.jpg)
អាវុធវែងខ្លី និងគ្រាប់ដែលប្រទះឃើញកាលពីថ្ងៃ ៨ វិច្ឆិកា ។ រូបថត FN
ភ្នំពេញ: សមត្ថកិច្ចខណ្ឌព្រែកព្នៅពីម្សិលមិញកំពុងស្រាវជ្រាវរកជនសង្ស័យដែលប្លុងចោលកេសស័ង្កសី ១ ដែលមានអាវុធខ្លីវែងជិត ១០ ដើម និងគ្រាប់មួយចំនួននៅមាត់បឹងក្នុងភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ដោយមន្ត្រីសន្និដ្ឋានថា ជនសង្ស័យអាចប៉ុនប៉ងបង្កចលាចលក្នុងសង្គម។
លោក ឈិន គឹមធុយ អធិការនគរបាលខណ្ឌព្រែកព្នៅបានថ្លែងថា នគរបាលជំនាញខណ្ឌ និងស្នងការដ្ឋាននគរបាលរាជធានីភ្នំពេញកំពុងស្រាវជ្រាវរកជនសង្ស័យដែលបានប្លុងចោលប្រអប់ដែលមានបង្កប់ អាវុធវែង ខ្លី និងសម្ភារផ្សេងនៅទីតាំងខាងលើនេះ។
លោកថា៖ «យើងបានបញ្ជូនអាវុធទាំងនេះទៅឱ្យមន្ត្រីជំនាញនៃស្នងការដ្ឋាននគរបាលរាជធានីភ្នំពេញនៅថ្ងៃទី ៨ ខែវិច្ឆិកា ហើយ ដើម្បីរក្សាទុកកន្លែងមានសុវត្ថិភាព ហើយកិច្ចការបន្តគឺយើងកំពុងស្រាវជ្រាវរកអ្នកទម្លាក់អាវុធទាំងនេះចោល»។
បើតាមលោក គឹមធុយ កេសអាវុធនេះត្រូវបានពលរដ្ឋមូលដ្ឋានប្រទះឃើញ រួចបានរាយការណ៍ជូនសមត្ថកិច្ច ទើបមានការចុះពិនិត្យ និងប្រមូលទុក។
លោក ណាំ សំខាន់ នាយរងប៉ុស្ដិ៍នគរបាលរដ្ឋបាលសង្កាត់ព្រែកព្នៅបានឱ្យដឹងពីម្សិលមិញថា លោកបានទទួលព័ត៌មាននេះពីពលរដ្ឋឈ្មោះ សោម ភារម្យ ភេទប្រុស និងឈ្មោះ វី ពៅ ភេទប្រុស នៅម៉ោង ១១ កន្លះព្រឹកថ្ងៃទី ៨ វិច្ឆិកា។ ពួកគាត់បានចេញពីផ្ទះទៅរកបេះបន្លែនៅមាត់បឹងក៏ប្រទះឃើញកេសបិទជិត និងមានចាក់សោផង។
លោកបន្តថា ពេលឃើញបែបនេះពួកគាត់បង្ហើបមើលក្នុងកេសក៏ឃើញមានកាំភ្លើងគ្រាប់ បង់កាំភ្លើង និងសម្ភារមួយចំនួនទៀត ហើយបានរាយការណ៍ជូននគរបាលប៉ុស្តិ៍ព្រែកព្នៅ។ ក្រោយទទួលបានព័ត៌មាននេះលោកបានរាយការណ៍ និងសុំគោលការណ៍ពីថ្នាក់លើចុះត្រួតពិនិត្យដល់ទីតាំង។
លោកថា៖ «យើងបានពិនិត្យឃើញកាំភ្លើងវែង ខ្លី និងគ្រាប់មួយចំនួនទៀត។ យើងបានលើកទឹកចិត្តពលរដ្ឋដែលបានឃើញវត្ថុទាំងនេះ ហើយរាយការណ៍ជូនសមត្ថកិច្ចភ្លាមៗ ព្រោះបើគាត់មិនរាយការណ៍ប្រាប់មន្ត្រីជំនាញទាន់ពេលទេ យើងខ្លាចតែអាវុធទាំងនេះធ្លាក់ទៅលើដៃជនខិលខូចអាចនឹងបង្កបញ្ហាដល់សង្គមយើង»។
លោកបន្ថែមថា ករណីនេះសមត្ថកិច្ចសង្ស័យថា ជនល្មើសកំពុងរៀបចំផែនការធ្វើសកម្មភាពអ្វីមួយ ឬចង់បង្កចលាចលក្នុងសង្គម។ ការទម្លាក់អាវុធចោលនេះអាចមកពីជនល្មើសឃើញសមត្ថកិច្ចកំពុងឆែកឆេរអាវុធជាតិផ្ទុះនៅខាងមុខវិទ្យាល័យព្រែកព្នៅ ហើយអាចមានបក្ខពួកផ្ដល់សញ្ញាឱ្យដឹងមុន ទើបពួកគេសម្រេចចិត្តប្លុងប្រអប់នោះចោលទៅ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញពីម្សិលមិញមិនអាចទាក់ទងសុំការបញ្ជាក់បន្ថែមជុំវិញករណីនេះបានទេ។
ប៉ុន្តែតាមរបាយការណ៍របស់អធិការដ្ឋាននគរបាលខណ្ឌព្រៃកព្នៅឱ្យដឹងពីម្សិលមិញថា អាវុធទាំងនោះរួមមាន៖ អាវុធវែងម៉ាកការ៉ាប៊ីន ១ ដើម អាវុធវែងម៉ាក M16 ចំនួន ១ ដើម អាវុធខ្លីម៉ាក K៥៤ ចំនួន ៣ ដើម អាវុធខ្លីម៉ាក P08 ចំនួន ២ ដើម បង់អាវុធម៉ាក K៥៤ ចំនួន ៣ បង់មានគ្រាប់ចំនួន ១០៩ គ្រាប់។
តាមរបាយការណ៍ដដែលក្រៅពីនោះមានបង់អាវុធម៉ាក M16 ចំនួន ៣ បង់ មានគ្រាប់ចំនួន ៦០ គ្រាប់ បង់អាវុធម៉ាកការ៉ាប៊ីនចំនួន ២ បង់មានគ្រាប់ចំនួន ៩ គ្រាប់ ស្រោមអាវុធខ្លីចំនួន ១ កាំបិតខ្លីចំនួន ១ ដើម ស្ព្រៃយ៍ពណ៌ខ្មៅចំនួន ១ ដប និងកេសដែកស័ង្កសីទំហំ (៣០ ស.ម x ៦០ ស.ម) ចំនួន ១៕
