.jpg)
ជនសង្ស័យ (កណ្ដាល) ក្រោយពេលចាប់ខ្លួនពីម្សិលមិញ។ រូបថត ប៉ូលិស
ភ្នំពេញៈ សមត្ថកិច្ចនៃស្នងការដ្ឋាននគរបាលជាតិរាជធានីកាលពីម្សិលមិញបានសហការឃាត់ខ្លួនបុរសម្នាក់ពាក់ព័ន្ធនឹងការផ្សព្វផ្សាយព័ត៌មានមិនពិត ទាក់ទងករណីចាក់វ៉ាក់សាំងកូវីដ ១៩ និងបានបំផុសកុំឱ្យកម្មករចូលរួមចាក់វ៉ាក់សាំង ហើយត្រូវបញ្ជូនទៅតុលាការនៅថ្ងៃនេះ។
ការឃាត់ខ្លួននេះបានធ្វើឡើងបន្ទាប់ពីបុរសរូបនេះបានបង្ហោះសារជាវីដេអូនៅលើបណ្តាញសង្គម (TikTok) ដោយបាននិយាយថា៖ «(វីដេអូនេះផ្ញើជូនកម្មកររោងចក្រទាំងអស់ប្រសិនបើយើងទទួលចាក់វ៉ាក់សាំងនេះ (Sinopharm) ២-៣ ឆ្នាំក្រោយមកគឺស្លាប់ហើយ អ៊ីចឹងបងប្អូនអ្នកធ្វើការរោងចក្រមិនបាច់ចាក់ទេ ជឿតាមខ្ញុំ មិនបាច់ចាក់ទេ វ៉ាក់សាំងចិន»។
ស្នងការនគរបាលរាជធានីភ្នំពេញលោក ស ថេត បានប្រាប់ ភ្នំពេញ ប៉ុស្តិ៍ ពីម្សិលមិញថា ការឃាត់ខ្លួននេះបានធ្វើឡើងនៅក្នុងទឹកដីខេត្តកំពង់ឆ្នាំង និងបានបញ្ជូនមកស្នងការដ្ឋានរាជធានីភ្នំពេញដើម្បីបញ្ជូនបន្តទៅតុលាការក្រុងភ្នំពេញនៅថ្ងៃ (ថ្ងៃព្រហស្បតិ៍) នេះ។
យោងតាមរបាយការណ៍របស់អគ្គស្នងការដ្ឋានគរបាលជាតិឱ្យដឹងថា បុរសម្នាក់នោះឈ្មោះ តោ ចន្នី មុខរបរបើករថយន្តដឹកទំនិញត្រូវបានសមត្ថកិច្ចឃាត់ខ្លួននៅព្រឹកថ្ងៃទី ២៤ មីនា និងបានបញ្ជូនមកស្នងការដ្ឋាននគរបាលរាជធានីភ្នំពេញដើម្បីសាកសួរបន្ថែម មុននឹងកសាងសំណុំរឿងបញ្ជូនទៅសាលាដំបូងរាជធានីភ្នំពេញ។
ទាក់ទងនឹងបទល្មើសបែបនេះ អ្នកនាំពាក្យក្រសួងយុត្តិធម៌លោក គឹម សន្តិភាព បានសរសេរលើហ្វេសប៊ុករបស់លោកកាលពីម្សិលមិញថា៖ «បុគ្គលណាដែលបានរារាំងតាមគ្រប់មធ្យោបាយក្នុងចេតនាមិនឱ្យបុគ្គលដទៃទៅទទួលការចាក់វ៉ាក់សាំងគឺជាអំពើល្មើសច្បាប់ដែលកំណត់បានជាបទល្មើស "រារាំងដល់ការអនុវត្តវិធានការ" តាមបញ្ញត្តិក្នុងមាត្រា ១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតត្រូវផ្តន្ទាទោសដាក់ពន្ធនាគារពី ៦ ខែ ទៅ ៣ ឆ្នាំ និងពិន័យជាប្រាក់ពី ២ ០០០ ០០០ (ពីរលាន) រៀលទៅ ១០ ០០០ ០០០ (ដប់លាន) រៀល»។
ទន្ទឹមនឹងនេះដែរ លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ និងជាប្រធានអនុគណៈកម្មការចំពោះកិច្ចប្រចាំក្រសួងនេះសម្រាប់ចាក់វ៉ាក់សាំងកូវីដ ១៩ បានអំពាវនាវដល់កម្មករ និងជនរួមជាតិឱ្យចូលរួមចាក់វ៉ាក់សាំងទាំងអស់គ្នា។
លោកថា៖ «សូមបងប្អូនជឿជាក់លើវិទ្យាសាស្ត្រ និងវ៉ាក់សាំងគ្រប់ប្រភេទដែលរាជរដ្ឋាភិបាលបានខិតខំស្វែងរកមក ខ្ញុំ និងមិត្តភក្តិបានចាក់វ៉ាក់សាំងទាំងនោះរួចហើយ និងមិនឃើញមានផលប៉ះពាល់អ្វីដល់សុខភាពយើងខ្ញុំទេ»។
តាមរបាយការណ៍ក្រសួងសុខាភិបាលបានឱ្យដឹងថា ចំនួនអ្នកស្ម័គ្រចិត្តចាក់វ៉ាក់សាំង (Sinopharm) គិតពីថ្ងៃទី ១០ ខែកុម្ភៈ ដល់ថ្ងៃទី ២៣ ខែមីនា និងវ៉ាក់សាំង (COISHIELD) ពីថ្ងៃទី ៤ ខែមីនា ដល់ថ្ងៃទី ២៣ ខែ មីនា ឆ្នាំ ២០២១ គឺមានចំនួនសរុបចំនួន ២៤១ ៥៩៣ នាក់ក្នុងនោះមានស្រីចំនួន ៨៤ ៤៦៤ នាក់៕
វីដេអូ៖
