាលពីថ្ងៃទី ២៨ ខែមិថុនា ឆ្នាំ ២០២០ កម្លាំងសមត្ថកិច្ចចម្រុះខេត្តរតនគិរី ដឹកនាំដោយលោក នូវ ដារ៉ា ស្នងការរងទទួលផែនប្រឆាំងបទល្មើសបានចុះធ្វើការស្រាវជ្រាវ និងបង្ក្រាបបទល្មើសនៅតាមជួរបន្ទាត់ព្រំដែនកម្ពុជា-វៀតណាម ក្នុងភូមិសាស្ត្រស្រុកអូរយ៉ាដាវ ហើយបានប្រទះឃើញគំនរឈើចម្រុះប្រភេទ ៣០ ដុំ នៅព្រៃក្បែរច្រករបៀងមួយស្ថិតក្បែរចម្ការប្រជាពលរដ្ឋ នៅក្នុងភូមិឡំ ឃុំប៉ក់ញ៉ៃ។ នៅក្បែរគំនរឈើទាំងនោះមានម៉ូតូកែច្នៃ ១ គ្រឿង ដែលសង្ស័យក្រុមឈ្មួញបានលាក់ទុក ដើម្បីត្រៀមបម្រុងដឹកជញ្ជូនឈើយកទៅលក់នៅប្រទេសវៀតណាម។
លោកថា៖ «យើងមិនដឹងថា ឈើទាំង ៣០ កំណាត់នោះជាប្រភេទឈើអ្វីខ្លះនោះទេ ហើយគិតជាម៉ែត្រគុបមានប៉ុន្មាននោះដែរ ប៉ុន្តែវាមានរាង ៤ ជ្រុងទ្រវែងដែលភាគច្រើនមានទំហំមុខកាត់ ៤០ សង់ទីម៉ែត្រ ហើយខ្លះទៀតមានទំហំមុខកាត់ ៣០ សង់ទីម៉ែត្រ និងមានប្រវែងពី ២,៥ ម៉ែត្រទៅ ៣ ម៉ែត្រ»។
បើតាមលោក សំណាង បច្ចុប្បន្នវត្ថុតាងឈើទាំង ៣០ កំណាត់ និងម៉ូតូកែច្នៃ ១ គ្រឿងនោះ ត្រូវបានដឹកជញ្ជូនយកទៅប្រគល់ឲ្យមន្ត្រីជំនាញសង្កាត់រដ្ឋបាលព្រៃឈើអូរយ៉ាដាវ ដើម្បីវាស់វែង និងប្រកាសស្វែងរកម្ចាស់ឈើ ដើម្បីចាត់ការបន្តតាមនីតិវិធីច្បាប់។
លោក ហុង គា នាយរងខណ្ឌរដ្ឋបាលព្រៃឈើខេត្តរតនគិរីបានថ្លែងថា លោកនៅមិនទាន់ទទួលបានរបាយការណ៍ស្ដីពីការវាស់វែងភាពជាក់ស្ដែងពីចំនួនឈើទាំងនោះទេ។ លោកបន្តថា កាលពីថ្ងៃទី ២៥ ខែ មិថុនា ឆ្នាំ ២០២០ ក្រុមសមត្ថកិច្ចរដ្ឋបាលព្រៃឈើបានបង្ក្រាបចាប់ឈើស្រឡៅចំនួន ២១ ដុំផងដែរ ដែលបច្ចុប្បន្នឈើទាំងនោះក៏នៅមិនទាន់ធ្វើការវាស់វែងនៅឡើយដែរ។
បើតាមលោក គា រាល់ឈើដែលបង្ក្រាបចាប់រឹបអូសបានពីបទល្មើសផ្សេងៗនៅតាមដងព្រៃ ឬចម្ការក្នុងភូមិប្រជាពលរដ្ឋចាំបាច់ត្រូវប្រកាសជូនដំណឹងស្វែងរកម្ចាស់ ដើម្បីធ្វើការផាកពិន័យទៅតាមច្បាប់ ប៉ុន្តែបើគ្មានអ្នកណាម្នាក់មកទទួលស្គាល់ថាជាម្ចាស់ឈើទេនោះឈើដែលរឹបអូសបានពីបទល្មើសបែបនេះ ត្រូវចាត់ទុកជា «ឈើអញ្ញតិជន» និងត្រូវស្នើសុំការសម្រេចពីតុលាការ ដើម្បីយករក្សាទុកជាសម្បត្តិរដ្ឋ៕