.jpg)
កំាភ្លើងច្នៃដែលរៀលកៃត្រូវស្ត្រីម្នាក់ស្លាប់នៅកំពង់ធំ។ រូបថត ហ្វេសប៊ុក
កំពង់ធំ៖ ក្មេងប្រុសអាយុ ១២ ម្នាក់ ដែលបានយកកាំភ្លើងច្នៃទៅជន្លលេងហើយរៀលកៃត្រូវម្តាយស្លាប់កាលពីព្រលប់ថ្ងៃទី ១៦ មីនា នៅភូមិ-ឃុំទួលគ្រើលស្រុកប្រាសាទបល្ល័ង្ក ខេត្តកំពង់ធំនោះ គឺសមត្ថកិច្ចមិនបានឃាត់ខ្លួនទេ ដោយសារក្មេងនោះមិនទាន់គ្រប់អាយុ និងជាកំហុសអចេតនា។
លោក ទិត្យ សំណាង ស្នងការរងនគរបាលខេត្តកំពង់ធំឲ្យដឹងពីម្សិលមិញថា ក្មេងប្រុសបង្កហេតុនោះ ឈ្មោះ គ្រឿង ម៉ាណា អាយុ ១២ ឆ្នាំ។ រីឯស្រ្តីរងគ្រោះជាម្តាយបង្កើតឈ្មោះ យ៉ិត ឃឿន អាយុ ៣៣ ឆ្នាំ ពួកគេរស់នៅក្នុងភូមិ-ឃុំកើតហេតុខាងលើ។ ប៉ុន្តែក្មេងប្រុសនោះសមត្ថកិច្ចមិនបានចាប់ខ្លួនទេ ក្រោយពីស្រាវជ្រាវឃើញថា ជាការប្រព្រឹត្តដោយអចេតនា។
លោកថ្លែងថា៖ «តាមពិតវាលេងទេ វាមិនមែនចេតនា តែបើវាខឹងវាកាប់ម្តាយវាស្លាប់ គឺអាចតុលាការគេពិចារណាដែរ។ ប៉ុន្តែក្នុងច្បាប់ រឿងបទឧក្រិដ្ឋក៏ដោយ បទមជ្ឈិមក៏ដោយ ក្មេងអាយុក្រោមប៉ុណ្ណឹង មិនអាចផ្តន្ទាទោសបានទេ»។
លោកបានបន្តថា ករណីនេះសមត្ថកិច្ចលោកបានរាយការណ៍ទៅព្រះរាជអាជ្ញាអមសាលាដំបូងខេត្តកំពង់ធំ និងនាយកដ្ឋានកណ្តាលយុត្តិធម៌ក្រសួងមហាផ្ទៃរួចហើយ។ ប៉ុន្តែថ្វីបើមិនបានឃាត់ខ្លួនក្មេងបង្កក្តីក៏លោកបញ្ចូនសំណុំរឿងទៅសាលាដំបូងខេត្តតាមនីតិវិធីដែរ ដោយចាំមើលថា តើតុលាការសម្រេចយ៉ាងម៉េច? តែបើក្មេងនោះគ្រប់អាយុវិញបើទោះជាកំហុសអចេតនាក៏ឃាត់ខ្លួនដែរ។
លោកស្នងការរង ទិត្យ សំណាង បានរំឭកប្រាប់តាមសម្តីសាក្សី ថា ហេតុការណ៍នេះកើតឡើងកាលពីវេលាម៉ោង ១៨ និង ៣០ នាទី ព្រលប់ថ្ងៃទី ១៦ ខែមីនា នៅក្នុងភូមិទួលគ្រើល ឃុំទួលគ្រើល ស្រុកប្រាសាទបល្ល័ង្ក ខេត្តកំពងធំ។ មុនពេលកើតហេតុ ក្មេងបង្កបានបញ្ចូលគ្រាប់កង់ ហើយបានយកកាំភ្លើងនោះទៅភ្ជង់ជន្លដាក់ម្តាយលេង ក៏រៀលកៃចេញគ្រាប់ចំនួន ២ គ្រាប់ ត្រូវចំដើមទ្រូងស្លាប់ភ្លាមៗនឹងផ្ទះជនរងគ្រោះតែម្តង៕
