បាត់ដំបងៈ សមត្ថកិច្ចនគរបាលបានដាក់ការសង្ស័យករណីស្លាប់មនុស្ស ២ នាក់ (ម្ដាយ និងកូនស្រី) ថាជាអំពើឃាតកម្ម បន្ទាប់ពីប្រទះឃើញសពនៅក្រោមគំនរភ្នក់ភ្លើងឆេះផ្ទះ ១ ខ្នងនៅភូមិ-ឃុំបន្សាយត្រែង ស្រុកថ្មគោល ខេត្តបាត់ដំបងកាលពីម៉ោង ១:៤០ នាទី រំលងអធ្រាត្រឈានចូលថ្ងៃទី ៣១ ខែ ឧសភា ឆ្នាំ ២០២០។
លោក ផង់ សុភាព អធិការស្រុកថ្មគោលបានប្រាប់ភ្នំពេញប៉ុស្តិ៍កាលពីម្សិលមិញថា អ្នកស្រី គិម ធឿន អាយុ ៥២ ឆ្នាំ និងកូនស្រីរបស់គាត់ឈ្មោះ យៃសៀវម៉ី អាយុ ១៨ ឆ្នាំ ត្រូវបាននគរបាលកងពន្លត់អគ្គិភ័យស្រុកថ្មគោលប្រទះឃើញស្លាប់នៅក្រោមគំនរភ្នក់ភ្លើងដោយរាងកាយរបស់ពួកគាត់ត្រូវភ្លើងឆេះខ្លោចស្ទើរតែក្លាយទៅជាដុំធ្យូង។
លោក សុភាព បានបញ្ជាក់ថា៖ «យោងតាមការពិនិត្យនៅកន្លែងកើតហេតុ និងលទ្ធផលនៃការធ្វើកោសល្យវិច័យលើសាកសពជនរងគ្រោះទាំង ២ នាក់ម្ដាយ និងកូនស្រីដែលមានស្នាមរបួសផ្នែកក្បាល និងកនគរបាលជំនាញបានសន្និដ្ឋានថា ករណីគ្រោះអគ្គិភ័យនេះ គឺជាអំពើឃាតកម្មសម្លាប់មនុស្ស រួចដុតផ្ទះចោល ដើម្បីរំលាយសពបំបាត់ភ័ស្ដុតាង»។
លោក សុភាព បានបន្តថា មកទល់ពេលនេះក្រុមសមត្ថកិច្ចកំពុងបន្តស្រាវជ្រាវ និងកំណត់អត្តសញ្ញាណជនសង្ស័យដើម្បីឈានទៅឃាត់ខ្លួន និងកសាងសំណុំរឿងបញ្ជូនទៅឲ្យតុលាការផ្ដន្ទាទោសទៅតាមផ្លូវច្បាប់។
តាមរបាយការណ៍ស៊ើបអង្កេតចុងក្រោយដែលត្រូវបានផ្សព្វផ្សាយដោយក្រុមប្រតិកម្មរហ័សនៃស្នងការដ្ឋាននគរបាលខេត្តបាត់ដំបងកាលពីម្សិលមិញ សមត្ថកិច្ចបានដាក់ការសង្ស័យទៅលើបុរសជាប្ដីឈ្មោះ យៃ ឡើយអាយុ ៥២ ឆ្នាំថា ជាអ្នកព្រឹត្តបទល្មើសនេះ។
លោក អ៊ឹម កុសល ប្រធានក្រុមប្រតិកម្មរហ័សនៃស្នងការដ្ឋាននគរបាលខេត្តបាត់ដំបងបានប្រាប់ភ្នំពេញប៉ុស្តិ៍ថា តាមលទ្ធផលនៃការសាកសួរអ្នកភូមិនៅក្បែរផ្ទះជនរងគ្រោះបានបញ្ជាក់ថានៅល្ងាចថ្ងៃកើតហេតុ ពួកគេបានឃើញបុរសជាប្ដីឈ្មោះ យៃ ឡើយ ស្នាក់នៅផ្ទះជាមួយប្រពន្ធ និងកូនស្រី ដូចសព្វ ១ ដង។ ប៉ុន្តែក្រោយកើតហេតុស្រាប់តែបាត់វត្តមានរបស់គាត់ដោយគ្មានមូលហេតុ ហើយទូរស័ព្ទដែលគាត់ធ្លាប់ប្រើក៏មិនអាចទាក់ទងបាន។
លោក កុសល បានបញ្ជាក់ថា៖ «ករណីនេះ បុរសជាប្ដីគឺជាមនុស្សដំបូងដែលជាប់សង្ស័យថាជាអ្នកប្រព្រឹត្តបទឃាតកម្មដ៏ឃោរឃៅនេះ និងកំពុងរត់គេចខ្លួនពីការតាមចាប់របស់សមត្ថកិច្ច»។
លោក កុសល បានបន្តថា៖ «ទោះយ៉ាងណាមកទល់ពេលនេះក្រុមសមត្ថកិច្ចនៅមិនទាន់ដឹងច្បាស់ពីគោលបំណងនៃអំពើឃាតកម្មដែលជនសង្ស័យបានប្រព្រឹត្តទៅលើស្ត្រីរងគ្រោះទាំង ២ នាក់ម្ដាយ និងកូនស្រីនោះទេ។ យើងអាចដឹងអំពីមូលហេតុនៃអំពើឃាតកម្មនេះក្រោយពីបុរសជាប្ដីចូលខ្លួនមកឆ្លើយបំភ្លឺចំពោះមុខសមត្ថកិច្ច»។
បើតាមលោក កុសល នៅពេលនេះក្រុមសមត្ថកិច្ចជំនាញកំពុងស្វែងរកតម្រុយនៃកន្លែងលាក់ខ្លួនរបស់ជនសង្ស័យជាប្ដី ដើម្បីឈានទៅរកការចាប់ឃាត់ខ្លួនមកធ្វើការសួរនាំជុំវិញករណីខាងលើនេះ៕