.jpg)
សំណាកសត្វព្រៃ ដែលត្រូវបានសមត្ថកិច្ចរឹបអូស។ សហការី
បាត់ដំបងៈ សមត្ថកិច្ច និងមន្ត្រីរដ្ឋបាលព្រៃឈើ បានរឹបអូសយកសំណាកសត្វស្លាបចម្រុះចំនួន ១៩៧ ក្បាល នៅម្តុំលក់ទឹកត្នោតជូរ នៅភូមិស្វាយកង់ ឃុំអន្លង់វិល ស្រុកសង្កែប៉ុន្តែរកពុំឃើញអ្នកទទួលខុសត្រូវនោះទេ។
លោក អ៊ុច ភិរុណ នាយរងខណ្ឌរដ្ឋបាលព្រៃឈើខេត្តបាត់ដំបង បានឲ្យដឹងកាលពីម្សិលមិញថា ការរឹបអូស សំណាកសត្វស្លាបដែលងាប់នេះ បានធ្វើឡើងកាលពីថ្ងៃទី ២៤ ខែ មេសា ហើយសំណាកសត្វទាំងនេះ ត្រូវបានបញ្ជូនទៅកាន់ថ្នាលបណ្តុះកូនឈើ ដើម្បីកប់ចោល។
លោក ភិរុណ បានបញ្ជាក់ថា៖ «អត់មានម្ចាស់ណាទទួលខុសត្រូវទេ។ អាហ្នឹងជាសំណាកសត្វងាប់អ៊ីចឹង អាហ្នឹងតាមនីតិវិធីរបស់គេ គេកប់ឬដុតបំផ្លាញចោល។ លើកលែងតែសត្វហ្នឹងរស់ អាហ្នឹងគេយកទៅព្រលែងនៅព្រៃធម្មជាតិរបស់វា»។
លោក ឈឹម សេរីវិចរ៉ា ប្រធានមន្ទីរកសិកម្មខេត្តបាត់ដំបង ក៏បានឲ្យដឹងដែរថា សមត្ថកិច្ចបានធ្វើការណែនាំអប់រំអ្នកលក់សត្វស្លាបឱ្យបញ្ឈប់ការទិញប្រភេទសត្វស្លាបទាំងនេះ។ សមត្ថកិច្ចក៏បានសួរនាំម្ចាស់តូបលក់សត្វទាំងនេះ ប៉ុន្តែមិនមានម្ចាស់ណាទទួលខុសត្រូវ។ ក្នុង ១ ឆ្នាំ សមត្ថកិច្ចចុះធ្វើសកម្មភាពនេះ ២ ទៅ ៣ ដង។ កាលពីឆ្នាំមុន សមត្ថកិច្ចធ្លាប់ដុតសំណាកសត្វស្លាបនេះ ២ ទៅ ៣ ដងដែរ ដែលជាប្រភេទសត្វស្លាបព្រៃដែលមានដូចជា សត្វត្លុំ ក្រួច កុក និងពួកសត្វស្លាបព្រៃផ្សេងទៀត។
លោក ឈឹម សេរីវិចរ៉ា បានបញ្ជាក់ថា៖ «លក់រាល់លើក គេហាមប៉ុន្មានដងហើយ គាត់នៅតែអ៊ីចឹង។ ដុតប៉ុន្មានដងហើយ។ យើងគ្រាន់តែធ្វើកិច្ចសន្យាឱ្យគាត់ឈប់លក់ដូរអ៊ីចឹង។ នៅម្តុំលក់ទឹកត្នោតជូរ។ អត់មាននរណាទទួលខុសត្រូវ។ អត់មាននរណាចេញមុខ។ អាហ្នឹងដូចរបៀបគេយកមកលក់ សត្វស្លាប សត្វព្រៃ ដាក់អន្ទាក់ ដាក់អី លក់ឱ្យគាត់អ៊ីចឹងណា»។
បើតាមលោក សេរីវិចរ៉ា សត្វស្លាបទាំងនេះមិនដឹងប្រភពមកពីណាខ្លះនោះទេ ប៉ុន្តែអាចមកពីទន្លេ «តាមស្រែ តាមព្រៃអ៊ីចឹងណា»៕
